ព្រះមហាក្សត្រត្រាស់បង្គាប់លើកលែងទោសលោក ហុង សុខហួរ អតីតសមាជិកព្រឹទ្ធសភាបក្ស សម រង្ស៊ី

ព្រះមហាក្សត្របានចេញព្រះរាជក្រឹត្យ ត្រាស់បង្គាប់ អោយលើកលែងទោស លោក ហុង សុខហួរ អតីតសមាជិកព្រឹទ្ធសភាមកពីគណបក្ស សម រង្ស៊ី ។ ក្នុងព្រះរាជក្រឹត្យរបស់អង្គព្រះមហាក្សត្រដែលត្រូវបានផ្សព្វផ្សាយនៅថ្ងៃទី២៥ តុលា នេះ បានអោយ ដឹងថា ការសម្រេចលើកលែងទោសនេះ បន្ទាប់ពីលោក ហុង សុខហួរ បានធ្វើលិខិតសុំទោសលោកនាយករដ្ឋមន្រ្តី ហ៊ុន សែន ចំពោះកំហុសឆ្គងរបស់ខ្លួន ។ នៅក្នុងលិខិតសុំទោសរបស់ លោក ហុង សុខហួរ ដែលត្រូវបានទំព័រសារព័ត៌មានយកមកផ្សាយនៅថ្ងៃនេះបានបង្ហាញការសោកស្តាយ ដោយបានប្រព្រឹត្តមិនត្រឹមត្រូវចំពោះ នយោបាយរបស់ លោក ហ៊ុន សែន ក្នុងដំណើរការបោះបង្គោលព្រំដែន ដូចជាយកឯកសារមិនត្រឹមត្រូវមកប្រើប្រាស់ក្នុងបញ្ហាព្រំដែន ជាហេតុនាំឱ្យមានការភាន់ច្រឡំ ក្នុងមតិសាធារណៈ លើគោលនយោបាយ និងការអនុវត្តរបស់រាជរដ្ឋាភិបាល។ លិខិតដដែលនេះបានស្នើដល់លោកនាយករដ្ឋមន្រ្តី ហ៊ុន សែន ពិចារណាដោយសក្តីយោគយល់ ដើម្បីស្នើសុំព្រះមហាក្សត្រប្រោសព្រះរាជទាន លើកលែងទោសដល់រូបលោក ឱ្យមានសេរីភាពជួបជុំក្រុមគ្រួសារ និងបានចេញទៅព្យាបាលជំងឺប្រចាំកាយនៅប្រទេសបារាំងដោយក្តីអនុគ្រោះ។ លោក ហុង សុខហួរ ត្រូវបានសមត្ថកិច្ចឃាត់ខ្លួន កាលពីពាក់កណ្តាលខែសីហា ឆ្នាំ២០១៥ បន្ទាប់ពីលោកបានបង្ហោះនូវឯកសារក្លែងក្លាយមួយ ស្តីពីសន្ធិសញ្ញាព្រំដែនកម្ពុជា-វៀតណាម នៅលើទំព័រ Facebook របស់លោក សម រង្ស៊ី អតីតប្រធានគណបក្សសង្រ្គោះជាតិ ។ លោក ហុងសុខហួរ ត្រូវបានតុលាការចោទប្រកាន់ចំនួន៣បទល្មើស រួមមានបទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និង បទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធការក្លែងសន្ធិសញ្ញាព្រំដែនកម្ពុជា-វៀតណាម បង្ហោះក្នុងផេកហ្វេសប៊ុករបស់ លោក សម រង្ស៊ី ៕