ខ្លាំងរហូត ៖ រដ្ឋាភិបាលអះអាងថា កម្ពុជាត្រៀមខ្លួនរួចហើយពេលបរទេសដាក់ទណ្ឌកម្ម

រដ្ឋាភិបាលកម្ពុជា តាមរយៈរដ្ឋមន្រ្តីក្រសួងសេដ្ឋកិច្ចបានអះអាងថា រាជរដ្ឋាភិបាលបានត្រៀមខ្លួនរួចជាស្រេចហើយ ក្នុងការទប់ទល់សេដ្ឋកិច្ច នៅពេលណាដែលបរទេសសម្រេចចិត្តដាក់ទណ្ឌកម្មមកលើកម្ពុជាពិតមែននោះ ។ លោក អួន ពន្ធមុនីរត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងអះអាងថា រាជរដ្ឋាភិបាលមិន ចាំបាច់ត្រូវការជំនួយលើសលបពីក្រុមបរទេសដើម្បីមកជួយអភិវឌ្ឍកម្ពុជានោះឡើយ ។ លោកបាន អះអាងថា បច្ចុប្បន្ននេះ កម្ពុជាត្រូវការជំនួយមែន ប៉ុន្តែជំនួយនោះត្រឹមតែ២០ភាគរយប៉ុណ្ណោះ គឺអា ចដំណើរការ ការងាររបស់រដ្ឋាភិបាលបានហើយ ដោយហេតុថា បច្ចុប្បន្នកម្ពុជាគឺមានការអភិវឌ្ឍល្អ គួរសម ។ លោកបញ្ជាក់អោយដឹងបែបនេះ ៖ « យើងមានឯករាជ្យភាពដែលយើងលែងពឹងផ្អែកទៅលើជំនួយបរទេសនេះ យើងក៏នៅមានធនធានមួយទៀតទាក់ទងនឹងផ្នែកធនធានបំរុង សម្រាប់ធានាគ្រប់គ្រងសភាពការនៅពេលមានវិបត្តិសេដ្ឋកិច្ចឬហិរញ្ញវត្ថុជាយថាហេតុ » ។ ការថ្លែងលើកឡើងរបសលោក អូន ពន្ធមុនីរត្នយ៉ាងដូច្នេះ ធ្វើឡើងនៅក្នុងកិច្ចប្រជុំសភាកាលពីម្សិល មិញនេះ ក្រោមរបៀបវារៈលើការរៀបចំការបោះឆ្នោតជ្រើសតាំងសមាជិកបន្ថែមចំនួន០២រូប សម្រាប់គណៈកម្មាធិការនានានៃរដ្ឋសភា និងរបៀបវារៈមួយចំនួនទៀតដែលមានតែសមាជិកសភារបស់បក្សកាន់អំណាចូលរួម ។ ការថ្លែងនេះ គឺធ្វើឡើងចំពេលស្ថានការណ៍ហក់ឡើងកម្ដៅខ្ពស់ ក្រោយពេលដែលតុលាការបានសម្រេចប្រកាសសាលដីការរំលាយគណបក្សសង្រ្គោះជាតិជាស្ថាពរតាមបណ្ដឹងប្ដឹងដោយមេធាវីរបស់ក្រសួងមហាផ្ទៃ ។ ប៉ុន្តែយ៉ាងណាសហគមន៍អន្តរជាតិជាច្រើនមិនសុខចិត្តជាមួយនឹងស្ថានការណ៍បែបនេះឡើយ ។ ក្នុងនោះមានទាំងមហាអំណាច និងប្រទេសដែលជាម្ចាស់ជំនួយធំៗរបស់កម្ពុជាផងដែរ ។ ដោយឡែកសម្រាប់សហរដ្ឋអាមេរិកវិញនោះ បានប្រកាសបញ្ឈប់ការផ្ដល់ជំនួយមកកម្ពុជាលើការបោះឆ្នោតដែលនឹងប្រព្រឹត្តទៅនាពេលខាងមុខនេះ។ លើសពីនេះទៀតសហរដ្ឋអាមេរិកក៏នឹងមិន ទទួលស្គាល់ការបោះឆ្នោតនាពេលខាងមុខនេះដែរ ប្រសិនណាបើស្ថានការណ៍នៅតែមិនប្រែប្រួលទេនោះ ៕