ហុង សុខហួរ៖ ជិត ២ ឆ្នាំគេយកខ្ញុំទៅដាក់ជាមួយទណ្ឌិតជាឧក្រិដ្ឋជនចោរប្លន់ចោរលួច

November 02, 2017

ជាអ្នកទោសនយោបាយជាប់ពន្ធនាគារប្រមាណជាង ២ ឆ្នាំអតីតសមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ ដែលមានទោសពាក់ព័ន្ធនឹងរឿងព្រំដែនដ៏រសើបនោះត្រូវបានឃុំក្នុងបន្ទប់ពន្ធនាគារព្រៃសតូចចង្អៀតមួយឡូកឡំជាមួយក្រុមឧក្រិដ្ឋជនក្នុងបទល្មើសផ្សេងៗរយៈពេលប្រមាណជាង ១ ឆ្នាំកន្លះមុនបញ្ជូនមកឃុំក្នុងបន្ទប់តូចមួយទៀតជាមួយអ្នកទោសនយោបាយជាង ១០ នាក់ដែលជាសហការីរបស់ខ្លួននៅក្នុងបក្សប្រឆាំងជាមួយគ្នាក្នុងរយៈពេល ៦ ខែចុងក្រោយមុនត្រូវដោះលែង។ តាមការរៀបរាប់របស់លោក ហុង សុខហួរ ជីវិតរស់នៅក្នុងពន្ធនាគាររយៈពេល ២ ឆ្នាំ ២ ខែ ១០ ថ្ងៃក្រៅពីសិទ្ធិសេរីភាព និងការទំនាក់ទំនងជាមួយក្រុមគ្រួសារមិត្តភក្តិត្រូវបានកាត់ផ្តាច់ការអនុញ្ញាតឲ្យមានទំនាក់ទំនងតាមទូរស័ព្ទភ្ជាប់ជញ្ជាំងម្តងម្កាលទៅក្រុមគ្រួសារញាតិមិត្តក្នុងករណីចាំបាច់នោះក៏មានការលំបាកទាក់ទងខ្លាំងផងដែរ ហើយទាំងថ្លៃសេវាប្រើប្រាស់ក៏មានតម្លៃខ្ពស់ដោយ ៣ ដុល្លារប្រើបានប្រហែល ១០ នាទីប៉ុណ្ណោះ ឯអ្នកទោសមិនមានលុយគ្រប់គ្រាន់ក្នុងការចំណាយផ្សេងៗនោះទេ។ From Phnom Penh Post ៖ នៅពេលសួរថាតើការប្រើប្រាស់ទូរស័ព្ទបែបនេះអាចនឹងមានការលួចស្តាប់ ឬថតសំឡេងដែរយ៉ាងណានោះលោក ហុង សុខហួរ បញ្ជាក់ថាលោកមិនច្បាស់អំពីបញ្ហានេះទេ ប៉ុន្តែថាបើតាមអ្នកទោសមុនៗធ្លាប់ប្រើគឺថាអាចមានការលួចស្តាប់ក្រែងមានការនិយាយខុសពីបទបញ្ជាផ្ទៃក្នុងរបស់ពន្ធនាគារ។ ឯទណ្ឌិតដែលនិយាយទូរស័ព្ទភ្ជាប់ជញ្ជាំងនោះគឺមានអារម្មណ៍ផ្តោតទៅលើការលួចស្តាប់ព្រោះទូរស័ព្ទដាក់លើជញ្ជាំងគឺដើម្បីឲ្យទណ្ឌិតងាយស្រួលប្រើប្រាស់ ប៉ុន្តែមិនអាចនិយាយបានក្បោះក្បាយដោយមិនមានការបារម្ភនោះទេ។ លោក ហុង សុខហួរ បញ្ជាក់ថា៖ «ជាទូទៅទូរស័ព្ទដៃមិនអនុញ្ញាតឲ្យមានទេ។ បើសិនជាគេរកឃើញថាយើងមានទូរស័ព្ទដៃគេចាប់យើងយកទៅដាក់បន្ទប់វិន័យ។ បន្ទប់វិន័យហ្នឹងគឺគុកនៅក្នុងគុកមានន័យថាពិបាកអត់មានទឹកមុជ សម្ភារមិនអាចយកទៅបាន។ យកទៅតែខោខ្លីមួយអាវមួយកន្សែងមួយពិបាកមែនទែន»។ បើតាមលោក សុខហួរ ការដាក់ទណ្ឌកម្មបន្ថែមដោយប្រើប្រាស់គុកនៅក្នុងគុក ឬបន្ទប់វិន័យដើម្បីឃុំទណ្ឌិតបន្តពីរកម្រិតនេះគឺដោយសារទណ្ឌិតនោះប្រើប្រាស់ទូរស័ព្ទដៃ ប្រើប្រាស់គ្រឿងញៀនវាយគ្នាឈ្លោះគ្នា។ អ្នកណាដែលប្រព្រឹត្តខុសនឹងបទបញ្ជាពន្ធនាគារនឹងត្រូវដាក់នៅក្នុងបន្ទប់វិន័យដែលករណីប្រើប្រាស់ទូរស័ព្ទដៃគឺត្រូវឃុំក្នុងបន្ទប់វិន័យ ២ សប្តាហ៍ ឯករណីផ្សេងៗទៀតលោក សុខហួរ មិនច្បាស់ថានឹងត្រូវឃុំប៉ុន្មានថ្ងៃនៅក្នុងគុកពីរជាន់នោះទេ។ សម្រាប់រូបលោកមិនធ្លាប់ត្រូវបានដាក់ទណ្ឌកម្មដោយការឃុំនៅក្នុងបន្ទប់វិន័យនោះឡើយតែមានសហការីលោកម្នាក់ធ្លាប់ត្រូវបានដាក់ទណ្ឌកម្មនេះ។ លោក ហុង សុខហួរ អះអាងថា៖ «ជិត ២ ឆ្នាំគេយកខ្ញុំទៅដាក់ជាមួយទណ្ឌិតដែលជាឧក្រិដ្ឋជនមានចោរលួច ចោរប្លន់ ខ្ញុំទៅនៅជាមួយពួកហ្នឹងជិត ២ ឆ្នាំ។ ទម្រាំ ៦ ខែចុងក្រោយបានគេយកខ្ញុំទៅដាក់នៅបន្ទប់មួយទៀតជាមួយនឹងសង្គ្រោះជាតិទាំងអស់គ្នា ១៤ នាក់»។ បើតាមការឲ្យដឹងការឃុំជាមួយក្រុមចោរប្លន់ចោរលួចគឺថ្ងៃដំបូងលោក ហុង សុខហួរ ត្រូវបានឃុំនៅក្នុងបន្ទប់ទំហំប្រហែល ៥ ម៉ែត្រគុណ ៦ ម៉ែត្រដោយឡូកឡំជាមួយនឹងទណ្ឌិតប្រមាណ ៣០ នាក់ហើយក្រោយមកក៏មានការសម្រួលមកនៅជិត ២០ នាក់មុនត្រូវបានយកមកឃុំជាមួយសហការីសង្គ្រោះជាតិទាំងអស់គ្នានៅក្នុងបន្ទប់ដែលមានទំហំប្រហែលជិត ២ ម៉ែត្រគុណ ១០ ម៉ែត្រ។ ទោះជាយ៉ាងណាបើតាមលោកសុខហួរគឺមានការឲ្យតម្លៃ និងយោគយល់ច្រើនពីមន្ត្រីពន្ធនាគារចំពោះក្រុមរបស់លោកដែលជាអ្នកទោសនយោបាយ។ លោក សុខហួរ ថ្លែងថា៖ «ដូច្នេះគេមិនបានប្រៀបធៀបយើងទៅនឹងទណ្ឌិតដទៃទេ។ អាហ្នឹងគឺជាចំណុចមួយដែលវិជ្ជមានគួរឲ្យសរសើរនៅក្នុងពន្ធនាគារ។»។ ប៉ុន្តែនៅពេលសួរថាក្រោយពីជាប់ពន្ធនាគារជាង ២ ឆ្នាំអាចធ្វើឲ្យលោកបាក់ស្មារតីក្នុងការបន្តជីវិតនយោបាយទៀត ឬយ៉ាងណានោះលោក សុខហួរ ហាក់ស្ទាក់ស្ទើរក្នុងការឆ្លើយដោយនិយាយថា៖ «មិនស្រួលទេនៅក្នុងពន្ធនាគារ បើយើងចៀសបានយើងត្រូវតែចៀសទៅ។ បើចៀសមិនរួចអាហ្នឹងមិនដឹងធ្វើម៉េចទេ។ ជាបទពិសោធមួយដែលយើងបានជាប់នៅក្នុងពន្ធនាគារហើយយើងនិយាយស្តីឲ្យមានការប្រុងប្រយ័ត្នថ្លឹងថ្លែងមុននឹងនិយាយទង្វើទាំងឡាយក៏ត្រូវថ្លឹងថ្លែងដែរ។ ដូច្នេះជាមេរៀនដែលអ្នកនយោបាយម្នាក់ៗត្រូវរៀនសូត្រ»។ ស្ថិតក្នុងវ័យ ៥៩ ឆ្នាំអតីតអ្នកទោសនយោបាយដែលមានសញ្ជាតិបារាំងរូបនេះនៅមិនទាន់សម្រេចចិត្តចូលប្រឡូកក្នុងឆាកនយោបាយវិញទេក្រោយពីបានលាលែងពីតំណែងសមាជិកព្រឹទ្ធសភាពីសមាជិកគណបក្ស សម រង្ស៊ី និងពីសមាជិកគណៈកម្មាធិការនាយកនៃគណបក្សប្រឆាំងនេះ ខណៈដែលគណបក្សសង្គ្រោះជាតិជាបក្សប្រឆាំងដ៏ធំមួយផងដែរ ដែលជាជម្រើសមួយទៀតរបស់លោកកំពុងប្រឈមនឹងការរំលាយនោះ។ លោក ហុង សុខហួរ ត្រូវបានព្រះមហាក្សត្រ នរោត្តម សីហមុនី ព្រះរាជទានលើកលែងទោសកាលពីថ្ងៃទី ២៥ ខែតុលាតាមសំណើរបស់លោកនាយករដ្ឋមន្ត្រី ហ៊ុន សែន បន្ទាប់ពីលោកសរសេរលិខិតសម្តែងការសោកស្តាយទៅលោក ហ៊ុន សែន ដោយទទួលស្គាល់នូវការប្រព្រឹត្តរបស់ខ្លួនមិនត្រឹមត្រូវចំពោះគោលនយោបាយដឹកនាំរបស់លោក ហ៊ុន សែន ពាក់ព័ន្ធនឹងបញ្ហាបោះបង្គោលព្រំដែនកម្ពុជា-វៀតណាម។ តើអ្វីនៅពីក្រោយការដោះលែងលោក ហុង សុខហួរ? នេះជាចម្ងល់មួយចំពោះការដោះលែងនេះ។ ឯអ្នកនយោបាយខ្លះផ្តោតទៅលើសម្ពាធនយោបាយពីអន្តរជាតិដោយសារមានសម្ពាធខ្លាំងពីអន្តរជាតិដែលជំរុញឲ្យលោក ហ៊ុន សែន ព្រមដោះលែងលោក ហុង សុខហួរ។ មតិខ្លះយល់ថាការដោះលែងនេះជាថ្នូរនឹងការចុះចូលជាមួយគណបក្សប្រជាជនកម្ពុជារបស់លោក ហ៊ុន សែន ប៉ុន្តែមន្ត្រីបក្សកាន់អំណាចច្រានចោលការលើកឡើងបែបនេះដោយឆ្លើយតបវិញថាការសុំព្រះរាជទានលើកលែងទោសពីព្រះមហាក្សត្រតាមសំណើលោក ហ៊ុន សែន គឺដោយសារលោក ហុង សុខហួរ ទទួលស្គាល់កំហុសរបស់ខ្លួនដែលបានប្រព្រឹត្តហើយដែលធ្វើឲ្យលោក ហ៊ុន សែន មានមនោសញ្ចេតនាអាណិតអាសូរក៏សម្រេចសុំព្រះមហាក្សត្រលើកលែងទោសចំពោះលោក សុខហួរ។ ប៉ុន្តែលោក ហុង សុខហួរ បញ្ជាក់ថា៖ «[ការដោះលែងនេះ] ខ្លួនខ្ញុំផ្ទាល់មិនមានសម្ពាធអ៊ីចឹងទេ ក៏មិនមានការអូសទាញអីដែរ។ ខ្ញុំមិនដឹងថាយ៉ាងណាទេចំពោះអ្នកដទៃ»។ លោក ហុង សុខហួរ ត្រូវបានចាប់ខ្លួនដាក់ពន្ធនាគារកាលពីថ្ងៃទី ១៥ ខែសីហា ឆ្នាំ ២០១៥ ដោយចោទប្រកាន់ពីបទក្លែងឯកសារសាធារណៈ និងប្រើប្រាស់ឯកសារសាធារណៈក្លែងពាក់ព័ន្ធនឹងការផ្សាយនៅលើបណ្តាញសង្គមនូវរឿងរសើបនៃបញ្ហាព្រំដែនកម្ពុជា-វៀតណាម។ លោក សុខហួរ បានចាកចេញពីប្រទេសកម្ពុជាទៅរស់នៅប្រទេសបារាំងនាខែមករា ១៩៧៩ ហើយបានសិក្សាជំនាញវិស្វករផ្នែកព័ត៌មានវិទ្យាកម្រិតអនុបណ្ឌិតនៅទីផ្សារភាគហ៊ុនប្រទេសបារាំង។ តាមការឲ្យដឹងលោក ហុង សុខហួរ មានអាការជំងឺលើសឈាមហើយក្រោយចេញពីពន្ធនាគារលោកនឹងចាកចេញទៅប្រទេសបារាំងក្នុងពេលឆាប់ៗនេះដើម្បីពិនិត្យសុខភាពតាមការណាត់របស់វេជ្ជបណ្ឌិត។ ងាកទៅរកការរំលាយគណបក្សសង្គ្រោះជាតិពីសំណាក់ គណបក្សកាន់អំណាច បើទោះបីច្បាប់ត្រូវបានព្រះមហាក្សត្រឡាយព្រះហស្តលេខាដាក់ឲ្យប្រើប្រាស់ហើយក៏ដោយ ប៉ុន្តែសម្រាប់លោក ហុង សុខហួរ នៅមានសុទិដ្ឋិនិយមថាគណបក្សប្រឆាំងដ៏ធំមួយនេះនឹងមិនអាចរំលាយបានទេ ដោយសារថាការរំលាយនេះវាមិនចំណេញអ្វីចំពោះគណបក្សកាន់អំណាចរបស់លោក ហ៊ុន សែន នោះឡើយ៕