អ្នកនយោបាយជើងចាស់ផ្ដាំបក្សសង្រ្គោះជាតិថា បើបែកបាក់គ្នាប្រយ័ត្នស្លាប់

អតីតឧបនាយករដ្ឋមន្រ្តី និងជាអតីតរដ្ឋមន្រ្តីក្រសួងព័ត៌មាន លោក លឺ ឡាយស្រេង បានថ្លែងផ្ដាំផ្ញើទៅកាន់គណបក្សសង្រ្គោះជាតិដែលជាដៃគូររបស់គណបក្សកាន់អំណាចថា កុំបែកបាក់គ្នាអោយ សោះ ។ លោក លឺ ឡាយ ស្រេង បានលើកឡើងបញ្ជាក់ថា ប្រសិនណាបើគណបក្សសង្រ្គោះជាតិហ៊ានតែបែកបាក់គ្នាដូចការអំពាវនាវរបស់លោកនាយករដ្ឋមន្រ្តី ហ៊ុន សែន អោយចុះចូលជាមួយនឹងគណ បក្សកាន់អំណាច ឬក៏បែកបាក់គ្នាដោយសារបញ្ហាអ្វីផ្សេងនោះ គណបក្សសង្រ្គោះជាតិប្រាកដជានឹង ស្លាប់ជាក់ជាមិនខានឡើយ ៖ « ខ្ញុំផ្ដាំទៅសង្រ្គោះជាតិថា លោកឯងអោយតែហ៊ានបែកគឺដឹងថា ស្លាប់ហើយ » ។ ការថ្លែងលើកឡើងរបស់លោក លឺ ឡាយ ស្រេង បែបនេះ ធ្វើឡើងនៅក្នុងបទសម្ភាសន៍ជាមួយនឹង វិទ្យុអាស៊ីសេរី នាយប់ថ្ងៃទី៦ខែវិច្ឆិកា ឆ្នាំ ២០១៧ នៅខណៈដែលលោកកំពុងស្នាក់នៅក្រៅប្រទេសនៅឡើយ ទាំង មានបណ្ដឹងប្ដឹងពីលោកនាយករដ្ឋមន្រ្តី ហ៊ុន សែន នៅឯកម្ពុជា ជុំវិញករណីការជេរប្រមាទអង្គព្រះមហាក្សត្រ ។ ទោះជាលោកបានផ្ដាំផ្ញើទៅគណបក្សសង្រ្គោះជាតិបែបនេះមែន ប៉ុន្តែអតីតមន្រ្តីកំពូលរបស់រដ្ឋាភិបាលចម្រុះមួយនេះហាក់ជឿជាក់ខ្ពស់ថា តាមការសង្កេតមើលទៅ គណបក្សសង្រ្គោះជាតិនឹងមិនងាយ បែក ឬមិនអាចត្រូវបានទិញយកពីជនណាបាននោះឡើយ ។ លោក លឺ ឡាយស្រេង ដែលធ្លាប់ធ្វើ នយោបាយស្ទើរអស់ពាក់កណ្ដាលជីវិតនោះ បានលើកឡើងថា ការបំបែករបស់គណបក្សកាន់អំណាចនាពេលនេះ មិនងាយដូចពេលមុនៗឡើយ ។ លោក លឺ ឡាយស្រេង ក៏បានថ្លែងចំអកដាក់ទៅលោកនាយករដ្ឋមន្រ្តី ហ៊ុន សែន ដែរថា ប្រសិនបើអួតថា ខ្លួនឯងខ្លាំងមែន ពុំមែនព្យាយាមដើរអូសទាញសមាជិករបស់គណបក្សដទៃមកអោយចុះចូល ជាមួយនឹងគណបក្សខ្លួនដើម្បីពង្រឹងអំណាចដូចពួកខ្មែរក្រហមនោះដែរ ។ លោក លឺ ឡាយស្រេង ថែមទាំងចោទប្រកាន់លោកនាយករដ្ឋមន្រ្តី ហ៊ុន សែន ថា កំពុងតែអនុវត្តគោលនយោបាយរបស់ខ្មែរ ក្រហមទៀតផង ៕