លោក សម រង្ស៊ី អំពាវនាវដល់សមាជិកបក្សប្រឆាំងរងសម្ពាធខ្លាំងចេញក្រៅប្រទេស

អតីតប្រធានគណបក្សសង្រ្គោះជាតិ លោក សម រង្ស៊ី បានចេញមុខជាថ្មីម្ដងទៀត អំពាវនាវដល់អ្នក ដែលរងសម្ពាធខ្លាំងពីក្រុមអាជ្ញាធរអោយចាកចេញទៅក្រៅប្រទេស ។ តាមរយៈវីដេអូឃ្លីបរបស់លោក សម រង្ស៊ី មានរយៈពេលជិត១០នាទី បង្ហោះទៅក្នុងបណ្ដាញសង្គម ហ្វេសប៊ុករបស់លោក កាលពីយប់ថ្ងៃទី៣០ ខែតុលា លោក សម រង្ស៊ី យល់ថា ប្រសិនបើអ្នកតស៊ូទាំ ងនោះពិបាកទប់ទល់ខ្លាំងពេក មិនអាចធ្វើកិច្ចការងារអ្វីបាន ហើយប្រឈមនឹងសម្ពាធដែលជាសុវត្ថិភាពផ្ទាល់ខ្លួននោះ គួរណាតែចាកចេញទៅក្រៅប្រទេស ដើម្បីស្វែងរកអ្វីដែលយើងអាចធ្វើបាន ៖ « តែបើថាពិបាកទប់ទល់មិនបាន ពីព្រោះសម្ពាធគេ គម្រាមកំហែងគេខ្លាំងពេក មិនអាចធានាសុវត្ថិភាពបាន សូមបងប្អូនចេញមកក្រៅប្រទេស » ។ តាមរយៈវីដេអូឃ្លីប របស់លោកដដែលនេះ លោក សម រង្ស៊ី សង្កត់ធ្ងន់ថា មិនមែនតម្រូវ ឬផ្ដោតសំខាន់តែទៅលើថ្នាក់ដឹកនាំកំពូលរបស់គណបក្សសង្រ្គោះជាតិប៉ុណ្ណោះទេ ដែលលោកកំពុងចង់ និយាយដល់នោះ ប៉ុន្តែលោកក៏សម្ដៅទៅដល់ថ្នាក់ដឹកនាំមូលដ្ឋាន និងសមាជិក សមាជិកាគ្រប់ជាន់ ថ្នាក់នៃគណបក្សសង្រ្គោះជាតិផងដែរ ៖ « ខ្ញុំមិនមែននិយាយតែថ្នាក់ដឹកនាំកំពូលទេ ប៉ុន្តែសមាជិក ក្រុមប្រឹក្សារាជធានី សមាជិក ក្រុមប្រឹក្សាខេត្ត សមាជិក ក្រុមប្រឹក្សាស្រុក សូមបងប្អូនចេញមក កុំឱ្យ គេគៀបសង្កត់យើងបាន » ។ បើទោះបីជាលោក សម រង្ស៊ី បានអំពាវនាវដល់សមាជិកនៃគណបក្សសង្រ្គោះជាតិដែលប្រឈមនឹង សុវត្ថិភាពផ្ទាល់ខ្លួនខ្លាំងក៏ពិតមែន ប៉ុន្តែលោក សម រង្ស៊ី ក៏បានរំលឹកដល់ថ្នាក់ដឹកនាំ និងសមាជិកមួយនេះផងដែរថា អោយរក្សគោលជំហរអោយបាន ពោលគឺកុំចាញ់បោកល្បិចបំបែកបំបាក់របស់ក្រុមដៃលជាដៃគូរប្រកួតអោយសោះ ។ លោក សម រង្ស៊ី ដែលកំពុងនិរទេសខ្លួនរស់នៅក្រៅប្រទេស ហើយដែលកំពុងតែធ្វើដំណើរទៅទស្សនៈកិច្ចនៅឯទីក្រុងរ៉ូម ប្រទេសអ៊ីតតាលី នៅឡើយនោះ បានបង្ហាញក្ដីជឿជាក់យ៉ាងខ្លាំងថា គណបក្សសង្រ្គោះជាតិមិនអាចរំលាយដូចការអះអាងរបស់រដ្ឋាភិបាលគណបក្សប្រជាជនបាននោះទេ ។ ការថ្លែងសារនយោបាយសំអាងរបស់លោកបែបនេះ ក្រោមហេតុផលថា ដោយសារសហគមន៍អន្តរ ជាតិជុំវិញកម្ពុជាកំពុងឃ្លាំមើលយ៉ាងយកចិត្តទុកដាក់ ។ លោក សម រង្ស៊ី ក៏បានបញ្ជាក់ដែរថា ប្រសិនបើជនណា ឬក៏គណបក្សនយោបាយណាមួយហ៊ានរំលាយគណបក្សសង្រ្គោះជាតិចោលមែននោះ អ្នកនោះឯងនឹងរលាយដោយខ្លួនឯង ៕ អត្ថបទព័ត៌មានមួយនេះ យើងខ្ញុំបានចម្លងចេញទាំងស្រុងពិវេបសយរបស់វិទ្យុសម្លេងព្រះសង្ឃឯករាជ្យ ដែលផ្សាយចេញនៅរសៀលថ្ងៃទី៣១ ខែតុលា ឆ្នាំ ២០១៧ នេះ ៕