ព្រះអង្គ ប៊ុត ប៊ុនតិញ ៖ បើគិតថា ខ្លួនឯងជារដ្ឋាភិបាលស្របច្បាប់ហើយ ចុះចាំបាច់អីក៏ភ័យអីម្លេះ?

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការ លើកឡើងពីការក្រាញអំណាច និងការប្រកាសកម្ចាត់ដៃគូរនយោបាយពីសំណាក់រដ្ឋាភិបាលបក្សប្រជាជន ។ ព្រះអង្គ ប៊ុត ប៊ុនតិញ បន្តថា នៅអំឡុងពេលដែលស្ថានការណ៍នយោបាយនៅកម្ពុជាមានភាពតានតឹ ងនៅឡើយ អ្នកនាំពាក្យគណបក្សកាន់អំណាច សមាជិក ឬក៏អ្នកគាំទ្រទាំងនោះ តែងថ្លែងប្រាប់ទៅ គណបក្សប្រឆាំងវិញថា ខ្លួនជាគណបក្សកាន់អំណាចដែលដឹកនាំរដ្ឋាភិបាលស្របច្បាប់ ពោលគឺចង់ បង្ហាញថា ខ្លួនបោះឆ្នោតដោយពលរដ្ឋដើម្បីបានឡើងកាន់អំណាច ។ ប៉ុន្តែព្រះអង្គ ប៊ុត ប៊ុនតិញ បានបញ្ជាក់ និងមានព្រះថេរដីការចោទសួរទៅវិញថា បើសិនជាដឹងថា រដ្ឋាភិបាលរបស់ខ្លួនជារដ្ឋាភិបាលស្របច្បាប់ទៅហើយនោះ ចុះចាំបាច់អ្វីដែលត្រូវខ្លាចគេ និងភ័យស្លន់ស្លោរដូចមានអ្នកកំពុងប្លន់អំណាចបន្ត ។ ព្រះអង្គអោយដឹងបែបនេះ ៖ « បើអាត្មាមើលឃើញថា បើគណបក្សនឹងវាស្របច្បាប់ ហើយរដ្ឋាភិបាលនឹងវាស្របច្បាប់ ចាំពិបាកទៅភ័យបារម្ភអីដល់ម្លឹង ? ចំរើនពរ យើងអត់ចាំពិបាកទៅភ័យព្រួយ រហូតដល់ទៅប្រើប្រាស់អំណាចរបស់រដ្ឋ ឬស្ថាប័នរបស់រដ្ឋនឹង ចេញមកប្ដេជ្ញាការពារ ចេញមកការពារត្រូលហ៊ុនដល់ម្លឹងទេ បើសិនជាខ្លួននឹងស្របច្បាប់ » ។ ព្រះថេរដីការលើកឡើងរបស់ព្រះអង្គ ប៊ុត ប៊ុនតិញ យ៉ាងដូច្នេះ ធ្វើឡើងតាមរយៈការផ្សាយបន្តផ្ទាល់ ចេញពីគណនីហ្វេសប៊ុករបស់ព្រះអង្គ កាលពីយប់ថ្ងៃទី២៣ តុលា យប់មិញនេះ នៅខណៈដែលព្រះ អង្គកំពុងមានព្រះវត្តមានគង់នៅលើទឹកដីសហរដ្ឋអាមេរិកនៅឡើយ ។ ជាមួយនឹងការរិះគន់លើការប្រកាសរបសគណបក្សកាន់អំណាច ព្រះអង្គ ប៊ុត ប៊ុនតិញ ក៏បានឆ្លៀត ប្រាប់ទៅបក្សកាន់អំណាចថា បើយល់ថា ខ្លួនឯងជារដ្ឋាភិបាលស្របច្បាប់មែននោះ ក៏ពុំគួរចាំបាច់អី ដែលត្រូវវាយដៃគូរប្រកួតនយោបាយរបស់ខ្លួនអោយដួលមុនឡើងសង្វៀនបែបនេះទេ ។ ព្រះអង្គបន្ថែមថា រដ្ឋាភិបាលគួរគិតគូរ និងពិចារណាអោយបានស៊ីជម្រៅនៅត្រង់ចំណុចនេះឡើងវិញ ៕