មេទ័ពកម្ពុជាជាច្រើនបន្ទរតាមលោក ហ៊ុន សែន រឿងលោក សម រង្ស៊ី និយាយអោយកងទ័ពបង្វែកាណុងកាំភ្លើងដាក់រដ្ឋាភិបាលកាលពី៦ឆ្នាំមុន

ក្រុមមេទ័ពជាច្រើនរបស់កម្ពុជាឃើញចេញមុខប្រតិកម្មជាមួយនឹងវិដេអូថ្មីមួយទៀតរបស់លោក សម រង្ស៊ី ដែលត្រូវបានទម្លាយចេញដោយមន្រ្តីរបស់រដ្ឋាភិបាលរឿងនិយាយស្នើដល់កងទ័ពរបស់កម្ពុជាអោយធ្វើការបង្វែកាណុងកាំភ្លើងដាក់ទៅរដ្ឋាភិបាលរបស់លោក ហ៊ុន សែន ដើម្បីជាការប៉ះបោរងើបតស៊ូប្រឆាំង ។ ការចេញមុខប្រតិកម្មរបស់កងទ័ពកម្ពុជាជាបន្តបន្ទាប់ចាប់តាំងពីថ្ងៃទី១៨ តុលា ម្សិលមិញនេះ រហូត មកដល់ថ្ងៃទី១៩ ខែតុលា ថ្ងៃនេះ គឺមិនទាន់អស់នៅឡើយទេ ដោយក្នុងនោះមានទាំងក្រុមកងទ័ពកម្ពុជាជើងទឹក ជើងអាកាស ឬក៏ជើងគោកជាដើម ។ ការចេញមុខនេះ គឺធ្វើឡើងបន្ទាប់ពីលោកនា យករដ្ឋមន្រ្តី ហ៊ុន សែន កាលពីថ្ងៃទី១៨ តុលា ម្សិលមិញនេះ នៅក្នុងកម្មវិធីជួបជុំជាមួយនឹងកម្មករ កម្មការិនី បានចាត់ទុកវីដេអូមួយនេះថា ជាភស្តុតាងថ្មីមួយទៀតដែលអាចបញ្ជាក់បានថា លោក សម រង្ស៊ី បានរៀបចំផែនការក្បត់ដើម្បីផ្ដួលរំលំរដ្ឋាភិបាលស្របច្បាប់របស់លោកដែលចេញពីការ បោះឆ្នោត ។ ប៉ុន្តែយ៉ាងណាក៏ដោយចុះ វីដេអូដែលលោក សម រង្ស៊ី បានធ្វើការអំពាវនាវដល់កងទ័ពកម្ពុជាអោយបង្វែរកាណុងកាំភ្លើងដាក់ទៅរដ្ឋាភិបាលនោះ មិនមែនជាវីដេអូថ្មីថ្មោងដែលទើបនឹងធ្វើឡើងនោះទេ ប៉ុន្តែវីដេអូ ដែលអតីតប្រធានគណបក្សសង្រ្គោះជាតិធ្វើឡើងនោះ គឺនៅក្រៅប្រទេសចាប់តាំងពីឆ្នាំ២០១១ មកម្លេះ គឺគ្រាដែលលោក សម រង្ស៊ី នៅជាប្រធានគណបក្ស សម រង្ស៊ី នៅឡើយ ហើយក៏ជាពេលវេលាមុនពេលដែលបង្កើតគណបក្សសង្រ្គោះជាតិ បើសរុបមកដល់ថ្ងៃនេះ គឺមានរយៈពេលចូលជាង៦ឆ្នាំទៅហើយ ។ ការថ្លែងនាពេលនោះលោក សម រង្ស៊ី បានបញ្ជាក់អោយដឹងថា មានតែការបង្វែរកាណុងកាំភ្លើងផ្ដួលរលំរបបដឹកនាំផ្ដាច់ការរបស់លោកនាយករដ្ឋមន្រ្តី ហ៊ុន សែន ទេ ទើបអាចបញ្ចប់របបផ្ដាច់ការនៅកម្ពុជាបាន។ យ៉ាងណាក៏ដោយ ក្រោយវីដេអូនេះ បានបង្ហោះនៅលើហ្វេសប៊ុក ដែលគេអោយដឹងថា ជា ការទទួលបានពីមន្រ្តីរដ្ឋាភិបាលនោះ កងទ័ព និងមន្រ្តីសំខាន់ៗជាច្រើនរបស់កម្ពុជាបានចេញមុខមក ប្រតិកម្ម និងប្រកាសថ្កោលទោសលើលោក សម រង្ស៊ី ៕