ព្រះអង្គ ប៊ុត ប៊ុនតិញ ៖ បើពួកគាត់នៅមានជំនឿជាមួយនឹងពួកកាន់អំណាចបច្ចុប្បន្នអត់បញ្ជូនកូន អោយមករស់នៅអាមេរិកទេ អត់បញ្ជូនកូនអោយទៅរស់នៅអូស្រ្តាលីទេ

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការលើកឡើងថា អ្នកស្ថិតក្រោមបង្គាប់របស់គណបក្សប្រជាជន មិនមែនសុទ្ធតែស្ដាប់បង្គាប់ និងជឿទុក ចិត្តទាំងអស់នោះទេ ។ ព្រះអង្គ ប៊ុត ប៊ុនតិញ បានមានព្រះថេរដីការបញ្ជាក់ថា បើកូនចៅបក្សប្រជាជនជឿជាក់លើបក្សប្រជាជនមែន មិនមែនអ្នកទាំងនោះបញ្ជូនកូនចៅ និងប្រពន្ធរបស់គេអោយទៅរស់នៅក្រៅប្រទេសនោះឡើយ ។ ព្រះអង្គយល់ថា មនស្សមួយចំនួនដែលកំពុងស្ថិតក្រោមការគ្រប់គ្រងរបស់អ្នកកាន់អំណាចសព្វថ្ងៃនេះ គឺព្រមធ្វើជាស្ដាប់ និងការពារ គ្រាន់តែក្នុងបំណងដើម្បីបានលាបតែប៉ុណ្ណោះ ។ ព្រះអង្គលើកឡើងបន្តថា ពលរដ្ឋទាំងអស់ពួកគាត់ក៏មិនសប្បាយចិត្តដែរ ប្រសិនបើបក្សសង្រ្គោះជាតិត្រូវរំលាយមែននោះ បើទោះបីជាអ្នកទាំងនោះជាអ្នកបោះឆ្នោតអោយបក្សប្រជាជនកម្ពុជាដោយផ្ទាល់ពិតមែនក៏ដោយ។ ព្រះអង្គបញ្ជាក់បែបនេះ ៖ « ដូច្នេះអ្នកណាដែលចង់រំលាយសង្រ្គោះជាតិគឺត្រូវតែទទួលស្គាល់ចំពោះ មុខប្រវត្តិសាស្រ្តខ្លួនឯង ហើយនឹងក្លាយទៅជាសត្រូវរបស់ប្រជាពលរដ្ឋមួយប្រទេស មិនមែនមាន័យ ថា អ្នកដែលបោះឆ្នោតអោយបក្សកាន់អំណាច ពេលដែលបក្សកាន់អំណាចបំផ្លាញចលនាប្រជាធិបតេយ្យគេគាំទ្រពួកគាត់ទេ បើពួកគាត់នៅមានជំនឿជាមួយនឹងពួកកាន់អំណាចបច្ចុប្បន្នអត់បញ្ជូនកូន អោយមករស់នៅអាមេរិកទេ អត់បញ្ជូនកូនអោយទៅរស់នៅអូស្រ្តាលីទេ » ។ ព្រះថេរដីការលើកឡើងរបស់ព្រះអង្គ ប៊ុត ប៊ុនតិញ យ៉ាងដូច្នេះ ធ្វើឡើងនៅក្នុងសិក្ខាសាលាមួយ ស្ដីពីសិទ្ធិមនុស្ស និងប្រជាធិបតេយ្យនៅកម្ពុជារៀបចំឡើងដោយមូលនិធិខ្មែរសាមគ្គី នៅទីក្រុងឡងប៊ិច កាលពីប៉ុន្មានថ្ងៃមុននេះ ដោយមានការចូល រួមពីពលរដ្ឋ អ្នកនយោបាយ សកម្មជន និងព្រះសង្ឃជាដើម ។ តាមរយៈវីដេអូ ដែលត្រូវបានផ្សព្វផ្សាយបន្តនៅលើហ្វេសប៊ុករបស់លោក សម រង្ស៊ី ។ ព្រះអង្គ ប៊ុត ប៊ុនតិញ បានចាត់ទុកការយាយី និងការប៉ន់ប៉ងរំលាយគណបក្សសង្រ្គោះជាតិថា ជាការបំផ្លាញប្រជាធិបតេយ្យនៅកម្ពុជា ។ ព្រះអង្គនៅតែអះអាងថា អ្វីៗដែលរដ្ឋាភិបាលកំពុងធ្វើនាពេលនេះ គឺគ្រាន់តែជាការបន្លាច និងបំបាក់ស្មារតីអ្នកដែលហ៊ានប្រឆាំងជាមួយនឹងរដ្ឋាភិបាលរបស់គណបក្សប្រជាជនតែប៉ុណ្ណោះ ៕