តុលាការអះអាងថា លោក យាង សុជាមេតា និងលោក អួន ឈិន ប្រឈមនឹងជាប់ពន្ធនាគារ១៥ឆ្នាំ

ចៅក្រមស៊ើបសួរសាលាដំបូងរាជធានីភ្នំពេញបានសម្រេចរក្សាបទចោទទៅលើអតីតវិទ្យុអាស៊ីសេរីពីររូប របស់ព្រះរាជអាជ្ញារង ដោយបានចោទប្រកាន់តាមមាត្រា៤៤៥ នៃក្រមព្រហ្មទណ្ឌ ដែលអាចប្រឈមនឹងជាប់ពន្ធនាគាររហូតដល់ទៅ១៥ឆ្នាំ ។ ការសាកស៊ួរបស់ចៅក្រមស៊ើបសួរដែលប្រើរយៈពេលជាង៥ម៉ោងនៅរសៀលថ្ងៃទី១៨ ខែវិច្ឆកា ឆ្នាំ២០១៧ នេះ មិនទាន់ចេញជាលទ្ធផលយ៉ាងណានោះទេដោយសារតែចៅក្រមនឹងត្រូវបន្តនីតិវិធីស្រាវជ្រាវនិងស៊ើបសួរទៀត ប៉ុន្តែមិនទាន់កំណត់ថា នឹងបញ្ជូនអ្នកទាំងពីរមកកាន់តុលាការនៅពេលណានោះឡើយ រីឯអ្នកទាំងពីរត្រូវបានសមត្ថកិច្ចបញ្ជូនទៅកាន់ ពន្ធនាគារព្រៃស។ សូមបញ្ជាក់ថា អតីតបុគ្គលិកវិទ្យុអាស៊ីសេរីពីររូប គឺ លោក អ៊ួន ឈិន និង លោក យាង សុជាមេត្តា នៅព្រឹកថ្ងៃទី១៨ ខែវិច្ឆិកា នេះ ត្រូវបានលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចោទប្រកាន់ជាផ្លូវការហើយ ។ សំណុំរឿង និង ជនត្រូវចោទ ត្រូវបានបញ្ជូនទៅចៅក្រមស៊ើបសួរចាត់ការបន្តតាមនីតិវិធី ។ ប្រភពព័ត៌មានច្បាស់ការណ៍មួយបង្ហើបឱ្យដឹងថា អតីតបុគ្គលិកវិទ្យុអាស៊ីសេរីទាំងពីររូប ត្រូវបានចោទប្រកាន់ពីបទ ”ប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តររាយការការពារជាតិ” តាមមាត្រា៤៤៥ នៃក្រមព្រហ្មទណ្ឌ ។ លោក លី សុផាណាបានលើកឡើងថា «បន្ទាប់ពីបានពិនិត្យសំណុំរឿង រួមទាំងឆ្លងកាត់ការស្រាវជ្រាវស៊ើបអង្កេត ដោយបានពិនិត្យភស្តុតាងនិងផ្ទៀងផ្ទាត់ចម្លើយជនសង្ស័យរួចមក ព្រមទាំងយល់ឃើញថាមាន មូលដ្ឋានគ្រប់គ្រាន់ឲ្យតំណាងអយ្យការអមសាលាដំបូងរាជធានីភ្នំពេញធ្វើការចោទប្រកាន់ដោយបើកការស៊ើបសួរ ពីបទ ប្រគល់អោយរដ្ឋបរទេសនូវព័ត៌មានជាអាទិដែលបង្កអោយមានការអន្តរាយដល់ការការពារជាតិ តាមបញ្ញត្តិមាត្រា ៤៤៥ នៃក្រមព្រហ្មទណ្ឌព្រះរាជាណាចក្រកម្ពុជា»៕