ព្រះអង្គ ប៊ុត ប៊ុនតិញ ថា ប្រតិភូកម្ពុជាដែលទៅចូលរួមកិច្ចប្រជុំនៅសហភាពអន្តរសភា IPU គេសួរ គោ បែជាឆ្លើយក្របីទៅវិញ

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការ រិះគន់ចំពោះគណៈប្រតិភូរបស់កម្ពុជាដែលបានអញ្ជើញទៅចូលរួមកិច្ចប្រជុំរបស់សហភាពអន្តរសភា នៅប្រទេសរុស្ស៊ី កាលពីប៉ុន្មានថ្ងៃមុននេះ ។ តាមរយៈវីដេអូឃ្លីប ដែលបង្ហោះលើហ្វេសប៊ុករបស់ព្រះអង្គ នៅព្រឹកថ្ងៃទី២០ ខែតុលា នេះ ព្រះអង្គ ប៊ុត ប៊ុនតិញ បានលើកឡើងថា ប្រតិភូកម្ពុជាដែលអញ្ជើញចូលរួមក្នុងកិច្ចប្រជុំនោះ មិនបានឆ្លើយឱ្យ ចំទៅនឹងសំនួររបស់ប្រធានសហភាពអន្តរសភានោះទេ ពោលគឺក្រោយពេលដែលគេសួរពីគោ គាត់បែជាទៅឆ្លើយសត្វក្របីទៅវិញ ៖ « ហើយមានក្រុមតំណាងរាស្រ្តមួយចំនួនដែលទៅចូលរួមប្រជុំជា មួយនឹងក្រុមសមាជិកសភាអន្តរជាតិ ហៅកាត់ថា IPU គេសួរគោ ទៅឆ្លើយក្របី » ។ នៅក្នុងវីដេអូដែលថតចេញពីកិច្ចប្រជុំនេះ ហើយដែលត្រូវបានផ្សព្វផ្សាយព្រោងព្រាតនៅលើហ្វេសប៊ុករបស់លោក សម រង្ស៊ី អតីតប្រធានគណបក្សសង្រ្គោះជាតិ និងមានបង្ហោះនៅលើហ្វេសប៊ុករបស់មន្រ្តីគណបក្សសង្រ្គោះជាតិផងនោះបានបង្ហាញអោយឃើញថា ប្រធានសហភាពអន្តរសភា បានសួរទៅប្រតិភូដែលអញ្ជើញទៅចូលរួមនោះថា តើគណបក្សសង្រ្គោះជាតិដែលជាគណបក្សប្រឆាំងនៅកម្ពុជាអាចនឹងរលាយដោយ សារការធ្វើវិសោធនកម្មច្បាប់ដោយគណបក្សកាន់អំណាចនៅកម្ពុជាថ្មីៗនេះឬ ? ហើយពិតឬមិនពិត ។ ប៉ុន្តែនៅពេលនេះ ប្រតិភូកម្ពុជាមិនបានឆ្លើយតបនោះទេ ដោយគ្រាន់តែប្រាប់ទៅប្រធានសភាវិញ គឺលោក សាបឺ ហ៊ូសេន ចូវដូរី (Saber Hossain Chowdhury) ថា គាត់មិនទាន់បានឃើញសេចក្ដី ស្នើច្បាប់វិសោធនកម្មនោះនៅឡើយទេ ។ ការថ្លែងលើកឡើងរបស់ប្រតិភូកម្ពុជានេះ ហាក់ដូចជាដើរផ្ទុយពីអ្វីដែលសមាជិករដ្ឋាភិបាលបក្សប្រ ជាជនបានធ្វើ ។ កាលពីថ្ងៃទី១៦ តុលា សេចក្តីស្នើច្បាប់ចំនួន៤ ដែលពាក់ព័ន្ធនឹងការរំលាយគណបក្សនយោបាយ ដែលត្រូវបានសភាពេញអង្គបានអនុម័តនៅថ្ងៃទី១៦ ខែតុលា ឆ្នាំ២០១៧ មាន ៖ ១៖ វិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ២៖ វិសោធនកម្មច្បាប់ស្តីពីការបោះឆ្នោតជ្រើសតាំងព្រឹទ្ធសភា ៣៖ វិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ/សង្កាត់ ៤៖ វិសោធនកម្ម ច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ។ ព្រះអង្គ ប៊ុត ប៊ុនតិញ យល់ថា អ្វីដែលប្រតិភូកម្ពុជាលើកឡើងនាពេលនេះ គឺជាការបោកប្រាស់ពល រដ្ឋខ្មែរ ហើយជាការបោកប្រាស់អន្តរជាតិដែលគេកំពុងឃ្លាំមើលកម្ពុជាយ៉ាងយកចិត្តទុកដាក់បំផុត ។ ទោះជាយ៉ាងណាក៏ដោយចុះ សហភាពអន្តរសភា ហៅកាត់ថា IPU ដែលជាតំណាងឲ្យរដ្ឋសភាមកពី ១៧៣ប្រទេស នៅទូទាំងពិភពលោក បានអនុម័តសេចក្ដីសម្រេចថ្កោលទោសរដ្ឋាភិបាលកម្ពុជា រួចទៅហើយ ៕