លោក ហ៊ុន សែន ប្រកាសអំពាវនាវកុំអោយខ្មែរអោនក្បាលដាក់បរទេស

ប្រមុខដឹកនាំរដ្ឋាភិបាលរបស់លោកនាយករដ្ឋមន្រ្តី ហ៊ុន សែន បានថ្លែងអំពាវនាវទៅកាន់ប្រជាពលរដ្ឋខ្មែរថា កុំអោយអោនក្បាលដាក់បរទេស ដើម្បីតែជំនួយរបស់បរទេសបន្តិចបន្តូចអោយសោះ ។ ថ្លែងនៅក្នុងពិធីសំណេះសំណាលជាមួយបងប្អូនកម្មករនិយោជិត ជិត២ម៉ឺននាក់ នៅតំបន់ 7NG ស្ថិតក្នុងស្រុកខ្សាច់កណ្ដាល ខេត្តកណ្ដាល នាព្រឹកថ្ងៃទី១៦ ខែវិច្ឆិកា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន អះអាងថា លោកបានប្រឹងប្រែងខ្លាំងណាស់ ដើម្បីសេចក្ដីសុខរបស់ប្រជាពលរដ្ឋខ្មែរ ។ ជាក់ស្ដែងណាស់ ដូចដែលរូបលោកបានថ្លែងជាសាធារណៈនៅក្នុងអង្គប្រជុំដែលមានមេដឹកនាំប្រទេសជាច្រើននៅលើពិភពលោកអញ្ជើញទៅចូលរួមរួមគ្នាកាលពីប៉ុន្មានថ្ងៃមុននេះ ។ លោកនាយករដ្ឋមន្រ្តី ហ៊ុន សែន ក៏ថ្លែងអះអាងដែរថា លោកមិនចង់ធ្វើជាអាយ៉ងរបស់បរទេសណាមួយឡើយ ។ លោកបានបន្ថែមថា សម្រាប់លោក លោកត្រូវការអោយប្រទេសកម្ពុជាទទួលបានសន្តិភាព ក្លាយទៅជារដ្ឋមួយដែលមានឯករាជ្យ និងមានអធិបតេយ្យភាពយ៉ាងពិតប្រាកដ ៕