លោក សម រង្ស៊ី ចោទបក្សប្រជាជនថា ធ្វើតាមវៀតណាមរហូតបាត់បងឯករាជ្យជាតិដែលជាកិច្ចខំប្រឹងរបស់សម្ដេចសីហនុ

អតីតប្រធានគណបក្សសង្រ្គោះជាតិ លោក សម រង្ស៊ី បានចោទប្រកាន់គណបក្សប្រជាជនដែលកំពុងដឹកនាំរដ្ឋាភិបាលថា ធ្វើអោយប៉ះពាល់ដល់តម្លៃនៃកិច្ចខិតខំប្រឹងប្រែងរបស់អតីតព្រះមហា ក្សត្រខ្មែរ សម្ដេចសីហនុ ។ លោក សម រង្ស៊ី បានថ្លែងលើកឡើងថា សម្តេចព្រះនរោត្តម សីហនុ ជាបិតាឯករាជ្យជាតិ ដែលព្រះអង្គបានដណ្តើមពីអាណានិគមនិយមបារាំង មកប្រគល់ជូនប្រទេសកម្ពុជាវិញ ក្នុងថ្ងៃ ០៩ វិច្ឆិកា ១៩៥៣។ ប៉ុន្តែនេះ គឺជាការសោកស្តាយណាស់ ដែលគណបក្សកាន់អំណាចសព្វថ្ងៃ ដែលបន្តុបដោយកងទ័ពរបស់វៀតណាមកុម្មុយនីស្ត ក្នុងថ្ងៃ ០៧ មករា ១៩៧៩ បានធ្វើឲ្យប្រទេសកម្ពុជា បាត់បង់ឯករាជ្យភាពរបស់ខ្លួនម្តងទៀត ដោយធ្លាក់ទៅក្រោមអាណានិគមនិយមរបស់ប្រទេសវៀតណាម ចាប់ពីថ្ងៃនោះមក។ លោក សម រង្ស៊ី អោយដឹងបែបនេះ ធ្វើឡើងនៅលើទំព័របណ្ដាញសង្គមហ្វេសប៊ុករបស់លោក ដែលធ្វើឡើងកាលពីថ្ងៃទី១០ វិច្ឆិកា ពោលគឺរំលងបាន១ថ្ងៃ នៃថ្ងៃ៩វិច្ឆិកា ដែលជាទិវាបុណ្យឯករាជ្យជាតិខ្មែរ ។ បន្ថែមពីលើការរំលឹកពីការតស៊ូរហូតរំដោះកម្ពុជាចេញពីអាណានិគមរបស់បារាំងនេះ ។ លោក សម រង្ស៊ី ដែលកំពុងនិរទេសខ្លួនរស់នៅឯក្រៅប្រទេសនៅឡើយនោះ បានថ្លែងអំពាវនាវដល់កូនខ្មែរថា ត្រូវចងចាំជានិច្ចចំពោះ សម្តេចព្រះនរោត្តម សីហនុ ជាបិតាឯករាជ្យជាតិ ដែលព្រះអង្គបានដណ្តើមពីអាណានិគមនិយមបារាំង មកប្រគល់ជូនប្រទេសកម្ពុជាវិញ ក្នុងថ្ងៃ ០៩ វិច្ឆិកា ១៩៥៣ ៕