អ្នកវិភាគថា សមាជិកបក្សសង្រ្គោះជាតិដែលចុះចូលជាមួយបក្សប្រជាជន ដូចសម្អាតផ្ទៃក្នុងអោយបក្សសង្រ្គោះជាតិ

November 06, 2017

មន្ត្រីសង្គមស៊ីវិលដែលតាមដានព្រឹត្តិការណ៍នយោបាយ យល់ថា បើបក្សប្រឆាំងមិនត្រូវបានរំលាយទេ ពេលនោះ ចរន្តនៃអ្នកដែលរត់ចុះចូលជាមួយបក្សកាន់អំណាច គឺដូចជួយសម្អាតនូវភាពមន្ទិលផ្ទៃក្នុងបក្សដូច្នេះដែរ។ ការលើកឡើងបែបបេះ របស់អ្នកតាមដានព្រឹត្តិការណ៍នយោបាយ ខណៈដែលមន្ត្រីគណបក្សសង្គ្រោះជាតិមួយចំនួនតូចរត់ទៅចុះចូល ជាមួយគណបក្សប្រជាជនកម្ពុជា ជាបន្តបន្ទាប់ ក្រោយពីមានការអំពាវពីលោក ហ៊ុន សែន និងព្រមានថា គណបក្សប្រឆាំងនឹងត្រូវរំលាយចោល។

នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថាស្ថានការណ៍នយោបាយសព្វថ្ងៃនេះ មើលទៅឃើញថា គណបក្សសង្គ្រោះជាតិកំពុងរងគ្រោះ ប៉ុន្តែលោកថា បញ្ហានេះក៏ជាឱកាស ធ្វើឲ្យគណបក្សនេះដឹងថា មានអ្នកណាខ្លះនៅស្ម័គ្រស្មោះ និងអ្នកណាខ្លះរត់ចោលបក្សនៅពេលបក្សជួបបញ្ហា។ មន្ត្រីសង្គមស៊ីវិលរូបនេះ បន្តថា អ្នកនយោបាយដែលចេញពីគណបក្សមួយទៅគណបក្សមួយដើម្បីរក្សាអំណាច ឬដំណែងរបស់ខ្លួន គឺអ្នកធ្វើទាំងនោះធ្វើនយោបាយដើម្បីតែអំណាចនឹងបុណ្យស័ក្ដិតែប៉ុណ្ណោះ មិនមែនដើម្បីប្រជាពលរដ្ឋនោះទេ។

ការលើកឡើងបែបនេះរបស់អ្នកឃ្លាំមើលស្ថានការណ៍នយោបាយ ខណៈលោកនាយករដ្ឋមន្ត្រី ហ៊ុន សែន ស្រែកដង្ហោយហៅ តាមទូរទស្សន៍ និងហ្វេសប៊ុក (Facebook) ផង ឲ្យមន្ត្រីបក្សប្រឆាំងដែលទទួលបានតួនាទី ព្រោះការបោះឆ្នោតរបស់ពលរដ្ឋមកចុះចូលជាមួយលោក ហើយលោកនឹងរក្សាមុខដំណែងពួកគេឲ្យនៅដដែល។ ទោះយ៉ាងណាក្ដី ការលោក ហ៊ុន សែន អំពាវនាវញឹកញាប់នោះ ត្រូវបានមន្ត្រីគណបក្សសង្គ្រោះជាតិអះអាងថា មានមន្ត្រី ឬសកម្មជនរបស់ខ្លួនតិចតួចណាស់ ដែលរត់ទៅចុះចូលជាមួយលោក ហ៊ុន សែន។ សមាជិកព្រឹទ្ធសភាគណបក្សប្រឆាំង លោក សោ ចាន់ដេត ប្រាប់ថា ក្នុងចំណោមសមាជិកសភា និងក្រុមប្រឹក្សា ខេត្ត ក្រុង ស្រុក ខណ្ឌ និងឃុំសង្កាត់របស់គណបក្សសង្គ្រោះជាតិ ជិត៦ពាន់នាក់ ទើបតែមានមន្ត្រីគណបក្សសង្គ្រោះជាតិ ចុះចូលគណបក្សប្រជាជនកម្ពុជា ប្រហែលជាង ៤០នាក់ ដែលរត់ចោលជួរទាំងនោះ ភាគច្រើនតាមរយៈការអូសទាញពីមន្ត្រីគណបក្សកាន់អំណាច។ ចំណែកសមាជិកសភាមកពីគណបក្សសង្គ្រោះជាតិ លោក សួន រីដា សរសេរនៅលើហ្វេសប៊ុក ឌឺដងទៅលោក ហ៊ុន សែន ថា ការដែលលោកហ៊ុន សែន និយាយម្ដងហើយម្ដងទៀតចង់បាន ក្រុមប្រឹក្សា ឃុំ ស្រុក ខេត្ត របស់គណបក្សយកទៅធ្វើការ ប្រហែលជាលោក ហ៊ុន សែន ដឹងថា មន្ត្រីរបស់គាត់ធ្វើការបម្រើរាស្ត្រមិនកើត ទើបចង់បានមន្ត្រីបក្សប្រឆាំងទៅធ្វើការ។ ឆ្លើយតបទៅនឹងការពពាយនាយរបស់ លោក ហ៊ុន សែន អតីតប្រធានគណបក្សសង្គ្រោះជាតិ លោក សម រង្ស៊ី បានអំពាវនាវពីក្រៅប្រទេសជាថ្មីម្ដងទៀត កុំមន្ត្រីគណបក្សសង្គ្រោះជាតិ ទៅចុះចូលជាមួយគណបក្សប្រជាជនកម្ពុជា តាមការអូសទាញរបស់លោក ហ៊ុន សែន។ លោកថា សម្រេចចុះចូលបក្សកាន់អំណាចថា សម្រេចចិត្តខុសទៅនឹងឧត្ដមគតិរបស់ពលរដ្ឋម្ចាស់ឆ្នោត ដែលបោះឆ្នោតឲ្យពួកគេ មិនតែប៉ុណ្ណោះ ក៏ជាការសម្រេចចិត្តខុសទៅនឹងផលប្រយោជន៍ផ្ទាល់ខ្លួនរបស់អ្នកទាំងនោះដែរ។ «សំឡេង» ខណៈដែលលោក ហ៊ុន សែន សង្ឃឹមថា តុលាការកំពូលនឹងរំលាយគណបក្សសង្គ្រោះជាតិនៅថ្ងៃទី១៦ ខែវិច្ឆិកាខាងមុខនេះ។ សមាជិកព្រឹទ្ធសភាអាមេរិកមកពីគណបក្សសាធារណៈ និងជាអតីតបេក្ខជនប្រធានាធិបតី លោក ថិត គ្រូស (Ted Cruz) ប្រចាំរដ្ឋ តិចសាស់ (Texas) បានដាក់ឱសានវាទដល់រដ្ឋាភិបាល លោក ហ៊ុន សែន ឲ្យដោះលែងលោក កឹម សុខា ត្រឹមថ្ងៃទី៩ ខែវិច្ឆិកា ខាងមុខជាកំហិត។ ចំណែក សមាជិកក្រុមប្រឹក្សាឃុំ-សង្កាត់ និងមន្ត្រីមន្ត្រីគណបក្សសង្គ្រោះជាតិដែលស្មោះនឹងបក្សសង្គ្រោះជាតិថា សុខចិត្តទៅធ្វើស្រែ បើគណបក្សសង្គ្រោះជាតិត្រូវរំលាយ ក៏មិនចុះចូលជាមួយលោក ហ៊ុន សែន ដែរ៕