ព្រះអង្គ ប៊ុត ប៊ុនតិញ ប្រាប់តុលាការថា មិនបាច់កោះហៅព្រះអង្គរឿងនាំតែខាតក្រដាស និងពេលវេលាទេ ព្រះអង្គមិនចូលឡើយ

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការប្រាប់ទៅតុលាការថា មិនចាំបាច់កោះហៅព្រះអង្គនោះទេ រឿងបណ្ដឹងប្ដឹងសួររកលុយបុណ្យសពបណ្ឌិត កែម ឡី តាមពាក្យបណ្ដឹងដែលប្ដឹងដោយលោក ពេជ្រ ស្រស់ នោះ ។ ព្រះអង្គបញ្ជាក់ថា ទោះបីជាតុលាការកោះហៅច្រើនជាងនេះ ក៏ព្រះអង្គមិនព្រមចូលជាដាច់ខាត ។ ព្រះអង្គបន្តប្រាប់ថា ការចេញដីការកោះហៅព្រះអង្គម្ដងជាពីរដងនេះ គឺគ្មានន័យនោះទេ ហើយបើទោះបីជាច្រើនជាងនេះទៀតក៏មិនចូលដែរ នាំតែខាតពេលវេលា និងក្រដាសឥតប្រយោជន៍ប៉ុណ្ណោះ ។ មានព្រះថេរដីការប្រាប់វិទ្យុសម្លេងព្រះសង្ឃឯករាជ្យ កាលពីប៉ុន្មានថ្ងៃមុននេះ ព្រះអង្គ ប៊ុត ប៊ុនតិញ បានមានព្រះថេរដីការសង្កត់ថា ការដែលមិនចូលនេះ ព្រោះមិនដែលមាន គ្រហស្ថចាំបាច់ត្រូវកោះហៅព្រះសង្ឃអោយបំភ្លឺ ។ ព្រះអង្គចាត់ទុកថា បើសិនជាចូលទៅបំភ្លឺមែន គឺជារឿងដើរខុសលើផ្លូវព្រះពុទ្ធសាសនា ។ លើសពីនេះទៀត ព្រះអង្គថា ការណ៍ដែលសម្រេចមិនចូលខ្លួនមកបំភ្លឺនេះ ដោយសារព្រះអង្គមិនជឿជាក់លើតុលាការថា នឹងផ្ដល់យុត្តិធម៌៖ « ហៅនាំតែខាតក្រដាសទេ អាត្មាមិនចូលទៅបំភ្លឺទេ ។ ខាតពេល ហើយដើរខុសផ្លូវព្រះពុទ្ធសាសនា ។ តេលេការដុល្លារ ធ្វើការតាមអំណាចបុគ្គល » ។ សាលាដំបូងរាជធានីភ្នំពេញ កាលពីពាក់កណ្តាលខែតុលា បានកោះហៅអតីតសមាជិកគណៈកម្មការបុណ្យសព លោកបណ្ឌិត កែម ឡី ចំនួនបីនាក់ ជាលើកទី២ ក្នុងនោះ ក៏មានព្រះអង្គ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យដើម្បីយុត្តិធម៌សង្គមដែរ ដែលតម្រូវអោយចូលបំភ្លឺនៅថ្ងៃទី១៨ វិច្ឆិកា នេះ ប៉ុន្តែព្រះអង្គមិនបានចូលឡើយ។ ម្យ៉ាងគឺចំពេលដែលព្រះអង្គកំពុងមានព្រះវត្តមាននៅសហរដ្ឋអាមេរិក នៅឡើយ ៕