គណបក្សនយោបាយចំនួនពីរចេញលិខិតផ្លូវការប្រកាសមិនទទួលយកអាសនៈរបស់បក្សសង្រ្គោះជាតិ បើបក្សនេះត្រូវបានគេរំលាយមែន

គណបក្សនយោបាយក្រៅរដ្ឋសភាចំនួនពីរដែលទើបនឹងបានបង្កើតឡើងមិនទាន់បានចូលរួមប្រកួតប្រជែងការបោះឆ្នោតថ្នាក់ជាតិនៅឡើយនោះ បានប្រកាសមិនទទួលយកអាសនៈរបស់គណបក្ស សង្រ្គោះជាតិនោះទេ ប្រសិនបើគណបក្សសង្រ្គោះជាតិអាចនឹងត្រូវបានគេរំលាយចោលមែននោះ ។ គណបក្សនយោបាយទាំងពីរនេះ មានគណបក្សប្រជាធិបតេយ្យមូលដ្ឋាន និងគណបក្សអំណាចខ្មែរ ។ គណបក្សទាំងពីរនេះសុទ្ធតែអះអាងថា នឹងមិនទទួលយកនោះឡើយ ចំពោះអាសនៈឃុំ ឬក៏អាស នៈក្រុមប្រឹក្សាឃុំសង្កាត់របស់គណបក្សសង្រ្គោះជាតិ ។ គណបក្សប្រជាធិបតេយ្យមូលដ្ឋានធ្លាប់បានបញ្ជាក់តាមរយៈលិខិតជាផ្លូវការកាលពី២៥ តុលា ការសម្រេចមិនយកអាសនៈរបស់គណបក្សនេះយ៉ាងដូច្នេះ គឺដើម្បីជាការឈរលើគោលការណ៍ប្រជាធិបតេយ្យ សីលធម៌ និងគុណតម្លៃ ។ ចំណែកឯគណបក្សអំណាចខ្មែរវិញនោះមិនបាន បញ្ជាក់ពីជំហរឡើយ ប៉ុន្តែក្នុងលិខិតជាផ្លូវការដែលធ្វើឡើងកាលពីម្សិលមិញនេះ ពួកគេថា គាំទ្រនូវ ការលើកតម្កើងនូវលទ្ធិប្រជាធិបតេយ្យសេរីពហុបក្ស ការរក្សាស្ថេរភាព ស្ថេរភាពសង្គម និងយកប្រជាពលរដ្ឋ ប្រទេសជាតិជាធំ ។ លិខិតធ្វើឡើងដោយគណបក្សទាំងពីរនេះធ្វើឡើង ចំពេលដែលស្ថានការណ៍នយោបាយកំពុង ឡើងកម្ដៅ ខណៈដែលគណបក្សកាន់អំណាចប្រកាសចង់រំលាយគណបក្ស ប្រឆាំង តាមច្បាប់ថ្មីដែលត្រូវបានអង្គព្រះមហាក្សត្រឡាយព្រះហស្ថលេខាដាក់អោយប្រើប្រាស់កាលពីថ្មីៗនេះ ។ យ៉ាងណាក៏ដោយ សហគមន៍អន្តរជាតិ និងម្ចាស់ជំនួយធំៗរបស់កម្ពុជា ក៏ដូចជាទីផ្សារអឺរ៉ុបសម្រាប់ការនាំចេញពីកម្ពុជាផងនោះ ក៏បានព្រមានដាក់ទណ្ឌកម្មលើកម្ពុជា ។ លើសពីនេះទៀតម្ចាស់ជំនួយ ដ៏ធំមួយរបស់កម្ពុជា គឺប្រទេសស៊ុយអែត ថែមទាំងព្រមានដកទូតចេញពីកម្ពុជាទៀតផង ក្នុងករណីណាដែល គណបក្សប្រឆាំងត្រូវបានគេរំលាយមែននោះ ៕