fROM RFA ប្រធានអង្គការសហព័ន្ធនិស្សិតបញ្ញវន្តកម្ពុជា ប្រតិកម្មចំពោះក្រសួងមហាផ្ទៃ ដែលសម្រេចផ្អាកសកម្មភាពរបស់អង្គការរបស់ខ្លួន ក្រោមហេតុផលអនុវត្តបំពានច្បាប់។ អង្គការសង្គមស៊ីវិល ដែលឃ្លាំមើលដំណើរតម្លាភាពសង្គម យល់ឃើញថា នេះជាការអនុវត្តច្បាប់ដ៏ប្រញាប់ពេករបស់ក្រសួងមហាផ្ទៃ។
ប្រធានអង្គការសហព័ន្ធនិស្សិតបញ្ញវន្តកម្ពុជានៅពេលនេះកំពុងលាក់ខ្លួន នៅក្នុងទីតាំងដែលមានសុវត្ថិភាព ក្រោយពេលអាជ្ញាធរក្រុងភ្នំពេញ ព្រមានចាត់ការតាមផ្លូវច្បាប់ ប្រឆាំងផែនការធ្វើបាតុកម្មដោយសន្តិភាពវិធី ប្រសិនបើគណបក្សសង្គ្រោះជាតិ ត្រូវរំលាយទៅតាមគម្រោងរបស់លោក ហ៊ុន សែន មែន។
លោក ឡេង សេងហុង ឲ្យដឹងនៅថ្ងៃទី១ ខែវិច្ឆិកា ថា នៅពេលនេះរូបលោកកំពុងរត់គេចពីការតាមចាប់ខ្លួន ដែលអនុវត្តដោយក្រុមសមត្ថកិច្ចក្រុងភ្នំពេញ។ លោកបន្តថា ការពន្លឿននីតិវិធីតាមផ្លូវតុលាការ និងបង្ខំផ្អាកសកម្មភាពអង្គការ សហព័ន្ធនិស្សិតបញ្ញវន្តកម្ពុជា នេះបង្ហាញថា ក្រសួងមហាផ្ទៃកំពុងអនុវត្តច្បាប់ដោយបំពាន។
លោក ឡេង សេងហុង អះអាងថា ការអនុវត្តច្បាប់ដោយក្រសួងមហាផ្ទៃនេះ គឺមិនស្មើភាពគ្នាទាល់តែសោះ ក្នុងពេលដែលលោកប្រកាសធ្វើបាតុកម្ម ដោយសន្តិវិធីភ្លាមៗ ព្រះរាជអាជ្ញារងលោក សៀង សុខ បានចេញដីកាបង្គាប់ឲ្យបង្ហាញខ្លួននៅមុខសមត្ថកិច្ច។ ផ្ទុយទៅវិញ បណ្ដឹងដែលលោកធ្លាប់ប្ដឹងទៅក្រសួងមហាផ្ទៃ កាលពីខែសីហា ឆ្នាំ២០១៦ ឲ្យពិនិត្យលើសកម្មភាពអង្គការយុវជនកិច្ចការសង្គម របស់នាង ធី សុវណ្ណថា ធ្វើលើសពីច្បាប់ ចូលជ្រៅទៅក្នុងរឿងនយោបាយ បែរជាក្រសួងមហាផ្ទៃ បន្តនៅស្ងប់ស្ងាត់ និងធ្វើមិនដឹងមិនឮ រហូតមកដល់ពេលនេះ។
ការសម្រេចផ្អាកសកម្មភាពរបស់ស្ថាប័នសហព័ន្ធនិស្សិតបញ្ញវន្តកម្ពុជា កាលពីថ្ងៃទី៣១ ខែតុលា ដោយលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃនោះ ធ្វើឡើងភ្លាមៗ នៅពេលលោក ឡេង សេងហុង ប្រកាសធ្វើបាតុកម្ម ដោយសន្តិវិធីប្រឆាំងការរំលាយបក្សសង្គ្រោះជាតិ។ នៅក្នុងលិខិតដែលចុះហត្ថលេខា របស់លោក ស ខេង បានចោទប្រកាន់ថា ស្ថាប័នដែលមិនរកប្រាក់កម្រៃក្រៅរដ្ឋាភិបាល របស់លោក ឡេង សេងហុង នេះអនុវត្តរំលោភច្បាប់។
នេះមែនមែនជារឿងថ្មីទេ ដែលរដ្ឋាភិបាលរបស់លោក ហ៊ុន សែន កម្ទេចសំឡេងសង្គមស៊ីវិល ដែលតែងរិះគន់ និងធ្វើការលើវិស័យនយោបាយ។ កាលពីដើមខែ កញ្ញា រដ្ឋាភិបាលសម្រេចបិទទ្វារ វិទ្យាស្ថានជាតិប្រជាធិបតេយ្យ NDI ដោយចោទប្រកាន់ថា វិទ្យាស្ថានដែលគាំទ្រថវិកាពីសហរដ្ឋអាមេរិកនេះ នៅពីក្រោយខ្នង នៃបេសកកម្មរៀបចំបដិវត្តពណ៌ប្រឆាំងនិងរដ្ឋាភិបាល របស់គណបក្សសង្គ្រោះជាតិ។
នៅថ្ងៃទី១៥ ខែកញ្ញា លោក ប៉ុល លឹម រដ្ឋលេខាធិការក្រសួងមហាផ្ទៃ ក៏បានចេញប្រកាសលុបឈ្មោះ អង្គការមាតាធម្មជាតិ ចេញពីបញ្ជីឈ្មោះអង្គការ សមាគមមិនមែនរដ្ឋាភិបាល។ ហើយការប្រើកណ្ដាប់ដៃចុងក្រោយ របស់ក្រសួងមហាផ្ទៃ គឺផ្អាកសកម្មភាពបណ្ដោះអាសន្ន របស់អង្គការសមធម៌កម្ពុជា កាលពីថ្ងៃទី២៨ ខែកញ្ញា។ ការបិទទ្វារ និងការផ្អាកសកម្មភាពបណ្ដោះអាសន្ន ប្រឆាំងនឹងក្រុមសង្គមស៊ីវិលទាំងនេះ ក្រោមហេតុផលអះអាងតែម្យ៉ាងគត់ គឺអនុវត្តផ្ទុយទៅនិងច្បាប់ស្ដីពីអង្គការ-សមាគមមិនមែនរដ្ឋាភិបាល។
លោក សន ជ័យ ប្រធានអង្គការសម្ព័ន្ធគណនេយ្យភាពកម្ពុជា យល់ឃើញថា មុននឹងផ្អាកសកម្មភាពរបស់អង្គការណាមួយ ឬដាក់ឲ្យស្ថាប័នណាមួយស្ថិតក្រោមការតាមដានពីកម្លាំងសមត្ថកិច្ច យ៉ាងហោចណាស់ក្រសួងមហាផ្ទៃ ត្រូវបើកការពិគ្រោះយោបល់ជាមុនសិនដែរជាមួយភាគីដែលត្រូវចោទប្រកាន់នោះ។
លិខិតផ្អាកសកម្មភាពរបស់លោក ស ខេង ដែលសម្រេចឲ្យអង្គការសហព័ន្ធនិស្សិតបញ្ញវន្តកម្ពុជា មិនដំណើរការក្នុងរយៈពេល៦០ថ្ងៃ គឺស្នើឲ្យស្ថាប័នក្រៅរដ្ឋាភិបាលមួយនេះ ត្រូវបំពេញបែបបទមួយចំនួនឡើងវិញ។ ក្រសួងមហាផ្ទៃយល់ឃើញថា អង្គការនេះ ក្រៅពីអនុវត្តលើសពីមាត្រាច្បាប់ស្ដីពី អង្គការ-សមាគមហើយ ក្នុងនោះថែមទៀត មិនបានបំពេញតាមទៅតាមលក្ខខណ្ឌមួយចំនួនទៀត ដូចជា របាយការណ៍ហិរញ្ញវត្ថុ និងសកម្មភាពការងារជាដើម។
បញ្ហានេះ ត្រូវបានលោក ឡេង សេងហុង បញ្ជាក់ថា លោកនឹងបំពេញបែបបទមួយចំនួន ទៅតាមការទាមទារ របស់ក្រសួងមហាផ្ទៃ ក្នុងអំឡុងពេល ៦០ថ្ងៃនេះ។ ប៉ុន្តែលោកមានជំនឿថា ការស្នើរបស់ក្រសួងមហាផ្ទៃនេះ គ្រាន់តែជាការបិទបាំង ចំពោះការអំពាវនាវរបស់លោក ដែលស្នើឲ្យមានបាតុកម្ម ដោយអហិង្សាប៉ុណ្ណោះ។ លោក ឡេង សេងហុង បញ្ជក់ជំហរថា ការធ្វើបាតុកម្មដោយសន្តិវិធី ដែលបង្ហាញការមិនពេញចិត្ត ទៅនឹងគម្រោងរំលាយបក្សប្រឆាំង តាមការចង់បានរបស់លោក ហ៊ុន សែន នោះនឹងមិនដូរទិសដៅឡើយ ប្រសិនបើគណបក្សសង្គ្រោះជាតិ ពិតជាត្រូវរំលាយមែន។ លោកថា បំណងប្រាថ្នារបស់លោកមិនមែនចង់ការពារគណបក្សសង្គ្រោះជាតិទេ ប៉ុន្តែគឺដើម្បីការពារលទ្ធិប្រជាធិបតេយ្យនៅកម្ពុជាដែលកូនខ្មែរគ្រប់រូបមានសិទ្ធិចូលរួមការពារស្របតាមរដ្ឋធម្មនុញ្ញដែលជាច្បាប់កំពូលនៃជាតិ៕
Comments
Post a Comment