ក្រសួងមហាផ្ទៃសម្រេចបិទអង្គការ សហព័ន្ធនិស្សិតបញ្ញវ័ន្តកម្ពុជា ក្រោយប្រធានអង្គការនេះអំពាវនាវឱ្យពលរដ្ឋធ្វើបាតុកម្មការពារបក្សសង្រ្គោះជាតិ

ក្រសួងមហាផ្ទៃ បានចេញសេចក្ដីសម្រេចផ្អាកសកម្មភាពរបស់អង្គការ សហព័ន្ធនិស្សិតបញ្ញវ័ន្តកម្ពុជា បន្ទាប់ពីប្រធានអង្គការនេះ បានប្រកាសអំពាវនាវដល់សមាជិក សមាជិក ព្រះសង្ឃ និងពលរដ្ឋខ្មែរទូទាំងប្រទេស ធ្វើបាតុកម្មប្រឆាំងនឹងការប៉ន់ប៉ងរំលាយគណបក្សសង្រ្គោះជាតិ ។ នៅក្នុងសេចក្ដីជូនដំណឹងរបស់ក្រសួងមហាផ្ទៃ បានបញ្ជាក់ទៅប្រធានអង្គការនេះថា បានធ្វើការងារ បំពានទៅនឹងច្បាប់ស្ដីពីសមាគម និងអង្គការមិនមែនរដ្ឋាភិបាល ត្រង់មាត្រា ២៤ និងអនុវត្តបំពានមាត្រា ៦ នៃលក្ខន្តិកៈអង្គការដែលតម្កល់ទុកនៅក្រសួងមហាផ្ទៃ ព្រមទាំងមិនបានបំពេញលក្ខខណ្ឌ តម្រូវតាមការកំណត់ដោយបទប្បញ្ញត្តមាត្រា១០ និងមាត្រា ២៥ នៃច្បាប់ស្ដីពីសមាគមនិងអង្គការមិនមែនរដ្ឋាភិបាល ដែលក្រសួងមហាផ្ទៃកំណត់ឱសានវាទអោយត្រឹមថ្ងៃទី៣១ កញ្ញា ឆ្នាំ២០១៧ ។ ប៉ុន្តែយ៉ាងណាក៏ដោយ ការសម្រេចបិទដោយក្រសួងមហាផ្ទៃនេះ គេសង្កេតឃើញថា បានធ្វើឡើង ក្រោយពេល លោក ឡេង សេងហុង ប្រធានសហព័ន្ធនិស្សិតបញ្ញវន្តកម្ពុជាបានចេញលិខិតមួយជាផ្លូវការ អំពាវនាវទៅដល់សមាជិកសមាជិការបស់ខ្លួននៅទូទាំងប្រទេស និងអំពាវនាវដល់ប្រជាពលរដ្ឋខ្មែរទូទាំងប្រទេស ត្រៀមខ្លួនធ្វើបាតុកម្មប្រឆាំងជាមួយនឹងការប៉ន់ប៉ងរំលាយគណបក្សសង្រ្គោះជាតិពីសំណាក់រដ្ឋាភិបាលគណបក្សប្រជាជនកម្ពុជា ។ លើសពីនេះទៀត ពាក់ព័ន្ធនឹងអំពាវនាវអោយធ្វើបាតុកម្មនេះ លោក ឡេង សេងហុង ក៏ត្រូវបានតុលាការសាលាដំបូងរាជធានីភ្នំពេញ បានចេញលិខិតកោះហៅ ឲ្យចូលខ្លួនទៅឆ្លើយបំភ្លឺនៅអគ្គស្នងការនគរបាលជាតិ ឲ្យបានមុនថ្ងៃទី៣០ ខែវិច្ឆិកា ជុំវិញករណី ញុះញុងឲ្យប្រព្រឹត្តបទឧក្រិដ្ឋជាអាថ៌ ៕ អត្ថបទព័ត៌មានមួយនេះ យើងខ្ញុំបានចម្លងចេញទាំងស្រុងពីវេបសាយរបស់វិទ្យុសម្លេងព្រះ សង្ឃឯករាជ្យដែលផ្សាយចេញនៅរសៀលថ្ងៃទី៣១ ខែតុលា ឆ្នាំ ២០១៧ នេះ ៕