ព្រះអង្គ ប៊ុត ប៊ុនតិញ ថា ព្រះមហាក្សត្រមិនចង់ឡាយព្រះហត្ថលេខាលើច្បាប់បែកចែកអាសនៈទេ តែអាចត្រូវបានគេចាប់បង្ខំប៉ុណ្ណោះ

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការលើកឡើងថា អង្គព្រះមហាក្សត្រខ្មែរ អាចកំពុងត្រូវបានគេចាប់បង្ខំព្រះអង្គ ។ តាមរយៈច្បាប់ចំនួន៤ ដែលទើបនឹងត្រូវបានអង្គព្រះមហាក្សត្រឡាយព្រះហស្ថលេខា ដែលធ្វើអោយប្រជាពលរដ្ឋអ្នកគាំទ្រគណបក្សប្រឆាំងមិនពេញចិត្តនោះ ព្រះអង្គ ប៊ុត ប៊ុនតិញ ថា នេះមិនមែន ជាបំណងរបស់ព្រះអង្គពិតនោះឡើយ ប៉ុន្តែផ្ទុយទៅវិញ ដោយសារតែទ្រង់អាចនឹងកំពុងស្ថិតនៅក្នុងការចាប់បង្ខំ ដើម្បីអោយទ្រង់ព្រមឡាយព្រះហត្ថលេខាតែប៉ុណ្ណោះ។ ព្រះអង្គអោយដឹងបែបនេះ ៖ « ប្រជាពលរដ្ឋខ្មែរស្ទើរតែមួយនគរ ប្រហែលជាមិនមែនជំហរគាំទ្រព្រះមហាក្សត្រប៉ុន្មានទេ ប៉ុន្តែសូមញាតិញោមមេត្តាកុំទាន់ទាន់អាល ដាក់បន្ទុក ឬជេរប្រមាទ ពីព្រោះព្រះមហាក្សត្រក៏ត្រូវបានគេចាប់ជម្រិត ឬក៏ថា ចាប់បង្ខំ » ។ ច្បាប់ទាំង៤ ដែលត្រូវបានអង្គព្រះមហាក្សត្រឡាយព្រះហត្ថលេខាដាក់អោយប្រើប្រាស់ជាផ្លូវការ កាលពីថ្ងៃទី២៥ ខែតុលា កន្លងទៅថ្មីៗនេះ រួមមាន ច្បាប់ស្តីពីវិសោធនកម្មច្បាប់ ស្តីពីការបោះឆ្នោតជ្រើសតាំងតំណាងរាស្ត្រ ។ ច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។ ច្បាប់ស្តីពីវិសោធនកម្មច្បាប់ ស្តីពីការបោះឆ្នោតក្រុមប្រឹក្សាឃុំ-សង្កាត់ និង ច្បាប់ ស្តីពីវិសោធនកម្មច្បាប់ ស្តីពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត-ក្រុង-ស្រុក-ខណ្ឌ។ អ្នកគាំទ្រគណបក្សប្រឆាំងជាច្រើនបានបង្ហោះសារព្រោងព្រាតនៅលគណនីហ្វេសប៊ុករបស់ពួកគេ ដោយបានបង្ហាញពីការខកបំណង ។ លើសពីនេះទៀតមានទាំងអ្នកខ្លះបានប្រើសម្ដីមិនសមរម្យ ចំពោះអង្គព្រះមហាក្សត្រទៀតផង ។ ព្រះអង្គ ប៊ុត ប៊ុនតិញ តាមរយៈវីដេអូផ្សាយបន្តផ្ទាល់ចេញពីហ្វេសប៊ុកកាលពីយប់មិញនេះ ព្រះអង្គ បានបិណ្ឌបាតថា ពលរដ្ឋពុំទាន់ដាក់បន្ទុកទៅលើទ្រុងអោយសោះ ពីព្រោះរឿងនេះអាចដោយសារ តែទ្រង់ស្ថិតនៅក្នុងការចាប់បង្ខំ ៕