Breaking News ៖ ព្រឹទ្ធសភាអាមេរិកទាមទារឱ្យក្រសួងការបរទេសខ្លួនត្រួតពិនិត្យទ្រព្យសម្បត្តិរបស់មន្រ្តីរដ្ឋាភិបាលកម្ពុជាដាក់ចូលក្នុងបញ្ជីខ្មៅនៃជនដែលគ្រោះថ្នាក់ បង្កកទ្រព្យសម្បត្តិ និងហាម មិនឲ្យចូលទឹកដីអាមេរិក

ព្រឹទ្ធសភានៃសហរដ្ឋអាមេរិកបានសម្រេចអនុម័តលើសេចក្តីសម្រេច ថ្កោលទោស និងដាក់ទណ្ឌកម្មមកលើរដ្ឋាភិបាលរបស់លោកនាយករដ្ឋមន្រ្តី ហ៊ុន សែន ជាផ្លូវការ ចំពោះការធ្វើទុកបុកម្នេញលើសង្គមស៊ីវិល ប្រព័ន្ធផ្សព្វផ្សាយឯករាជ្យ និងគណបក្សប្រឆាំង ។ ក្នុងសេចក្ដីសម្រេច១របស់ព្រឹទ្ធសភាអាមេរិក ក្នុងចំណោមសេចក្ដីសម្រេចទាំង៨ ស្ថាប័នព្រឹទ្ធសភាអាមេរិកបានសម្រេចទាមទារអោយក្រសួងការបរទេសរបស់សហរដ្ឋអាមេរិកធ្វើសហការគ្នាជាមួយការិយាល័យត្រួតពិនិត្យទ្រព្យសម្បត្តិបរទេស នៃក្រសួងរតនាគារ ពិចារណា ការត្រួតពិនិត្យ ទ្រព្យសម្បត្តិរបស់មន្រ្តីរដ្ឋាភិបាលកម្ពុជាដែលមានអោយដាក់ចូលទៅក្នុងបញ្ជីខ្មៅ នៃជនដែលគ្រោះថ្នាក់របស់សហរដ្ឋអាមេរិក ហើយត្រូវបង្កកទ្រព្យសម្បត្តិ និងហាមឃាត់មិនឲ្យចូលទឹកដីរបស់អាមេរិក ។ ក្រៅពីនេះទៀត ស្ថាប័នព្រឹទ្ធសភាអាមេរិកក៏បានទាមទារឲ្យរដ្ឋាភិបាលកម្ពុជា ធ្វើការដោះលែងលោក កឹម សុខា ដែលជាប្រធានគណបក្សសង្រ្គោះជាតិជាបន្ទាន់ ហើយដោយឥតលក្ខខណ្ឌ។ លើសពីនេះទៀតព្រឹទ្ធសភាអាមេរិកបានទាមទារឲ្យរដ្ឋាភិបាលកម្ពុជា គោរពសិទ្ធិសេរីភាពសារព័ត៌មាន និងសិទ្ធិពលរដ្ឋរបស់ខ្លួន រួមមានសិទ្ធិក្នុងការជួបប្រជុំ សិទ្ធិធ្វើបាតុកម្មនិងតវ៉ា និងសិទ្ធិក្នុងការរិះគន់រដ្ឋាភិបាល ដោយគ្មានការរឹតត្បិត ៕