លោក ហ៊ុន សែន ៖ កម្ពុជាគឺមិនវិលទៅរកអតីតកាលវិញឡើយ

អត្ថបទព័ត៌មានមួយនេះ យើងខ្ញុំបានចម្លងចេញទាំងស្រុងចេញពីវេបសាយរបស់វិទ្យុសម្លេងព្រះសង្ឃឯករាជ្យសម្រាប់ថ្ងៃទី២១ ខែតុលា ឆ្នាំ២០១៧ នេះ ៖ លោកនាយករដ្ឋមន្រ្តី ហ៊ុន សែន បានថ្លែងលើកឡើងអោយដឹងថា ប្រទេសកម្ពុជាដែលកំពុងស្ថិតក្រោមការដឹកនាំដោយផ្ទាល់ពីរូបលោកនោះនឹងមិនវិលត្រឡប់ចូលទៅរកអតីតកាលដ៏អាប់អួរវិញនោះទេ ។ លោកនាយករដ្ឋមន្រ្តី ហ៊ុន សែន បានលើកឡើងបញ្ជាក់ថា ទន្ទឹមនឹងកម្ពុជាកំពុងរីករាយជាមួយសន្តិភាព ក៏មានប្រទេសមួយចំនួនកំពុងប្រឈមនឹងសង្រ្គាម និងវិបត្តិជនភៀសខ្លួន ព្រមទាំងការបំផ្លិចបំផ្លាញវិនាសកម្ម។ ហេតុដែលឃើញអតីតកាលកម្ពុជារងគ្រោះ និងមានវិបត្តិខ្លាំងបែបនេះហើយ ទើបលោកបញ្ជាក់ថា កម្ពុជាគឺមិនវិលទៅរកអតីតកាលវិញឡើយ។ លោកបន្ថែមថា ពិតណាស់ សន្តិភាពភាពគឺជាសេចក្តីត្រូវការចាំបាច់បំផុតសម្រាប់មនុស្សជាតិ។ លោកនាយរដ្ឋមន្រ្តី ហ៊ុន សែន ថ្លែងអោយដឹងបែបនេះ ធ្វើឡើងនៅលើបណ្ដាញសង្គមហ្វេសប៊ុករបស់លោកនៅព្រឹកថ្ងៃទី២១ ខែតុលា នេះ ពោលគឺអំឡុងពេលដែលស្ថានការណ៍នយោបាយហាក់ រងការតានតឹង ដោយសារការចាប់ខ្លួនមេបក្សប្រឆាំង និងការគ្រោងរំលាយបក្សប្រឆាំង ។ ជាមួយនឹងការប្រកាសពីតម្លៃនៃសន្តិភាពនេះ លោកនាយករដ្ឋមន្រ្តី ហ៊ុន សែន ក៏បានរំលឹក និងផ្សា ភ្ជាប់តម្លៃមួយនេះទៅនឹងកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ ផងដែរ ។ ប៉ុន្តែកន្លងមកលោកនាយករដ្ឋមន្រ្តីធ្លាប់បានបញ្ជាក់ថា កិច្ចព្រមព្រៀងទីក្រុងប៉ារីសគឺគ្មានប្រសិទ្ធភាព បន្តទៀតនោះទេ ខណៈលោកនៅតែរំលឹកពីការព្រមព្រៀងមួយនេះដដែល ។ លោកនាយករដ្ឋមន្រ្តី នៅព្រឹកមិញនេះបានបញ្ជាក់ថា នៅប៉ុន្មានថ្ងៃខាងមុខនេះ គឺខួបលើកទី ២៦ នៃកិច្ចព្រមព្រៀងសន្តិភាពទីក្រុងប៉ារីសនឹងចូលមកដល់៕