លោក កឹម សុខា អំពាវនាវដល់សហគមន៍អន្តរជាតិជួយកម្ពុជាជាបន្ទាន់

អត្ថបទមួយនេះ យើងខ្ញុំបានចម្លងចេញទាំងស្រុងពិវេបសាយរបស់វិទ្យុសម្លេងព្រះសង្ឃឯករាជ្យ ផ្សាយចេញនៅថ្ងៃទី២៣ តុលា ឆ្ណាំ២០១៧ ។ ប្រធានគណបក្សសង្រ្គោះជាតិ លោក កឹម សុខា ដែលកំពុងស្ថិតនៅក្នុងមន្ទីរឃុំឃាំងត្រពាំងផ្លុងនៅឯខេត្តត្បូងឃ្មុំ បានសរសេរសារលិខិតមួយច្បាប់ចេញពីពន្ធនាគារ អំពាវនាវដល់សហគមន៍អន្តរជាតិ ជួយដល់ប្រទេសកម្ពុជាជាបន្ទាន់ ។ ការអំពាវនាវរបស់លោក កឹម សុខា នេះ ធ្វើឡើងតាមរយៈលិខិតអបអរសាទររបស់លោកជាមួយនឹង ថ្ងៃរំលឹកខួបនៃកិច្ចព្រមព្រៀងសន្តិភាពទីក្រុងប៉ារីស២៣ តុលា ឆ្នាំ១៩៩១ - ២៣ តុលា ២០១៧ នេះ ។ លិខិតដដែលនេះ លោក កឹម សុខា យល់ថា កិច្ចព្រមព្រៀងសន្តិភាពទីក្រុងប៉ារីស គឺជាថ្ងៃដែលនាំ អោយកម្ពុជាអាចបញ្ចប់សង្រ្គាមបាន ។ លោក កឹម សុខា បានបញ្ជាក់ថា មានតែសហគមន៍អន្តរជាតិតែប៉ុណ្ណោះ ជាពិសេសគឺប្រទេសដែលជាហត្ថលេខីនៃកិច្ចព្រមព្រៀងនេះ ដែលអាចជួយអោយកម្ពុជារួចផុតពីវិបត្តិនយោបាយដ៏តានតឹងនាពេលនេះបាន ។ លោកបានបន្តថា ប្រសិនបើប្រទេសជាហត្ថលេខីទាំងនោះ និងភាគីខ្មែរ មិនព្រមរកដោះស្រាយណាមួយដែលសមរម្យដើម្បីដោះស្រាយបញ្ហានាពេលនេះអោយទាន់ពេលវេលានោះទេ កម្ពុជានឹងអាចជួបផលអាក្រក់ ហើយរារាំាងដល់ដំណើរការអភិវឌ្ឍន៍ជាតិដូចដែលកកម្ពុជាជួបប្រទះកាលពីមុនមានកិច្ចព្រមព្រៀងសន្តិភាពនេះ ។ ថ្លែងនៅក្នុងអញ្ជើញបើកការដ្ឋានសាងសង់ ស្ពានបេតុងមួយខ្សែប្រវែងជិត១គីឡូម៉ែត្រ ឆ្លងកាត់ទន្លេសាបពីតំបន់អភិវឌ្ឍន៍ក្រុងរណបជ្រោយចង្វារ ទៅកាន់ផ្លូវជាតិលេខ៥ នៅព្រឹកថ្ងៃទី២៣ ខែតុលា ឆ្នាំ២០១៧ ព្រឹកមិញនេះ លោកនាយករដ្ឋមន្រ្តី ហ៊ុន សែន ក៏បាននិយាយក្រើនរំលឹកពីកិច្ចព្រមព្រៀងសន្តិភាពទីក្រុងប៉ារីស ២៣ តុលា ឡើងវិញ ដែរ ។ ប៉ុន្តែលោកបានបញ្ជាក់ថា ខ្លឹមសារនៃកិច្ចព្រមព្រៀងទីក្រុងប៉ារីស បានរលាយចូលរដ្ឋធម្មនុញ្ញរបស់ជាតិអស់ហើយ។បើតាមលោកនាយរកដ្ឋមន្រ្តី ហ៊ុន សែន ថ្លែងកាលពីព្រឹកមិញនេះអោយដឹងថា ការអំពាវនាវឲ្យមានការកោះប្រជុំប្រទេសហត្ថលេខីកិច្ចព្រមព្រៀងប៉ារីស គឺជារឿងដែលមិនអាចទៅរួចនោះឡើយ។ ការថ្លែងលើកឡើងរបស់លោកនាយករដ្ឋមន្រ្តី ហ៊ុន សែន បែបនេះ ធ្វើឡើង បន្ទាប់ពីលោក សម រង្ស៊ី អតីតប្រធានគណបក្សសង្រ្គោះជាតិ និងប្រជាពលរដ្ឋខ្មែរជាច្រើន ដែលរស់នៅឯនាយសមុទ្រ កាលពីថ្ងៃទី២១ បានប្រមូលផ្ដុំគ្នាបាតុកម្មទាមទារស្នើអោយមានការកោះប្រជុំប្រទេសម្ចាស់ហត្ថលេខីទាំង១៨ជាបន្ទាន់ ដើម្បីស្នើអោយរដ្ឋាភិបាលកម្ពុជាគោរពកិច្ចព្រមព្រៀងសន្តិភាពទីក្រុងប៉ារីស ៕ អត្ថបទមួយនេះ យើងខ្ញុំបានចម្លងចេញទាំងស្រុងពិវេបសាយរបស់វិទ្យុសម្លេងព្រះសង្ឃឯករាជ្យ ផ្សាយចេញនៅថ្ងៃទី២៣ តុលា ឆ្ណាំ២០១៧