មិនដឹងនិយាយយ៉ាងម៉េច !!! ក្រសួងមហាផ្ទៃបញ្ជាអោយកម្លាំងត្រៀមឯកសណ្ឋាន​ប្រយុទ្ធថ្ងៃសវនាការរំលាយបក្សប្រឆាំង

រដ្ឋាភិបាលកម្ពុជា តាមរយៈក្រសួងមហាផ្ទៃបាន​ប្រកាសប្រាប់ទៅដល់កងកម្លាំងគ្រប់ប្រភេទថា អោយបន្ថែមកម្លាំងការពារសន្ដិសុខ និងត្រៀមឯកសណ្ឋាន​សម្រាប់លក្ខណៈប្រយុទ្ធជាមួយនឹងក្រុមដែលចង់ប្រឆាំងនឹងការកាត់ក្ដរបស់តុលាការសាលាកំពូលលើករណីបណ្ដឹងរំលាយគណបក្សសង្រ្គោះជាតិ ។ នេះបើយោងតាមសេចក្ដីជូនដំណឹងដែលធ្វើឡើងដោយក្រសួងមហាផ្ទៃចេញផ្សាយកាលពីថ្ងៃ ទី៨ វិច្ឆិកា កន្លងទៅថ្មីៗនេះ ។ ក្នុងសេចក្ដីជូនដំណឹងដដែលនេះ ក្រសួងមហាផ្ទៃ បានបញ្ជាឲ្យនាយកដ្ឋានសណ្ដាប់ធ្នាប់សាធារណៈ បន្ថែមកម្លាំងការពារសន្ដិសុខ និងយាមល្បាត សម្រាប់រយៈពេល៣ថ្ងៃ ពីថ្ងៃទី១៥ ដល់ថ្ងៃទី១៧ខែវិច្ឆិកា ។ ការណែនាំរបស់ក្រសួងមហាផ្ទៃទៅកាន់កងកម្លាំងនេះ គឺធ្វើឡើងនៅចំពេលដែលស្ថានការណ៍នយោបាយកំពុងតានតឹង ។ ជាពិសេសគឺចំពេលដែលតុលាការសាលាកំពូលនឹងបើកសវនាការបណ្ដឹងរំលាយគណបក្សសង្រ្គោះជាតិពីក្រសួងមហាផ្ទៃ ។ សេចក្ដីជូនដំណឹងដែលធ្វើឡើងដោយ ក្រសួងមហាផ្ទៃ ក៏បានបញ្ជាឲ្យ កម្លាំងនគរបាលប្រមូលផ្ដុំ ត្រៀមអនុវត្តតាមបទបញ្ជា ក្នុងករណីចាំបាច់ ហើយក្រុមប្រចាំការ ត្រូវតម្រូវឲ្យស្លៀកពាក់ឯកសណ្ឋានត្រៀមប្រយុទ្ធ និងត្រូវធ្វើរបាយការណ៍ស្ដីពីសភាពការណ៍នានា ជូនទៅនាយកដ្ឋានកណ្ដាលសណ្ដាប់ធ្នាប់សាធារណៈ ៕