រដ្ឋាភិបាលប្រទេសអូស្ត្រាលី​ប្រាប់​រដ្ឋាភិបាល​ខ្មែរ​ជាថ្មី ហាមរំលាយបក្សសង្រ្គោះជាតិ

រដ្ឋាភិបាលនៃប្រទេសអូស្រ្តាលី បានចេញសេចក្ដីថ្លែងការណ៍ជាថ្មីម្ដងទៀត និងជាសេចក្ដីថ្លែងការណ៍ចុងក្រោយបង្អស់ នៅមុនពេលដែលតុលាការកំពូលនៅកម្ពុជានឹងបើកសវនាការបណ្ដឹងប្ដឹងរំលាយគណបក្សសង្រ្គោះជាតិពីក្រសួងមហាផ្ទៃ ។ តាមរយៈសេចក្ដីថ្លែងការណ៍ចុងក្រោយនេះ រដ្ឋាភិបាលនៃប្រទេសអូស្រ្តាលីបានហាមដាច់ខាតថា មិនអោ យរដ្ឋាភិបាលរបស់កម្ពុជា ធ្វើការរំលាយគណបក្សសង្រ្គោះជាតិ ដែលជាគណបក្សប្រឆាំងដ៏ធំមួយនៅកម្ពុជានោះទេ ។ លើសពីនេះទៀត សេចក្ដីថ្លែងការណ៍នេះ ក៏បានបង្ហាញពីក្ដីបារម្ភរបស់ពួកគេយ៉ាងខ្លាំង ជាមួយនឹងស្ថានការណ៍នយោបាយនៅកម្ពុជានាពេលបច្ចុបន្ននេះ ។ ខាងក្រោមនេះ គឺជាសេចក្ដីថ្លែងការណ៍របស់អូស្រ្តាលីទាំងស្រុង សូមអានដូចតទៅ! អូស្ត្រាលីមានការប្តេជ្ញាចិត្តខ្ពស់ ចំពោះដំណើរលទ្ធិប្រជាធិបតេយ្យ នៅកម្ពុជា និងបានបង្ហាញ ជូនរាជរដ្ឋាភិបាលកម្ពុជា នូវការព្រួយបារម្ភ ជុំវិញការវិវត្តនយោបាយ នាពេលថ្មីៗនេះ។ សកម្មភាពថ្មីបំផុត ពាក់ព័ន្ធនឹងការស្នើសុំ ឱ្យមានការរំលាយ នូវគណបក្សសង្គ្រោះជាតិ បានបង្កឲ្យមានការព្រួយបារម្ភ ជាបន្តទៀត។ ការឈានទៅរក ការលុបចោលគណបក្សប្រឆាំងធំចម្បង នឹងក្លាយជាជំហានថយក្រោយមួយ នៅក្នុងដំណើរលទ្ធិប្រជាធិបតេយ្យ ព្រមទាំងជះឥទ្ធិពល ដល់ការទទួលបានការបោះឆ្នោតជាតិ ដែលសេរី យុត្តិធម៌ និងមានតម្លាភាព នាខែកក្កដា ឆ្នាំ២០១៨ខាងមុខ។ ការប្តេជ្ញាចិត្តដ៏រឹងមាំ របស់ប្រជាពលរដ្ឋកម្ពុជា ចំពោះលទ្ធិប្រជាធិបតេយ្យពហុបក្ស បានបង្ហាញយ៉ាងច្បាស់ តាមរយៈចំនួនប្រជាពលរដ្ឋដែលបានទៅបោះឆ្នោត និងលទ្ធផលនៃការបោះឆ្នោតឃុំ-សង្កាត់ នាខែមិថុនា ឆ្នាំ២០១៧កន្លងទៅ។ អូស្ត្រាលីសូមលើកទឹកចិត្តដល់កម្ពុជា ក្នុងការផ្តល់នូវបរិយាកាសអំណោយផល និងប្រកបដោយសុវត្ថិភាព ជូនប្រជាជនកម្ពុជា ដើម្បីអនុវត្តនូវសិទ្ធិសេរីភាព ក្នុងការបញ្ចេញមតិ និងការប្រមូលផ្តុំ។ វិស័យសារព័ត៌មានដែលរស់រវើក សង្គមស៊ីវិលដែលសកម្ម និងគណបក្សប្រឆាំង ដែលអាចជឿជាក់បាន ជាសមាសធាតុនៃសង្គមប្រជាធិបតេយ្យ។