ថ្លើមធំ!ផេក១ឈ្មោះសមាគមវៀតណាមមើលងាយអង្គព្រះមហាក្សត្រខ្មែរ បើមិនធ្វើតាមប្រកាដេញទ្រង់ចេញពីរាជបល្ល័ង្គ

អត្ថបទព័ត៌មានមួយនេះយើងខ្ញុំបានចម្លងទាំងស្រុងចេញពីវេបសាយរបស់វិទ្យុសម្លេងព្រះសង្ឃឯករាជ្យ ៖ ផេកហ្វេសប៊ុកមួយដែលមានឈ្មោះថា Hội Người Việt Nam Tại Campuchia សមាគមវៀតណាមនៅកម្ពុជា បានបង្ហាញការមើលងាយដល់អង្គព្រះមហាក្សត្រខ្មែរ ។ ផេកហ្វេសប៊ុកដែលមានឈ្មោះថា ជាសមាគមវៀតណាមមួយនេះ បានសរសេរលើកឡើងលើហ្វេស ប៊ុករបស់ពួកគេនៅថ្ងៃទី២១ តុលា នេះ ដោយបានស្នើទៅអង្គព្រះមហាក្សត្រអោយបើកផ្លូវអោយមានការរំលាយគណបក្សសង្រ្គោះជាតិ ដែលជាគណបក្សប្រឆាំងដ៏ធំមួយនៅកម្ពុជា ៖ « លឺថា ស្តេច សីហមុនី មិនចង់សញ្ញេរំលាយគណៈបក្សក្បត់ជាតិ របស់ជនក្បត់ជាតិ សម រង្សី និង កឹម សុខា » ។ ហ្វេសប៊ុកដដែលនេះបានសរសេរបន្តដោយបានអះអាងថា ប្រជាជនវៀតណាមពិតជាសាទរជាមួយ នឹងវិសោធនកម្មច្បាប់ទាំង៤ដែលស្នើឡើងអោយសមាជិកសភាមកពីគណបក្សកាន់អំណាច ។ សេចក្តីស្នើច្បាប់ចំនួន៤ ដែលពាក់ព័ន្ធនឹងការរំលាយគណបក្សនយោបាយ ដែលត្រូវបានសភាពេញអង្គបានអនុម័តនៅថ្ងៃទី១៦ ខែតុលា ឆ្នាំ២០១៧ មាន ៖ ១៖ វិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ២៖ វិសោធនកម្មច្បាប់ស្តីពីការបោះឆ្នោតជ្រើសតាំងព្រឹទ្ធសភា ៣៖ វិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ/សង្កាត់ ៤៖ វិសោធនកម្ម ច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ។ ៖ « ប្រជាជនខ្មែរភាគច្រើន រួមនិងប្រជាជនវៀតណាម ស្នើអោយ ព្រះអង្គ នរោត្តម សីហមុនី សញ្ញេលើច្បាប់ទាំងបួន ឬក៏បើកផ្លូវឲ្យមានអ្នកសញ្ញេជំនួស ដើម្បីរំលាយគណៈបក្សសង្រ្គោះជាតិ ដែលប្រជាជនចាត់ទុកថា ជាគណៈបក្សក្បត់ជាតិ ដែលឃុបឃិតមានគំរោងផ្តួលរំលំរដ្ឋាភិបាលស្របច្បាប់ ដែលតែងតែញោះញង់ ប្រកាន់ពូជសាសន៍ បង្ករចលាចលអសន្តិសុខដល់សង្គមកម្ពុជាយើង បើមិនដូច្នុះទេ យើងទាមទារឲ្យស្តេច សីហមុនី ចុះចេញពីរាជបល្លង្គ ហើយមកនៅក្រោមឪវាទរបស់សម្តេច ហ៊ុន សែន ដូចស្តេច នរោត្ដម រណរីទ្ធិ វិញ ដើម្បីឲ្យប្រទេសមានសន្តិភាព និងការអភិវឌ្ឍន៍។សូមបញ្ជាក់ថា អ្វីដែលសមាគមយើងប្រកាសហើយពីមុនៗមក តែងតែកើតឡើងជាការពិត។ ដូច្នេះសូមស្តេច សីហមុនី ពិចារណាសារជាថ្មី » ។ នេះមិនមែនជារឿងថ្មីឡើយសម្រាប់ផេកហ្វេសប៊ុកមួយនេះ ខណៈកន្លងមក ក៏ធ្លាប់បានសរសេរមើល ងាយលើអង្គព្រះមហាក្សត្រខ្មែរជាបន្តបន្ទាប់ផងដែរ ។ ប៉ុន្តែយ៉ាងណាគេក៏មិនទាន់ឃើញមានអាជ្ញាធរខ្មែរណាម្នាក់ចាត់ការលើម្ចាស់ផេកនេះនៅឡើយទេ ខណៈដែលសមាគមវៀតណាមកន្លងមកក៏ធ្លាប់ បានច្រាលចោលដែរថា នេះមិនមែនជាហ្វេសប៊ុករបស់សមាគមវៀតណាមនៅកម្ពុជានោះទេ ៕