អាមេរិកទាមទារអោយរដ្ឋាភិបាលលោក ហ៊ុន សែន ដោះលែងលោក កឹម សុខា

រដ្ឋាភិបាលរបស់សហរដ្ឋអាមេរិកតាមរយៈក្រសួងការបរទេសបានប្រកាសទាមទារអោយរដ្ឋាភិបាលកម្ពុជាក្រោមការដឹកនាំដោយគណបក្សប្រជាជនកម្ពុជាដោះលែងលោក កឹម សុខា ប្រធានគណបក្ស សង្រ្គោះជាតិអោយមានសេរីភាពឡើងវិញ ។ តាមរយៈសេចក្ដីថ្លែងការណ៍របស់សហរដ្ឋអាមេរិកដែលធ្វើឡើងកាលពីថ្ងៃទី១៦ តុលា ឆ្នាំ២០១៧ កន្លងទៅនេះ ក្រសួងការបរទេសអាមេរិកលើកឡើងថា ការចាប់ខ្លួនលើមេដឹកនាំកំពូលរបស់គណបក្សប្រឆាំង លោក កឹម សុខា យកទៅឃុំខ្លួននៅមុនការបោះឆ្នោតជាតិជិតចូលមកដល់នេះ គឺជាការប៉ះពាល់យ៉ាងធ្ងន់ធ្ងរទៅដល់ដំណើរការបោះឆ្នោតសកលនៅឆ្នាំ ២០១៨ ក្រោយនេះ ។ រដ្ឋាភិបាលសហរដ្ឋអាមេរិកបានអំពាវនាវបែបសង្ឃឹមថា រដ្ឋាភិបាលកម្ពុជានឹងដោះលែងលោក កឹម សុខា ដើម្បីអាចអោយដឹកនាំគណបក្សសង្រ្គោះជាតិចូលរួមប្រកួតប្រជែងនៅក្នុងការបោះឆ្នោតនាពេលខាងមុខនេះ ប្រកបដោយសេរី ត្រឹមត្រូវ និងយុត្តិធម៌ ។ ជាពិសេសគឺដើម្បីអោយការបោះឆ្នោត នេះអាចទទួលយកបានពីសហគមន៍ជាតិ និងអន្តរជាតិ ។ ក្រសួងការបរទេសក៏បានប្រាប់កម្ពុជាដែរថា ការប្រកួតប្រជែងពិតប្រាកដមានសារៈសំខាន់ចំពោះលទ្ធិប្រជាធិបតេយ្យនិងភាពស្របច្បាប់នៃការបោះឆ្នោតជាតិឆ្នាំ២០១៨។ អាមេរិកប្រាប់កម្ពុជាបន្តថា ប្រវត្ដិសាស្ដ្របញ្ជាក់ថា ការបង្ក្រាបសកម្មភាពនយោបាយស្របច្បាប់នាំឱ្យមានអស្ថិរភាពយូរអង្វែងច្រើនជាងការរយៈពេលខ្លី។ អាមេរិកបានជំរុញឱ្យមន្រ្តីរដ្ឋាភិបាលពិចារណាពីផលប៉ះពាល់ធ្ងន់ធ្ងរនៃចំណាត់ការថ្មីៗរបស់ពួកគេឡើងវិញ។ ទោះជាយ៉ាងណាក៏ដោយ លោកនាយករដ្ឋមន្រ្តី ហ៊ុន សែន បានប្រកាសក្ដែងៗថា រដ្ឋាភិបាលរបស់លោកអាចធ្វើការងារអស់នេះបាន ហើយក៏ពុំចាំបាច់អោយបរទេសចូលមកលូកលាន់កិច្ចការងាររបស់កម្ពុជានោះដែរ ។ លោកនាយករដ្ឋមន្រ្តី ហ៊ុន សែន កាលពីថ្ងៃទី១៨ តុលា ម្សិលមិញនេះ ក្នុងកម្មវិធីជួបជុំជាមួយនឹងកម្មករ កម្មការិនី បានថ្លែងអះអាងថា ការចាប់ឃុំខ្លួនលោក កឹម សុខា ប្រធានគណបក្សសង្រ្គោះជាតិ ដោយសារតែបានប្រព្រឹត្តអំពើក្បត់ជាតិតែប៉ុណ្ណោះ ។ លើសពីនេះទៀតលោកបញ្ជាក់ថា រដ្ឋាភិបាល របស់លោកក៏នឹងមិនងាយលើកលែងអោយដឹងចំពោះបុគ្គលរូបនេះ និងបក្សពួកជាច្រើនទៀតដែល បានជាប់ពាក់ព័ន្ធនឹងផែនការទាំងនេះ ៕