លោក សម រង្ស៊ី ៖ ចាប់តាំងពីឆ្នាំ១៩៩៨ មក កម្ពុជាសុទ្ធតែរៀបចំការបោះឆ្នោតក្លែងក្លាយដើម្បីបន្លំអោយលោក ហ៊ុន សែន បន្តដឹកនាំអំណាច

អត្ថបទព័ត៌មានមួយនេះ យើងខ្ញុំបានចម្លងទាំងស្រុងចេញពីវេបសាយរបស់វិទ្យុសម្លេងព្រះសង្ឃឯករាជ្យ ៖ អតីតប្រធានគណបក្សសង្រ្គោះជាតិ លោក សម រង្ស៊ី បានចេញមុខថ្លែងបវិហាររិះគន់ខ្លាំងៗជាថ្មីម្ដងទៀតទៅកាន់រដ្ឋាភិបាលរបស់លោកនាយករដ្ឋមន្រ្តី ហ៊ុន សែន ពាក់ព័ន្ធនឹងការដឹកនាំអំណាចអស់រយៈពេលជាច្រើនអាណត្តិកន្លងមកនេះ ។ លោក សម រង្ស៊ី បានចោទប្រកាន់ទៅលើរដ្ឋាភិបាលរបស់គណបក្សប្រជាជនថា បានរៀបចំការបោះ ឆ្នោតក្លែងក្លាយអស់រយៈពេលជាច្រើនអាណត្តិ ដើម្បីអោយលោក ហ៊ុន សែន អាចបន្តធ្វើការដឹកនាំ ប្រទេសទៅមុខទៀត ។ លោក សម រង្ស៊ី បន្តថា អំណាចដែលលោកនាយករដ្ឋមន្រ្តី ហ៊ុន សែន អាច ធ្វើជាអ្នកដឹកនាំប្រទេសរហូតមកដល់សព្វថ្ងៃនេះ ពុំមែនកើតឡើងដោយសារការបោះឆ្នោតត្រឹមត្រូវ ឬក៏យុត្តិធម៌នោះទេ ប៉ុន្តែជាអំណាចដែលកើតឡើងតាមរយៈការប្លន់ពីប្រជានុរាស្រ្តតែប៉ុណ្ណោះ ។ លោក សម រង្ស៊ី ថ្លែងបែបនេះ ៖ « ហើយជាបន្តបន្ទាប់គាត់ (លោក ហ៊ុន សែន ) បានរៀបចំអោយ មានការបោះឆ្នោតក្លែងក្លាយ ពីព្រោះក្រោយពីរដ្ឋប្រហារ គាត់បានប្លន់អំណាចបានពេញលេញហើយ គាត់រៀបចំអោយមាន គជប ចាប់ពីឆ្នាំ១៩៩៨ ហើយចាប់ពីឆ្នាំ១៩៩៨ គឺបោះឆ្នោតក្លែងក្លាយទាំង អស់ គឺលួចបន្លំសន្លឹកឆ្នោតទាំងអស់ » ។ ការថ្លែងលើកឡើងរបស់លោក សម រង្ស៊ី យ៉ាងដូច្នេះ ធ្វើឡើងនៅក្នុងបទសម្ភាសន៍ជាមួយនឹងទូរទស្សន៍អនឡាញរបស់អាស៊ីសេរី ផ្សាយចេញកាលពីយប់ថ្ងៃទី១៨ ពោលគឺក្រោយពេលដែលលោ កនាយករដ្ឋមន្រ្តី ហ៊ុន សែន បានប្រកាសថា លោកអាចឡើងកាន់កាប់អំណាចជានាយករដ្ឋមន្រ្តីមក ទល់នឹងថ្ងៃនេះបាន គឺដោយសារតែការបោះឆ្នោតផ្ដល់ទំនុកចិត្តពីសំណាក់មជ្ឈដ្ឋានប្រជាពលរដ្ឋខ្មែរ មិនមែនជាការឡើងតាមអ្វីផ្សេងនោះទេ ។ ប៉ុន្តែផ្ទុយពីលោក ហ៊ុន សែន លើកឡើង លោក សម រង្ស៊ី បានចោទប្រកាន់លោក ហ៊ុន សែន ថា មិនដែលបានបោះឆ្នោតអោយត្រឹមត្រូវនោះទេ ពោលគឺគ្រាន់តែរៀបចំការបោះឆ្នោតដើម្បីអោយតែ មានប៉ុណ្ណោះ តែការបោះឆ្នោតទាំងនោះគឺមិនយុត្តិធម៌ ហើយក៏មិនមានតម្លាភាពដែរ។ លោកបន្តថា លោក ហ៊ុន សែន មានតែការប្លន់សន្លឹកឆ្នោតប៉ុណ្ណោះ ទើបអាចបន្តអំណាចមកដល់សព្វថ្ងៃនេះបាន ។ លោក សម រង្ស៊ី ដែលកំពុងនិរទេសខ្លួនរស់នៅឯនាយសមុទ្រនៅឡើយនោះ បានរំលឹកឡើងវិញថា នៅមុនឆ្នាំ១៩៩៨ លោក ហ៊ុន សែន បានប្លន់អំណាចម្ដងទៅហើយ តាមរយៈការធ្វើរដ្ឋប្រហារនាពេ លនោះ ។ បើតាមលោក សម រង្ស៊ី ថ្លែងកាលពីយប់មិញនេះបញ្ជាក់អោយដឹងថា ប្រជាពលរដ្ឋមិនដែ លបោះឆ្នោតគាំទ្រអោយលោក ហ៊ុន សែន បានដឹកនាំអំណាចនោះទេ ។ ទោះជាយ៉ាងណាក៏ដោយ នៅក្នុងកម្មវិធីជួបសំណេះសំណាលជាមួយនឹងកម្មករ កម្មការិនី រោងចក្រ កាលពីថ្ងៃទី១៨ តុលា ម្សិលមិញនេះ លោកនាយករដ្ឋមន្រ្តី ហ៊ុន សែន ថ្លែងអះអាងថា អំណាចរបស់ លោកគឺកើតឡើងចេញពីការបោះឆ្នោតត្រឹមត្រូវ ដែលមានពលរដ្ឋភាគច្រើនជាអ្នកគាំទ្រមិនដូចការចោទប្រកាន់ និងការលាបពណ៌ផ្សេងៗនោះទេ ។ ជាងនេះទៀតលោកថែមទាំងអះអាងថា នឹងបន្តកាន់តំណែងជានាយករដ្ឋមន្រ្តីនេះ យ៉ាងហោចណាស់ក៏រយៈពេលចំនួន២អាណត្តិទៀតដែរ ដែលស្មើនឹង១០ឆ្នាំទៀត ។ ការសម្រេចចិត្តរបស់លោ កបែបនេះ លោកធ្លាប់អះអាងថា ដោយសារតែលោកបានមើលឃើញពីស្ថានភាពនយោបាយនៅ កម្ពុជាបច្ចុប្បន្ន ។ លោកក៏ធ្លាប់បានបញ្ជាក់ដែរថា ចំពោះស្ថានភាពនៅកម្ពុជានាពេលនេះ គឺមិនអាច អត់ពីលោកបាននោះទេ ៕