Hot News ៖ អាជ្ញាធរប្រកាសចាត់វិធានការក្ដៅឈានដល់ចាប់ខ្លួន អ្នកបង្ហោះព័ត៌មានលើហ្វេសប៊ុកមិនពិត ( មានវីដេអូ )

អាជ្ញាធរបានប្រកាសថា នឹងប្រើប្រាស់វិធានការណ៍ក្ដៅ ដើម្បីចាត់ការទៅលើក្រុមណា ឬក៏បុគ្គលណាមួយដែលបានធ្វើអោយប៉ះពាល់ដលល់សន្តិសុខជាតិ និងប៉ះពាល់ដល់សណ្ដាប់ធ្នាប់សាធារណៈតាមរយៈការបង្ហោះព័ត៌មានមិនពិតជាដើម ។ ថ្លែងនៅក្នុងអង្គប្រជុំផ្សព្វផ្សាយស្តីពី ផែនការការពារសន្តិសុខ សាធារណៈ និងសុវត្ថិភាពសង្គម កាលពីរសៀលថ្ងៃទី១៤ ខែវិច្ឆិកា ឆ្នាំ២០១៧ កន្លងទៅនេះ ឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា ដើម្បីធានាសុវត្ថិភាពជាតិ និងប្រជាជន នគរបាលទាំងអស់ត្រូវពង្រឹងស្មារតី ក្តាប់ស្ថានភាព និងវិភាគស្ថានការណ៍ឱ្យបានត្រឹមត្រូវ និងទាន់ពេលវេលា ដើម្បីចាត់វិធានការបង្ការទប់ស្កាត់នូវឧបាយកលរបស់ជនអគតិ ដែលបំផុសបំផុលញុះញង់ឱ្យមានការប្រមូលផ្តុំដើម្បីបង្ករឱ្យមានផលប៉ះពាល់ដល់សន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ។ លោកបានមានប្រសាសន៍បន្តទៀតថា មេក្លោងដែលបំផុសញុះញុងឱ្យមានការប្រមូលផ្តុំបង្កឱ្យមានការប៉ះពាល់ដល់សន្តិសុខ សណ្តាប់ធ្នាប់សាធារណៈ នឹងត្រូវអនុវត្តទៅតាមច្បាប់យ៉ាងម៉ឺងម៉ាត់ ។ ជាមួយគ្នានេះ លោកក៏បានអំពាវនាវដល់មន្រ្តីក្រោមឱវាទទាំងអស់ត្រូវតែអនុវត្តវិធានការឱ្យមានប្រសិទ្ធភាព និងស្របទៅតាមគោលការណ៍ច្បាប់ ដើម្បីធានាបាននូវសុខសន្តិភាព និងការពារឱ្យខានតែបានជនណាដែលចង់ផ្តួលរំលំរាជរដ្ឋាភិបាលស្រប់ច្បាប់ ។ នេះបើយោងតាមការដកស្រង់សម្ដីមកចុះផ្សាយដោយទំព័របណ្ដាញសង្គមហ្វេសប៊ុករបស់ នាយកដ្ឋានប្រឆាំងបទល្មើសបច្ចេកវិទ្យា ចេញផ្សាយកាលពីថ្ងៃទី១៤ វិច្ឆិកា កន្លងទៅ ៕