ក្រុមកាងអ្នករកស៊ីឈើគម្រាមបាញ់អ្នកចាប់ឈើ

November 08, 2017

ព្រះវិហារ/កំពង់ធំៈ អត្ថបទពីភ្នំពេញប៉ុស្តិ៍ ដោយ ផាក់ ស៊ាងលី៖ អាជ្ញាធរមានសមត្ថកិច្ចកំពុងតែស្រាវជ្រាវរកក្រុមអ្នកកាងឈើដែលបានគំរាមបាញ់សម្លាប់មន្ត្រីឧទ្យានុរក្សបរិស្ថានពីររូប បន្ទាប់ពីចាប់ឈើគ្រញូងរបស់ពួកគេនៅដែនជម្រកសត្វព្រៃបឹងពែរក្នុងស្រុករវៀងកាលពីសប្តាហ៍មុន។ លោក មាស ញឹម នាយកដែនជម្រកសត្វព្រៃបឹងពែរបានឲ្យដឹងកាលពីម្សិលមិញថាបុរសពីរនាក់ជិះរថយន្តបាឡែនមួយគ្រឿងទៅស្នាក់ការបរិស្ថានរំចេកក្នុងស្រុករវៀង ហើយបានគំរាមបាញ់សម្លាប់មន្ត្រីឧទ្យានុរក្ស បរិស្ថានចំនួន ២ នាក់កាលពីវេលាម៉ោងប្រមាណជា ៦ ល្ងាចគឺ ១ ថ្ងៃក្រោយពេលក្រុមឧទ្យានុរក្សបានបង្ក្រាបឡានដឹកឈើគ្រញូងបែកកង់បាន ១ គ្រឿងដែលផ្ទុកឈើគ្រញូង ១២២ ដុំស្នើនឹង ៨២២ គីឡូក្រាម។

ការបង្ក្រាបកាលពីសប្តាហ៍មុននោះមានរថយន្តបីគ្រឿងបានកាងឡានដឹកគ្រញូងយ៉ាងហោចណាស់ពី ៦ ទៅ ៧ គ្រឿង។ ក្នុងនោះមានមួយគ្រឿងប្រភេទធុនដ្រាដែលមានពាក់ស្លាកលេខ ខ.ម ហើយបានបាញ់ ២ គ្រាប់ដើម្បីគំរាមឧទ្យានុរក្សកុំឲ្យដេញចាប់ពួកគេ។ ប៉ុន្តែមិនបណ្តាលឲ្យមានរបួសនោះទេ។ លោក មាស ញឹម បានជឿជាក់ថាបុរស ២ នាក់ដែលទៅគំរាមនោះគឺជាក្រុមដែលកាងបទល្មើសដឹកឈើនោះ។ លោក ញឹម បញ្ជាក់ថា៖ «មានជនមិនស្គាល់មុខ ២ នាក់ចូលទៅគំរាមបាញ់ពួកខ្ញុំនៅក្នុងប៉ុស្តិ៍។ យើងសន្និដ្ឋានថាជាក្រុមដែលកាងឈើហ្នឹងឯងដែលមានបីគ្រឿងកាងពីមុខពីក្រោយមិនឲ្យយើងតាមចាប់ហ្នឹង។ តែយើងមិនស្គាល់គេទេ»។

លោក មាស ញឹម អះអាងថានៅពេលនោះមន្ត្រីបានទៅល្បាតអស់គឺនៅសល់តែ ២ នាក់នៅចាំស្នាក់ការ។ លោកបន្តថា គ្រាន់តែឮជនមិនស្គាល់មុខគំរាម «បាញ់ក្បាលចោល» បែបនោះមន្ត្រីទាំង ២ នាក់បានរត់ចូលបន្ទប់នៃស្នាក់ការ ដែលធ្វើឲ្យជនមិនស្គាល់មុខស្មានថាពួកគេរត់ចូលទៅយកកាំភ្លើងក៏បើកឡានចេញបាត់ទៅ។ បន្ទាប់ពីមានការគំរាមនោះមកលោកបានរាយការណ៍ភា្លមទៅព្រះរាជអាជ្ញាអមសាលាដំបូងខេត្ត សាលាខេត្ត និងមន្ទីរបរិស្ថានខេត្តព្រះវិហារដើម្បីសុំអន្តរាគមន៍ ហើយពេលនេះអាជ្ញាធរមានសមត្ថកិច្ចកំពុងស្រាវជ្រាវក៏ដូចជាឃ្លាំមើលបញ្ហានេះ។ មន្ត្រីរដ្ឋបាលព្រៃឈើម្នាក់ និងនគរបាលម្នាក់ត្រូវបានគេបាញ់ស្លាប់ពេលចុះល្បាតព្រៃនៅក្នុងស្រុកជាំក្សាន្តកាលពីខែវិច្ឆិកាឆ្នាំ ២០១៥ កន្លងមក។

ករណីដាច់ដោយឡែកមួយទៀតពលរដ្ឋក៏បានសម្ដែងការរិះគន់ចំពោះអាជ្ញាធរដែលមិនយកចិត្តទុកដាក់ក្នុងការបង្ក្រាបការដឹកជញ្ជូនឈើខុសច្បាប់នៅតាមផ្លូវជាតិសំខាន់ៗ ហើយបើគ្មានគ្រោះថ្នាក់ចរាចរណ៍ ឬឧប្បត្តិហេតុផ្សេងៗកើតឡើងដោយចៃដន្យចំពោះរថយន្តដឹកឈើនោះទេ បទល្មើសនេះកម្រនឹងបែកធ្លាយណាស់។ ករណីចុងក្រោយបានកើតឡើងកាលពីព្រឹកថ្ងៃសៅរ៍ចុងសប្តាហ៍មុននេះនៅលើផ្លូវជាតិលេខ ៦ ស្ថិតក្នុងភូមិស្លាក់ក្រាញ់ ឃុំសំព្រោច ស្រុកស្ទោង ខេត្តកំពង់ធំគឺរថយន្តម៉ាក High Lander ពណ៌ស្លែ ១ គ្រឿងផ្ទុកឈើគ្រញូងពេញ ហើយបានរេចង្កូតធ្លាក់ផ្លូវបន្ទាប់ពីកង់ក្រោយផ្នែកខាងឆ្វេងបាក់ (ភ្លៅ) ទៅមុខលែងរួច។ បន្ទាប់ពីទទួលបានព័ត៌មាន អាជ្ញាធរមានសមត្ថកិច្ចបានត្រឹមតែចុះទៅពិនិត្យ និងស្ទូចយករថយន្តនោះទៅរក្សាទុកនៅខណ្ឌរដ្ឋបាលព្រៃឈើខេត្ត ដើម្បីធ្វើកំណត់ហេតុប៉ុណ្ណោះ។

រូបភាពនៃរថយន្តនេះត្រូវបានអ្នកសារព័ត៌មានក្នុងស្រុកបង្ហោះក្នុងបណ្តាញសង្គមហ្វេសប៊ុកហើយពលរដ្ឋជាច្រើនបានរិះគន់ថា «រថយន្ដដឹកឈើគ្រញូងយ៉ាងសកម្មចេញពីខេត្តសៀមរាបទៅលក់នៅវៀតណាម យ៉ាងគគ្រឹកគគ្រេង គ្មានជំនាញណាចុះបង្ក្រាបទេ លើកលែងតែជួបគ្រោះថ្នាក់ចរាចរណ៍» និងម្នាក់ទៀតថា «មានជំនាញបង្ក្រាបមកពីណា បើត្រូវគ្នាជាប្រព័ន្ធទៅហើយហ្នឹង»។ មន្ត្រីនគរបាលស្រុកម្នាក់ដែលសុំមិនបញ្ចេញឈ្មោះបានឲ្យដឹងថារថយន្តនេះបានចេញពីផ្លូវខេត្តសៀមរាបមកហើយមានផ្ទុកឈើគ្រញូងជាង ៨០ ដុំស្មើនឹងជាង ៤០០ គីឡូក្រាម។ មន្ត្រីដដែលនេះបានបន្តថាអ្នកដឹកឈើបានរត់ចោលរថយន្ត ហើយគ្រោះថ្នាក់នេះទំនងជាបណ្តាលមកពីដឹកធ្ងន់ពេក ខណៈពេលដែលកង់វាបាត់បង់ធានាគុណផង។

ទាក់ទងទៅនឹងការរិះគន់នេះវិញមន្ត្រីនគរបាលដដែលនេះថ្លែងថា៖ «ធម្មតាគេដឹកបន្លំជាមួយនឹងឡានដើរលេងជាលក្ខណៈគ្រួសារ។ បើចង់ធ្វើទាល់តែមានបណ្តាញច្បាស់លាស់។ គេបើកលឿនៗហើយបើប្រដេញតាមមានគ្រោះថ្នាក់។ និយាយទៅសមត្ថកិច្ចយើងមានការលំបាកក្នុងការបង្ក្រាប»៕