from RFI នៅថ្ងៃទី២១ តុលា ២០១៧ នេះ ផេកហ្វេសប៊ុកឈ្មោះ សមាគមវៀតណាមនៅកម្ពុជា បានសរសេរសារមានខ្លឹមសារប្រមាថព្រះមហាក្សត្រខ្មែរ បានធ្វើឲ្យអ្នកប្រើប្រាស់បណ្ដាញសង្គម ដែលជាជនជាតិខ្មែរ ក្ដៅស្លឹកត្រចៀក ។ អ្នកខ្លះបញ្ចេញមតិរិះគន់ ជេរប្រមាថ ត្រឡប់ទៅវិញ ។ ចំណែកមួយចំនួនទៀតអំពាវនាវឲ្យអាជ្ញាធរចាត់វិធានការលើទំព័រហ្វេសប៊ុកនេះ ។
បើតាមសំណេរនៅលើទំព័រហ្វេសប៊ុកឈ្មោះ សមាគមវៀតណាមនៅកម្ពុជា មានខ្លឹមសារអំពាវនាវឲ្យព្រះមហាក្សត្រខ្មែរ ព្រះបាទ នរោត្តម សីហមុនី ឡាយព្រះហត្តលេខាលើសេចក្ដីស្នើវិសោធនកម្មច្បាប់ទាំង៤ ឬបើកផ្លូវឲ្យមានអ្នកចុះហត្ថលេខាជំនួស ដើម្បីរំលាយគណបក្សសង្គ្រោះជាតិ ។ ប្រសិនបើមិនដូច្នោះទេ ទំព័រហ្វេសប៊ុកនេះ ទាមទារឲ្យព្រះមហាក្សត្រខ្មែរ ចុះចេញពីរាជបល្ល័ង្គ ហើយមកនៅក្រោមឱវាទរបស់លោក ហ៊ុន សែន ដើម្បីឲ្យប្រទេសមានសន្តិភាព និងការអភិវឌ្ឍ ។
ឆ្លើយតបនឹងការអំពាវនាវនេះ លោក ខៀវ សុភ័គ អ្នកនាំពាក្យក្រសួងមហាផ្ទៃ បានគូសបញ្ជាក់ប្រាប់វិទ្យុបារាំងអោយដឹងថា នេះមិនមែនជាលើកទី១ទេ ដែលទំព័រហ្វេសប៊ុកសមាគមវៀតណាមនៅកម្ពុជា សរសេរសារប្រមាថព្រះចេស្ដាព្រះមហាក្សត្រខ្មែរយ៉ាងដូច្នេះ ។ ប៉ុន្តែបើតាមការស្រាវជ្រាវកន្លងមករបស់ក្រសួងមហាផ្ទៃ សមាគមនេះ គ្មានបានចុះបញ្ជីត្រឹមត្រូវនៅក្រសួងមហាផ្ទៃទេ ។ ហើយម្ចាស់ទំព័រនេះ ក៏មិនរស់នៅស្រុកខ្មែរដែរ។ ដូច្នេះវាហួសពីសមត្ថកិច្ចរបស់ក្រសួង ក្នុងការចាត់វិធានការ ។ យ៉ាងណាក៏ដោយ លោក ខៀវ សុភ័គ អះអាងថា ក្រសួងមានការប្ដេជ្ញាចិត្តខ្ពស់ណាស់ក្នុងការចាត់ការចំពោះរាល់ការជេរប្រមាថព្រះមហាក្សត្រខ្មែរ ។
សូមរំឭកជូនថា កាលពីខែមីនាដើមឆ្នាំ២០១៧ ផេកហ្វេសប៊ុកឈ្មោះ សមាគមវៀតណាមនៅកម្ពុជា ជារឿយៗ តែងតែបង្ហោះសារដែលមានខ្លឹមសារជេរប្រមាថព្រះមហាក្សត្រខ្មែរ និងលើកតម្កើកគណបក្សប្រជាជនកម្ពុជា។ កាលណោះ សមាគមសហព័ន្ធខ្មែរវៀតណាម នៅព្រះរាជាណាចក្រកម្ពុជា បានចេញសេចក្តីថ្លែងការណ៍មួយ ច្រានចោល ការប្រើប្រាស់ឈ្មោះ សមាគមវៀតណាមនៅកម្ពុជា វាយប្រហារប្រមាថ ទៅលើព្រះមហាក្សត្រកម្ពុជា ។ ក្នុងសេចក្ដីថ្លែងការណ៍កាលពីថ្ងៃទី១៦ ខែមីនានេះ សមាគមសហព័ន្ធវៀតណាមនៅព្រះរាជាណាចក្រកម្ពុជា បានបដិសេធថា ទំព័រហ្វេសប៊ុកនោះ មិនមែនជារបស់ខ្លួនឡើយ ដោយថា សមាគមនេះមិនដែលបង្កើតទំព័រហ្វេសប៊ុកណាមួយឡើយ ។
មតិរិះគន់ប្រតិកម្មយ៉ាងខ្លាំងនៅលើបណ្ដាញសង្គម ប្រជាពលរដ្ឋខ្មែរដែលបានឃើញសារនេះ បានអំពាវនាវឲ្យអាជ្ញាធរ ចាត់វិធានការចំពោះសមាគមនេះ ប៉ុន្តែអ្នកនាំពាក្យក្រសួងមហាផ្ទៃ បានអះអាងប្រាប់វិទ្យុខាងលើថា សមាគមនេះ គ្មានចុះបញ្ជីនៅក្រសួងមហាផ្ទៃទេ ៕
Comments
Post a Comment