​ព្រះអ​​ង្គ​ ប៊ុ​ត​ ​ប៊ុន​តិ​ញ​ ៖​ ​បើហ៊ា​ន​រំ​លាយ​​ប​ក្ស​ស​ង្រ្គោះ​ជា​តិ ​រ​ដ្ឋា​ភិ​បា​លនឹ​ង​ក្លា​យ​ទៅ​ជា​ស​ត្រូ​វ​រប​ស់​ព​លរ​​ដ្ឋ​ខ្មែ​រ​​

From VIM Radio ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ យល់ថា រដ្ឋាភិបាល និងតុលាការ នឹងមិនហ៊ានរំលាយគណបក្សសង្រ្គោះជាតិនៅពេលនេះបាននោះទេ ។ មូលហេតុនៃការសំអាងយ៉ាងជឿជាក់បែបនេះ ព្រះអង្គ ប៊ុត ប៊ុនតិញ បានបញ្ជាក់ថា ដោយសារតែការគាំទ្រទៅលើគណបក្សសង្រ្គោះជាតិពីសំណាក់ប្រជាពលរដ្ឋខ្មែរមានរាប់លាននាក់ ។ ព្រះអង្គបាន បន្តថា បច្ចុប្បន្នគណបក្សសង្រ្គោះជាតិ គឺជាគូបដិបក្សរបស់រដ្ឋាភិបាលកាន់អំណាច បើសិនជាហ៊ានធ្វើការរំលាយគណបក្សសង្រ្គោះជាតិពិតមែន គណបក្សសង្រ្គោះជាតិនឹងលែងក្លាយទៅជាគូរបដិបក្ខ របស់គណបក្សប្រជាជនដែលកំពុងដឹកនាំរដ្ឋាភិបាល ប៉ុន្តែរដ្ឋាភិបាលមួយនេះនឹងក្លាយទៅជាសត្រូវ របស់ពលរដ្ឋខ្មែររាប់លាននាក់ ។ ព្រះអង្គ ប៊ុត ប៊ុនតិញ បញ្ជាក់បែបនេះ ៖ « បើគេរំលាយ គេត្រូវប្រឈមមុខច្រើនជាមួយនឹងប្រជាពលរដ្ឋខ្មែរ បច្ចុប្បន្ននេះអ្នកកាន់អំណាចមើលឃើញគណបក្សសង្រ្គោះជាតិថា ជាដៃគូរបដិបក្សរបស់អ្នកកាន់អំណាច ប៉ុន្តែបើហ៊ានរំលាយសង្រ្គោះជាតិភ្លាម សង្រ្គោះជាតិលែងជាសត្រូវរបស់អ្នកកាន់អំណាចហើយ ប្រជាពលរដ្ឋខ្មែរទាំងមូលជាសត្រូវរបស់អ្នកកាន់អំណាច » ។ ព្រះថេរដីការលើកឡើងរបស់ព្រះអង្គ ប៊ុត ប៊ុនតិញ យ៉ាងដូច្នេះ ធ្វើឡើងនៅក្នុងសិក្ខាសាលាមួយ ស្ដីពីសិទ្ធិមនុស្ស និងប្រជាធិបតេយ្យនៅកម្ពុជារៀបចំឡើងដោយមូលនិធិខ្មែរសាមគ្គី នៅទីក្រុងឡងប៊ិច កាលពីប៉ុន្មានថ្ងៃមុននេះ ដោយមានការចូល រួមពីពលរដ្ឋ អ្នកនយោបាយ សកម្មជន និងព្រះសង្ឃជាដើម ។ ទោះជាយ៉ាងណា លោកនាយករដ្ឋមន្រ្តី ហ៊ុន សែន ម្ដងហើយម្ដងទៀត នៅតែប្រកាសយ៉ាងជឿជាក់ថា គណបក្សសង្រ្គោះជាតិប្រាកដជានឹងត្រូវរំលាយដោយតុលាការកំពូលនៅថ្ងៃទី១៦ ខាងមុខនេះ ដែលជាថ្ងៃបើកសវនាការបណ្ដឹងប្ដឹងសុំរំលាយគណបក្សសង្រ្គោះជាតិពីក្រុមមេធាវីមកពីក្រសួងមហា ផ្ទៃ ។ លោកនាយករដ្ឋមន្រ្តី ហ៊ុន សែន ទាំងបានភ្នាល់ដាក់ជីវិតរបស់លោកថែមទៀតផង បើសិនជា គណបក្សសង្រ្គោះជាតិពិតជាមិនត្រូវបានរំលាយដោយតុលាការកំពូលទេនោះ ។ ព្រះអង្គ ប៊ុនតិញ វិញ ដែលកំពុងមានព្រះវត្តមាននៅក្រៅប្រទេសនៅឡើយបានមានព្រះថេរដីការជឿជាក់ដែរថា នេះគ្រាន់តែជាយុទ្ធសាស្រ្តបន្លាច និងជាយុទ្ធសាស្រ្តរបស់គណបក្សកាន់អំណាចដើម្បីបំបាក់ស្មារតីរបស់គណបក្សប្រឆាំងតែប៉ុណ្ណោះ ។ ព្រះអង្គនៅតែយល់ថា រដ្ឋាភិបាលមិនហ៊ានធ្វើដល់ថ្នាក់នេះទេ ។ ព្រះអង្គ ប៊ុត ប៊ុនតិញ ក៏បានបញ្ជាក់ដែរថា បើសិនជាហ៊ានរំលាយមែននោះ អ្នកកាន់អំណាចបច្ចុប្បន្ននឹងត្រូវប្រឈមមុខជាមួយនឹងប្រវត្តិសាស្រ្ត ៕