លោក កឹម សុខា អំពាវនាវអោយសមាជិកបក្សរក្សាគោលជំហរអោយបានក្នុងគ្រាលំបាកនេះ

ប្រធានគណបក្សសង្រ្គោះជាតិ លោក កឹម សុខា ដែលកំពុងជាប់ឃុំនៅក្នុងពន្ធនាគារត្រពាំងផ្លុងបានធ្វើការអំពាវនាវដល់សមាជិករបស់គណបក្សរក្សាគោលជំហរអោយបាន នៅក្នុងគ្រាដែលកំពុងជាប់ប្រទះនឹងការលំបាកបែបនេះ ។ ការអំពាវនាវរបស់លោក កឹម សុខា នេះ នៅខណៈដែលប្រធានគណបក្សកាន់អំណាចបានគម្រាមពីការរំលាយគណបក្សសង្រ្គោះជាតិ និងបានអំពាវនាវដល់សមាជិកនៃគណបក្សសង្រ្គោះជាតិមួយនេះ អោយចុះចូល ជាមួយនឹងគណបក្សរបស់ខ្លួននៅមុនពេលដែលគណបក្សនេះនឹងត្រូវរំលាយក្នុងពេលឆាប់ៗខាងមុខ ។ លោកនាយករដ្ឋមន្រ្តី ហ៊ុន សែន ប្រធានគណបក្សប្រជាជនកម្ពុជា កាលពីប៉ុន្មានថ្ងៃមុននេះបានប្រកាសអំពាវនាវដល់សមាជិកគណបក្សសង្រ្គោះជាតិអោយចុះចូលជាមួយនឹងគណបក្សប្រជាជន ប្រសិនបើអ្នកទាំងនោះចង់រក្សាតំណែងរបស់ពួកគេ ។ លោកនាយករដ្ឋមន្រ្តីបានបញ្ជាក់ថា ប្រសិន បើបានចុះចូល នោះតំណែងរបស់អ្នកទាំងនោះនឹងអាចរក្សាបានជាធម្មតា ។ ក្រោយការប្រកាសរបស់លោកនាយករដ្ឋមន្រ្តី ហ៊ុន សែន បែបនេះ ក៏មានសមាជិកគណបក្សសង្រ្គោះជាតិមួយរូបដែលជាតំណាងរាស្រ្តប្រចាំមណ្ឌលខេត្តព្រៃវែងបានសរសេរលិខិតចុះចូលជា មួយនឹងគណបក្សប្រជាជន ដោយសុំរួមរស់ជាមួយ។ ក្រៅពីនេះក៏មានសមាជិកថ្នាក់មូលដ្ឋាន របស់គណបក្សសង្រ្គោះជាតិតាមខេត្តមួយចំនួនសរសេរលិខិតសុំចុះចូលជាមួយនឹងបក្សប្រជាជននេះផងដែរ ។ ទោះជាយ៉ាងណា លោក កឹម សុខា ដែលកំពុងជាប់ឃុំនៅក្នុងពន្ធនាគារបានអំពាវនាវដល់សមាជិកគណបក្សរបស់ខ្លួនថា ត្រូវតែរួមគ្នារក្សាគោលជំហរអោយបានក្នុងគ្រាដ៏លំបាកមួយនេះ ។ នេះបើយោងតាមការបញ្ជាក់ពីកញ្ញា កឹម មនោវិទ្យា ដែលជាកូនស្រីបង្កើតរបស់លោក កឹម សុខា ដែលអះ អាងថា ជាការផ្ដាំផ្ញើពីលោក កឹម សុខា ដោយផ្ទាល់ ៖ « ថ្ងៃនេះម្តាយខ្ញុំបានទៅសួរសុខទុក្ខឪពុកខ្ញុំក្នុងពុន្ធនាគារ គាត់មានស្មារតីរឹងមាំ គាត់ផ្តាំថ្លែងអំណរគុណដល់់សហការីទាំងអស់នូវការខំប្រឹងប្រែងតស៊ូជាមួយគ្នាក្នុងគ្រាដ៍លំបាកនេះ » ។ តាមសំណេរសារលើហ្វេសប៊ុកនៅថ្ងៃអាទិត្យនេះ ដែលសរសេរដោយកញ្ញា កឹម មនោវិទ្យា អោយដឹងថា លោក កឹម សុខា ដែលកំពុងជាប់នៅក្នុងពន្ធនាគារជឿជាក់ ប្រសិនបើអាចតស៊ូផុតពីគ្រាដ៏លំបាកក្នុងគ្រានេះបាន គណបក្សសង្រ្គោះជាតិប្រាកដជានឹងអាចសម្រេចគោលដៅ ៕