លោក​ ហ៊ុ​ន​ ​សែន​ ​ ៖ អញ្ជើញមកអាវ៉ា អញ់ស្វាគមន៍

ប្រធាគណបក្សប្រជាជនកម្ពុជា និងជានាយករដ្ឋមន្រ្តីផងនោះ លោក ហ៊ុន សែន បានបង្ហាញការស្ដាយក្រោយដែលមិនបានសម្លាប់ក្រុមអ្នកប្រឆាំងនឹងរដ្ឋាភិបាលកាលពីឆ្នាំ ២០១៣ កន្លងទៅ ដោយចោទថា ពួកនោះមានចេតនាចង់ផ្ដួលរំលំរដ្ឋាភិបាល ។ លោកនាយករដ្ឋមន្រ្តី ហ៊ុន សែន បានអះអាងថា កម្ពុជាគ្មានរឿងវិបត្តិនយោបាយអ្វីសោះឡើយ ។ លោកថា វិបត្តិនយោបាយពិតប្រាកដ កើតមាននៅប្រទេស ហ្ស៊ីមបាវ៉េ ឯណោះទេ ដែលត្រូវបានក្រុមយោធាទម្លាក់ចេញពីអំណាច ដោយចាប់ឃុំក្នុងផ្ទះ ក្រោយពេលដែលប្រធានាធិបតីរូបនេះ ចង់ឲ្យភរិយារបស់ខ្លួនឡើងបន្តអំណាចពីលោក។ លោកនាយករដ្ឋមន្រ្តី ហ៊ុន សែន ថ្លែងបែបនេះធ្វើឡើងនៅចំពោះមុខកម្មករ កម្មការរិនីជិត ៥ពាន់នាក់នៅកោះពេជ្រថ្ងៃទី១៩ ខែវិច្ឆិកា ឆ្នាំ២០១៧ ម្សិលមិញនេះ ពោលគឺប៉ុន្មានថ្ងៃ ក្រោយសាលដីការរបស់តុលាកាសាលាកំពូលប្រកាសពីការរំលាយគណបក្សសង្រ្គោះជាតិត្រូវបានរំលាយ ។ លោកនាយករដ្ឋមន្រ្តីក៏បានថ្លែងសារឌឺដងដាក់ទៅអោយក្រុមបរទេសដែលបានចចោទកម្ពុជា និងទំព័រសារព័ត៌មានរបស់បរទេសមួយចំនួនដែលតែងតែលើកឡើងថា កម្ពុជាជាប់គាំងវិបត្តិនយោបាយ។ លោកបានអះអាងថា កម្ពុជាពុំមានវិបត្តិនយោបាយណាមួយឡើយ ព្រោះប្រជាពលរដ្ឋទូទៅអាចបំពេញការងារជាប្រក្រតីរបស់ពួកគេបានដូចធម្មតា។ លោកក៏បានថ្លែងបែបគម្រាម និងរំលឹកឡើងវិញថា ប្រសិនបើលោកបានដឹងជាមុន អំពីផែនការរបស់គណបក្សសង្គ្រោះជាតិ ក្នុងការប៉ុនប៉ងផ្តួលរំលំរដ្ឋាភិបាលតាមរយៈរូបភាព «បដិវត្តពណ៌» នោះលោកនឹងបញ្ជាឲ្យក្រុមរបស់លោក សម្លាប់ក្រុមអ្នកប្រឆាំងទាំងអស់នោះចោល តាំងតែពីពេលដែលពួកគេបានដឹកនាំធ្វើបាតុកម្មនៅក្រោយការបោះឆ្នោតថ្នាក់ជាតិឆ្នាំ២០១៣ នៅភ្នំពេញមកម្ល៉េះ។ លោកបានបញ្ជាក់ថា ពិតជាសោកស្ដាយដែលមិនបានសម្លាប់អ្នកទាំងនោះចោល ព្រោះទើបតែបានដឹងអំពីផែនការក្បត់ជាតិ និងផែនការចង់ផ្ដួលរំលំរដ្ឋាភិបាលរបស់លោក ក្រោយពេលដែលការតវ៉ានោះបានបញ្ចប់ទៅហើយ ៕