ពិតជាសាហាវមែន! ពេលនេះ ព្យុះដំរី វាយប្រហារវៀតណាម ផ្តាច់ជីវិតមនុស្ស១៩នាក់ និង១២នាក់បាត់ខ្លួន ចំណែកទូកនេសាទជាង ១០០គ្រឿងលិច ខណៈព្យុះនេះនឹងមកដល់កម្ពុជាឆាប់ៗ

(ហាណូយ)៖ ព្យុះទីហ្វុងដ៏កំណាចមួយដែលមានឈ្មោះថា ដំរី បានវាយប្រហារភាគកណ្តាលប្រទេសវៀតណាម និងផ្តាច់យកជីវិតមនុស្ស ១៩នាក់ហើយ ខណៈមនុស្សជាច្រើនទៀត នៅក្នុងខេត្ត Khanh Hoa និង Phu Yen ត្រូវបានគេរាយការណ៍ថា បាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃសៅរ៍ ទី០៤ ខែវិច្ឆិកា ឆ្នាំ២០១៧។ អាជ្ញាធរវៀតណាម បានឲ្យដឹងនៅថ្ងៃសៅរ៍នេះទៀតថា ក្រៅពីមនុស្សស្លាប់ និងបាត់ខ្លួនជាច្រើនាក់ នៅក្នុងខេត្តភាគកណ្តាលទាំងពីរខាងលើនេះ ទូកនេសាទប្រមាណជាង ១០០គ្រឿង ក៏ត្រូវបានព្យុះដំរីមួយនេះ បោកពន្លិចទៅក្នុងសមុទ្រផងដែរ។ សម្រាប់ការខូចខាតផ្សេងៗទៀតនោះ គឺផលដំណាំជាច្រើនហិកតា ត្រូវបានលិចលង់ទៅក្នុងជំនន់ទឹកភ្លៀងយ៉ាងគំហុក ខណៈផ្ទះរាប់ពាន់ខ្នងបានដួលរលំ និងរបើលដំបូលខ្ទេចខ្ទីទៅតាមខ្យល់។ គួរបញ្ជាក់ថា ព្យុះខាងលើនេះ បានកើតមានឡើងយ៉ាងទាន់ហន់ នៅមុនប្រទេសវៀតណាមធ្វើជាម្ចាស់ផ្ទះរៀបចំកិច្ចប្រជុំ កិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ចាប់ពីថ្ងៃទី០៦ ដល់ទី១១ ខែវិច្ឆិកា សប្តាហ៍ក្រោយនេះ ហើយក៏មុនដំណើរមកដល់របស់ លោក ដូណាល់ ត្រាំ ប្រធានាធិបតីសហរដ្ឋអាមេរិកផងដែរ។ រាជធានី-ខេត្តមួយចំនួនរបស់កម្ពុជា នឹងមានភ្លៀងធ្លាក់ពីបង្គួរទៅច្រើន ចាប់ពីថ្ងៃនេះ ដល់ថ្ងៃទី០៦ ខែវិច្ឆិកា ឆ្នាំ២០១៧ ដោយសារទទួលរងនូវឥទ្ធិពលព្យុះទី២៣ ឈ្មោះដំរី ដែលបោកបក់ចំប្រទេសវៀតណាម មានប្រភពមកពីសមុទ្រចិនខាងត្បូងនេះ។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម។ សេចក្ដីជូនដំណឹងរបស់ក្រសួងធនធានទឹក បានបញ្ជាក់ថា រាជធានី-ខេត្ត ដែលទទួលរងឥទ្ធពលព្យុះដំរីនេះ រួមមាន៖ រាជធានីភ្នំពេញ ខេត្តកណ្ដាល កំពង់ស្ពឺ កំពង់ឆ្នាំង កំពត កែប ព្រះសីហនុ ស្វាយរៀង ត្បូងឃ្មុំ និងខេត្តកំពង់ធំ។ ហេតុដូច្នេះ ក្រសួងបានអំពាវនាវឱ្យប្រជាពលរដ្ឋបង្កើនការប្រុងប្រយ័ត្នខ្ពស់ ដើម្បីចៀសវាងបញ្ហាកើតឡើងជាយថាហេតុណាមួយ ពិសេសប្រជាពលរដ្ឋដែលរស់នៅតាមមាត់សមុទ្រ ៕