ក្រុមមេធាវីលោក កឹម សុខា នឹងប្រជុំរកវិធីធ្វើឱ្យលោក កឹម សុខា មានសេរីភាពឡើងវិញ ខណៈសហគមន៍អឺរ៉ុបក៏ស្នើជាថ្មីអោយដោះលែង លោក កឹម សុខា បើមិនចង់មានបញ្ហា

ក្រុមមេធាវីរបស់លោក កឹម សុខា បានអោយដឹងថា ពួកគេមិនអស់ចិត្តជាមួយនឹងសេចក្ដីសម្រេច របស់តុលាការកំពូលកាលពីម្សិលមិញនោះទេ ដោយហេតុថា ការសម្រេចនេះ គឺមិនបានផ្ដល់យុត្តិ ធម៌ជូនកូនក្ដីរបស់គេ ។ លោក សំ សុគង់ មេធាវីម្នាក់ ក្នុងចំណោមមេធាវីទាំង៦រូបរបស់លោក កឹម សុខា បានថ្លែងលើកឡើងថា តុលាការមិនបានធ្វើសេចក្ដីសម្រេចអោយយុត្តិធម៌សម្រាប់កូនក្ដីរបស់លោកនោះទេ ។ លោកបានលើកឡើងថា តុលាការកំពូលមិនបានយកអ្វីដែលក្រុមមេធាវីរបស់លោក កឹម សុខា លើកឡើង យកទៅពិចារណាមុននឹងធ្វើសេចក្ដីសម្រេចកាត់ទោស នោះទេ ។ ហេតុដូច្នេះហើយ ទើបលោកចាត់ទុកថា នេះគឺជារឿងមិនយុត្តិធម៌ទាល់តែសោះ ៖ « តុលាការកំពូលមិនបានយកអ្វីដែលក្រុមមេធាវីបានលើកឡើង ហើយយកមកពិចារណា ហើយក៏សម្រេចអ្វីដែលមេធាវីបាន លើកឡើងទេ » ។ លោក សំ សុគង់ ថ្លែងបែបនេះ ធ្វើឡើងនៅក្នុងជំនួបជាមួយនឹងអ្នកសារព័ត៌មានមុខតុលាការសាលាកំពូលកាលពីម្សិលមិញនេះ ក្រោយពេលដែលតុលាការសាលាកំពូលបានសម្រេចកាត់ក្ដីតម្កល់សាលក្រមសាលាដំបូងរាជធានីភ្នំពេញជាបានការដដែលទាំងគ្មានវត្តមានរបស់លោក កឹម សុខា នៅក្នុងបន្ទប់សវនាការ។ ប៉ុន្តែលោក សំ សុគង់ ថ្លែងអះអាងថា នេះជារឿងអយុត្តិធម៌ខ្លាំងណាស់សម្រាប់កូនក្ដីរបស់លោក ។ លោកបានអោយដឹងថា ក្រុមមេធាវីនឹងបន្តធ្វើការពិភាក្សាគ្នាជាថ្មី ស្វែងរកវិធីសាស្រ្តណាដែលអាចជួយអោយលោក កឹម សុខា មានសេរីភាពឡើងវិញ ។ អត្ថបទព័ត៌មានមួយនេះ យើងខ្ញុំបានចម្លងចេញទាំងស្រុងពីវេបសាយរបស់វិទ្យុសម្លេងព្រះសង្ឃឯករាជ្យ ដែលផ្សាយចេញនៅរសៀលថ្ងៃទី១ ខែវិច្ឆិកា ឆ្នាំ ២០១៧ នេះ ។ លោក កឹម សុខា ត្រូវបាន ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួន ដាក់ពន្ធនា គារជាបណ្តោះអាសន្នក្រោមការចោទប្រកាន់ពីបទ សន្និដ្ឋិភាពជាមួយបរទេស ដែលជាបទល្មើសមួយក្នុងអំពើក្បត់ជាតិ ក្នុងមាត្រា៤៤៣ នៃក្រមព្រហ្មទណ្ឌ កាលពីនៅថ្ងៃទី០៦ ខែកញ្ញា ឆ្នាំ២០១៧ ។ កាលពីម្សិលមិញនេះ គណៈប្រតិភូសភាអឺរ៉ុប បានព្រមានរដ្ឋាភិបាលកម្ពុជាជាថ្មីម្ដងទៀតថា អឺរ៉ុបអាចនឹងចាត់វិធានការ ជុំវិញជំនួយផ្នែកអភិវឌ្ឍ និងការអនុគ្រោះពន្ធ ប្រសិនបើស្ថានភាពសិទ្ធិមនុស្សនៅកម្ពុជា នៅតែមានភាពដុនដាបខ្លាំង ដោយសារការធ្វើទុក្ខបុកម្នេញ គណបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យ។ គណៈប្រតិភូរបស់សភាអឺរ៉ុប ស្ដីអំពីកិច្ចការអាស៊ាន បានរម្លឹករដ្ឋាភិបាលកម្ពុជា ឲ្យចងចាំថា សហភាពអឺរ៉ុប គឺជាអ្នកចូលរួម សម្រេចលើបញ្ហាថវិកា និងពាណិជ្ជកម្ម។ ដូច្នេះ ស្ថានភាពធ្ងន់ធ្ងរ នៃការរំលោភសិទ្ធិមនុស្សនៅកម្ពុជា នឹងប៉ះពាល់ ដល់ការសម្រេច លើកម្មវិធីផ្ដល់ជំនួយអភិវឌ្ឍ និងការអនុគ្រោះពន្ធដល់ប្រទេសកម្ពុជា។ នៅក្នុងសេចក្ដីថ្លែងការណ៍ របស់សភាអឺរ៉ុប កាលថ្ងៃទី៣១ ខែតុលា លោក វែនើរ ឡានហ្គែន ប្រធានគណៈប្រតិភូរបស់សភាអឺរ៉ុប ស្ដីអំពីកិច្ចការអាស៊ាន បានលើកឡើងក្នុងលិខិតនោះថា សហភាពអឺរ៉ុបអំពាវឲ្យរដ្ឋាភិបាល ដោះលែងប្រធានគណបក្សសង្គ្រោះជាតិ លោក កឹម សុខា បញ្ឈប់ដំណើរប៉ុនប៉ងរម្លាយគណបក្សប្រឆាំងនេះ និងផ្ដល់សេរីភាពឡើងវិញ ដល់គណបក្សនយោបាយ ប្រព័ន្ធផ្សព្វផ្សាយ និងអង្គការសង្គមស៊ីវិល។ សូមបញ្ជាក់ថា មិនមែនត្រឹមតែសហគមន៍អឺរ៉ុបនោះទេ ដែលស្នើម្ដងជាពីរដងលើបញ្ហានេះ កន្លងមកថ្មីៗនេះ សហភាពអន្តរសភាដែលតំណាងអោយប្រទេស១៧៣ នៅលើពិភពលោកបានអនុម័តញត្តិ មួយថ្កោលទោសលើរដ្ឋាភិបាលកម្ពុជាជុំវិញស្ថានការណ៍នាពេលបច្ចុប្បន្ននេះ ។ ចំណែកឯតំណាងរាស្រ្តអាមេរិកវិញនោះ ក៏បានព្រមានដាក់មន្រ្តីរដ្ឋាភិបាលចូលទៅក្នុងបញ្ជីខ្មៅថែមទៀត ដោយហាម មិនអោយចូលប្រទេសនេះ ប្រសិនបើមិនព្រមដោះលែងលោក កឹម សុខា ៕