រដ្ឋមន្ត្រីក្រសួងមហាផ្ទៃ លោក ស ខេង ព្រមានចាត់ការអ្នករត់ការឡើងដំណែងដោយខុសនីតិវិធី

ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានធ្វើការព្រមានកុំឲ្យមានការរត់ការឡើងដំណែងតួនាទីដោយខុសនីតិវិធីបែបបទ ដែលផ្ទុយទៅនឹងច្បាប់ បន្ទាប់ពីករណីនេះធ្លាប់មានការកើតឡើងកន្លងមកហើយ។ នេះបើយោងតាមការចុះផ្សាយដោយវេបសាយរបស់អគ្គស្នងការដ្ឋាននគរបាលជាតិនៅរសៀលថ្ងៃទី១៩ តុលា នេះ ។ វេបសាយនេះបញ្ជាក់ថា លោក ស ខេង ថ្លែងបែបនេះ ធ្វើឡើងនៅក្នុងសិក្ខាសាលាប្រកាសផ្សព្វផ្សាយផែនការយុទ្ធសាស្ត្របញ្ជ្រាបយេនឌ័រ ២០១៨-២០២៣ នៅព្រឹកថ្ងៃទី១៩ ខែតុលា ឆ្នាំ២០១៧នេះ នាទីស្តីការក្រសួង ។ នៅក្នុងពិធីខាងលើនេះ លោក ស ខេង បានបញ្ជាក់ថា ករណីសុំឡើងមុខតំណែងនេះ គឺត្រូវឆ្លងកាត់តាមបែបបទរដ្ឋបាលត្រឹមត្រូវនៅក្រសួងមហាផ្ទៃ ដោយដាក់សំណើមកផ្ទាល់ ។ រដ្ឋមន្រ្តីក្រសួងមហាផ្ទៃដដែលនេះ លោក ស ខេង បានសង្កត់ធ្ងន់ថា កន្លងទៅមានករណីលេចលឺថា មានអ្នកខ្លះដើរនិយាយថា ខ្លួននឹងឡើងទៅកាន់តំណែងជាអភិបាលខេត្តឧត្តរមានជ័យ ទាំងដែលរូប លោក ផ្ទាល់មិនទាន់ដឹងអ្វីសោះ ខណៈដែលមានអ្នកសួរថា តើពិតជាមានករណីនេះមានដែរឬទេ។ យ៉ាងណាក៏ដោយចុះ លោក ស ខេង បានធ្វើការណែនាំកុំឲ្យអ្នករត់ការទទួលសំណើរអ្នកដែលចង់បានតួនេះតួនោះ ដោយមិនឆ្លងកាត់តាមបែបបទរដ្ឋបាលត្រឹមត្រូវនៅក្រសួងមហាផ្ទៃដើម្បីអោយ ស្របទៅនឹងច្បាប់ ។ លើសពីនេះទៅទៀត លោក ខេង បានធ្វើការបន្ថែមថា ករណីនេះ មានអ្នកខ្លះចង់បានតួនាទី ក៏រត់ការទៅកាន់អ្នកមានឥទ្ធិពលណាមួយនៅខាងលើ រួចហើយមកសង្កត់មកថ្នាក់ក្រោម ។ ប៉ុន្តែយ៉ាងណាលោក ស ខេង ថា នឹងមិនអនុញ្ញាតអោយមានករណីបែបនេះកើតឡើងទៀតនោះទេ ៕