សំណើចប្រចាំសប្ដាហ៍ !!!! រដ្ឋាភិបាលស ថា ការកាត់ជំនួយចេញពីកម្ពុជា ដោយសារពលរដ្ឋខ្មែរមានចំណូលខ្ពស់

November 07, 2017

ផលិតផលក្នុងស្រុកសរុបសម្រាប់មនុស្សម្នាក់នៅកម្ពុជា (GDP per capita) មានចំនួនលើសពី ១០០០ដុល្លារ ដូច្នេះអង្គការ និងម្ចាស់ជំនួយភាគច្រើន បានបញ្ឈប់ការផ្ដល់ជំនួយ និងមួយចំនួនបានកាត់បន្ថយជំនួយ ដោយសារកម្ពុជាជាប្រទេសដែលមានប្រាក់ចំណូលមធ្យមកម្រិតទាប ។ នេះជាការលើកឡើងរបស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ នៅទីស្តីការក្រសួងមហាផ្ទៃ ក្នុងកិច្ចប្រជុំគណៈកម្មការជំរឿនទូទៅប្រជាជននៅកម្ពុជា ឆ្នាំ២០១៩ នាព្រឹកថ្ងៃទី៧ ខែវិច្ឆិកា ឆ្នាំ២០១៧ ។

ការលើកឡើងរបស់លោកប្រមុខមហាផ្ទៃខាងលើនេះដែរមានធ្វើឡើងមួយថ្ងៃប៉ុណ្ណោះ បន្ទាប់ពីយប់ថ្ងៃទី០៦ ខែវិច្ឆិកា ស្ថានទូតអាមេរិកបានសម្រេចកាត់ផ្តាច់ជំនួយមនុស្សធម៌របស់ខ្លួនមកមជ្ឈមណ្ឌលកម្ចាត់មីនកម្ពុជា(ស៊ីម៉ាក់ CMAC)ចាប់ពីដើម ខែមករា ឆ្នាំ២០១៨ខាងមុខតទៅ ដោយគ្មានការបញ្ជាក់ហេតុផលអ្វីច្បាស់លាស់ឡើយ ខណៈថវិកាជំនួយសម្រាប់បោសសំអាតគ្រាប់បែករបស់អាមេរិកដែលទំលាក់លើទឹកដីខ្មែរ ដែលមានទឹកប្រាក់ប្រមាណ ២.៥លានដុល្លារក្នុង១ឆ្នាំៗ ។

នេះបើយោងតាមអគ្គនាយកនៃមជ្ឈមណ្ឌលកម្ចាត់មីនកម្ពុជា លោក ហេង រតនា ដែលស្រង់សម្តីមន្ត្រីអង្គការ NPA ដែលជាអង្គការដៃគូជាមួយស៊ីម៉ាក់ ប្រាប់ Fresh News នៅយប់ថ្ងៃទី០៦ ខែវិច្ឆិកា ឆ្នាំ២០១៧នេះ ។ យោងតាមស្ថិតិរបស់មូលនិធិរូបិយវត្ថុអន្តរជាតិ (IMF) និងធនាគារពិភពលោកបានបង្ហាញថា ក្នុងឆ្នាំ២០១៦ GDP per capital របស់កម្ពុជា គឺមានជាង ១២២៨ដុល្លារអាមេរិក កើនឡើង ៨៣ដុល្លារបើធៀបឆ្នាំ២០១៥ ប៉ុន្តែបើប្រៀបធៀបទៅនឹងប្រទេសក្នុងតំបន់អាស៊ាន ប្រាក់ចំណូលខាងលើនេះខ្មែរនៅទាបជាងគេទាំងអស់ ៕