ក្រសួងមហាផ្ទៃសម្រេចបង្កក់ប្រាក់ខែក្រុមប្រឹក្សា ឃុំ/សង្កាត់ មកពីបក្សសង្រ្គោះជាតិ

ក្រសួងមហាផ្ទៃបានបញ្ជាក់ពីការសម្រេចផ្អាកការផ្ដល់ប្រាក់ឧបត្ថម្ភទៅដល់សមាជិក្រុមប្រឹក្សាឃុំសង្កាត់មកពីគណបក្សសង្រ្គោះជាតិជាផ្លូវការ ក្រោយពេលដែលតុលាការកំពូលបានសម្រេចប្រកាសសាលដីការរំលាយគណបក្សសង្រ្គោះជាតិ ។ ក្នុងសេចក្ដីជូនដំណឹងរបស់ក្រសួងមហាផ្ទៃធ្វើឡើងនៅថ្ងៃទី១៧ ខែវិច្ឆិកានេះ ដើម្បីបញ្ជូនទៅអគ្គនាយកនៃអគ្គនាយកដ្ឋានរតនាគាជាតិ ក្រសួងមហាផ្ទៃបានស្នើអោយបង្កក់ប្រាក់ខែសម្រាប់សមាជិក ក្រុមប្រឹក្សាឃុំសង្កាត់របស់គណបក្សសង្រ្គោះជាតិទាំងអស់ ចាប់ពីថ្ងៃទី១៦ ខែវិច្ឆិកា ម្សិលមិញនេះត ទៅ ក្រោមហេតុផលថា ដោយសារតែគណបក្សនេះ ត្រូវបានតុលាការសាលាកំពូលប្រកាសសាលដី ការរំលាយជាស្ថាពរហើយ ។ តុលាការជាន់ខ្ពស់កាលពីថ្ងៃទី១៦ វិច្ឆិកា បានសម្រេចចេញសាលដីការប្រកាសរំលាយគណបក្សសង្រ្គោះជាតិជាស្ថាព័រ និងបានបិទសិទ្ធិតំណាងរាស្រ្តមកពីគណបក្សសង្រ្គោះជាតិចំនួន១១៨រូប ដែលសុទ្ធសឹងតែជាសមាជិកគណៈកម្មាធិការនាយកនៃគណបក្សនេះ លែងអោយធ្វើនយោបាយចំនួន៥ឆ្នាំ ។ ក្នុងសេចក្ដីជូនដំណឹងរបស់ក្រសួងមហាផ្ទៃដែលធ្វើឡើងនៅថ្ងៃនេះបានអះអាងថា ករណីដែលគណបក្សសង្រ្គោះជាតិត្រូវបានរំលាយដោយតុលាការកំពូល នោះបញ្ជីបេក្ខជន និងសមាជិកក្រុមប្រឹក្សាឃុំ សង្កាត់ទាំងអស់នេះគណបក្សនេះ លែងមានសុពលភាព និងលែងមានគុណសម្បត្តិតទៅទៀតហើយ ៕