ព្រះអង្គ ប៊ុត ប៊ុនតិញ ៖ ដង្ហើមចុងក្រោយនៃរបបផ្ដាច់ការ គឺប្រើតុលាការដុល្លារ ដើម្បីដាក់សម្ពាធមកលើអ្នកមានមនសិការជាតិ

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការអោយដឹងថា ព្រះអង្គនឹងមិននិមន្តចូលព្រះកាយទៅឆ្លើយបំភ្លឺតាមការកោះហៅរបស់តុលាការនៅកម្ពុជាទាក់ទងជាមួយនឹងបណ្ដឹងលោក ពេជ្រ ស្រស់ នោះទេ ។ នៅព្រឹកថ្ងៃទី២៥ ខែតុលា នេះ ណាងអយ្យការអមសាលាដំបូងរាជធានីភ្នំពេញ បានចេញដីកាជាលើកទី២ កោះហៅអតីតគណៈ កម្មការបុណ្យសពបណ្ឌិត កែម ឡី ពាក់ព័ន្ធនឹងបណ្ដឹងករណីបាត់បច្ច័យបុណ្យសពពីលោក ពេជ្រ ស្រស់ ប្រធានគណបក្សយុវជនកម្ពុជា ។ នៅក្នុងដីការចេញជាលើកទីពីររបស់តុលាការសាលាដំបូង បានសម្រេចកោះហៅ ព្រះតេជគុណ ប៊ុត ប៊ុនតិញ ស្ថាបិកបណ្ដាញព្រះសង្ឃឯករាជ្យដើម្បីយុត្តិធម៌សង្គម អោយចូលទៅឆ្លើយបំភ្លឺនៅថ្ងៃទី ៨ ខែ១១ ខាងមុខ ។ ចំណែកលោក មឿន តុលា នាយកប្រតិបត្តិអង្គការ សង់ត្រាល និងលោក ប៉ា ងួនទៀង នាយកប្រតិបត្តិ អង្គការ CCIM អោយ ចូលខ្លួនបំភ្លឺនៅថ្ងៃទី៧ ខែ១១ ខាងមុខនេះដែរ ។ កន្លងមក ព្រះអង្គ ប៊ុត ប៊ុនតិញ ក៏ធ្លាប់បានបដិសេធមិនចូលខ្លួនទៅបំភ្លឺ តាមដីការនេះម្ដងរួចទៅហើ យ ក្រោមហេតុផលថា តុលាការធ្វើឡើងទាំងខុស និងគ្មានព្រះសង្ឃណាដែលត្រូវគ្រហស្ថកោះ ហៅអោយទៅឆ្លើយនោះទេ ពោលគឺមានតែស្ថាប័នព្រះសង្ឃដូចគ្នាតែប៉ុណ្ណោះដែលមានសិទ្ធិទៅក្នុងរឿងនេះ ។ ក្រោយបានឃើញដីការចេញជាលើកទីពីរនេះ ព្រះអង្គ ប៊ុត ប៊ុនតិញ ដែលកំពុងមានព្រះវត្តមានគង់ នៅលើទឹកដីសហរដ្ឋអាមេរិក បានប្រាប់វិទ្យុសម្លេងព្រះសង្ឃឯករាជ្យអោយដឹងនៅថ្ងៃនេះថា ព្រះអង្គ នឹងមិនចូលទៅឆ្លើយបំភ្លឺនោះទេ បើទោះបីជានេះគឺជាលើកទីពីរក៏ដោយចុះ ។ ការសម្រេចមិនចូលទៅឆ្លើយបំភ្លឺនេះ ដោយហេតុថា គឺជាការប៉ះពាល់យ៉ាងធ្ងន់ធ្ងរដល់តម្លៃព្រះពុទ្ធសាសនា ។ ព្រះអង្គ អោយដឹងបែបនេះ ៖ « ហៅនាំតែខាតក្រដាសទេ អាត្មាមិនចូលទៅបំភ្លឺទេ។ ខាតពេល ហើយដើរខុសផ្លូវព្រះពុទ្ធសាសនា។តុលេការដុល្លារ ធ្វើការតាមអំណាចបុគ្គល » ។ ជាមួយនឹងការប្រកាសជំហរមិនចូលខ្លួនទៅឆ្លើយបំភ្លឺម្ដងទៀតនេះ ព្រះអង្គ ប៊ុត ប៊ុនតិញ បានហៅតុលាការនៅកម្ពុជាថា មិនឯករាជ្យ ធ្វើការតាមតែអំណាចរបស់បុគ្គល ។ ព្រះអង្គចាត់ទុកថា ដង្ហើមចុងក្រោយនៃរបបផ្ដាច់ការ គឺប្រើតុលាការដុល្លារ ដើម្បីដាក់សម្ពាធមកលើអ្នកមានមនសិការជាតិ ៕