លោក ហ៊ុន សែន គម្រាមលោក សម រង្ស៊ី ថា ប្រយ័ត្នស្លាប់បើចង់លេងជាមួយ ហ៊ុន សែន

អត្ថបទព័ត៌មានមួយនេះយើងខ្ញុំបានចម្លងចេញទាំងស្រុងពីវេបសាយរបស់វិទ្យុសម្លេងព្រះសង្ឃឯករាជ្យដែលផ្សាយចេញនៅថ្ងៃទី២៤ ខែតុលា ឆ្នាំ២០១៧ នេះ ។ លោកនាយករដ្ឋមន្រ្តី ហ៊ុន សែន បានផ្ដាំផ្ញើទៅបុគ្គលដែលលោកបានចាត់ទុកថា ជាក្រុមក្បត់ជាតិនោះ អោយនៅអោយស្ងៀមកុំចង់មកលោតជាមួយនឹងរូបលោកអោយសោះ ។ លោកនាយករដ្ឋមន្រ្តីបានថ្លែងបញ្ជាក់ថា លោកមានកងកម្លាំងប្រដាប់អាវុធគ្រប់គ្រាន់នឹងអាចកម្ចាត់រាល់បុគ្គលដែលក្បត់ជាតិទាំងនោះបាន ពោលគឺមិនចាំបាច់អោយនៅបន្តធ្វើការងាក្បត់ជាមួយនឹងប្រ ទេសជាតិរបស់ខ្លួនសោះឡើយ ។ លោកក៏បានផ្ដាំផ្ញើផងដែរទៅអតីតប្រធានគណបក្សសង្រ្គោះជាតិ លោក សម រង្ស៊ី ថា មិនបាច់ចង់ហក់លោតជាមួយនឹងរូបលោកនោះទេ បើមិនចង់ស្លាប់នោះ ។ ប៉ុន្តែ បើពិតជាចង់លោតជាមួយនឹងលោកមែននោះ គួរណាតែត្រៀមក្ដាមឈូសទុកអោយហើយចុះ ។ លោក ថ្លែងបែបនេះ ៖ « អ្នកមិនទាន់មានលទ្ធផលផ្ដួលរំលំ ហ៊ុន សែន តាមកម្លាំងយោធាទេ បើអ្នក ហ៊ានលោត អ្នកហ៊ានស្លាប់ ធ្វើក្ដាមឈូសទុកអោយហើយ បើអ្នកចង់លេង ។ ប៉ុន្តែបើអ្នកលេងមិនឈ្នះ ហ៊ុន សែន គឺអ្នកមានតែកន្លែងមួយគត់ គឺគុក ព្រោះគុកគេសម្រាប់ដាក់អាមនុស្សធ្វើខុស ហើយកាន់តែដាក់អោយធ្ងន់ធ្ងរទៀត សម្រាប់អាអ្នកក្បត់ជាតិ » ។ លោកនាយករដ្ឋមន្រ្តី ហ៊ុន សែន ថ្លែងបែបនេះ ធ្វើឡើងនៅក្នុងពិធីមួយកន្លែងកាលពីម្សិលមិញនេះ និងដើម្បីជាការឆ្លើយតបរបស់លោកទៅនឹងលលោក សម រង្ស៊ី អតីតប្រធានគណបក្សសង្រ្គោះជាតិ ដែលត្រូវបានបែកធ្លាយវិដេអូថ្មីមួយបង្ហោះដោយវេបសាយគាំទ្ររដ្ឋាភិបាល ។ ក្នុងវីដេអូដែល លោក ហ៊ុន សែន ប្រតិកម្មនោះ ដោយសារបានឃើញលោក សម រង្ស៊ី អំពាវនាវដល់កងម្លាំងប្រដាប់ អាវុធបង្វែរកាណុងកាំភ្លើងដាក់ទៅរដ្ឋាភិបាលលោក ហ៊ុន សែន ក្រោមហេតុផលថា ដើម្បីបញ្ចប់ការដឹកនាំអំណាចតាមបែបផ្ដាច់ការនៅកម្ពុជា ។ លោកនាយករដ្ឋមន្រ្តី ហ៊ុន សែន បានអះអាងថា លោកមិនដែលខ្លាចលោក សម រង្ស៊ី សោះឡើយ ពីព្រោះថា លោកក៏មានកម្លាំងគ្រប់គ្រាន់ដើម្បីទប់ទល់ដែរ ។ លោកថា រាល់ការចង់លេង ឬចង់សាក ជាមួយនឹងលោក លោកពិតជាអាចកំដរបាន ប៉ុន្តែដៃគូរដែលលេងជាមួយនឹងលោកនោះ ត្រូវតែត្រៀមខ្លួនគុក ឬក៏ត្រៀមក្ដាមឈូសទុកអោយហើយក៏ជាការល្អ ។ ថ្លែងនៅក្នុងពិធីដដែលនេះ លោកនាយករដ្ឋមន្រ្តីជាង៣ទស្សវត្តន៍រូបនេះក៏មិនភ្លេចរំលឹកឡើងវិញនោះទេ ចំពោះគម្រោងការរបស់លោក ដែលចង់កម្ចាត់ចោលមនុស្សមួយចំនួនដើម្បីផលប្រយោជន៍ ប្រជាពលរដ្ឋទូទាំងនគរ ។ លោកថា មនុស្សមួយចំនួនគួរនឹងអាចត្រូវកម្ចាត់ចោល ប្រសិនបើមនុស្ស ទាំងនោះបង្កអោយមានបញ្ហាអសន្តិសុខសង្គម និងប៉ះពាល់ដល់តម្លៃសន្តិភាពដែលក្រុមរបស់លោក បានចំណាពេលកសាងអស់រយៈពេលរាប់ឆ្នាំកន្លងមកនេះ ៕