កូនប្រុសលោក អេង​ ឆៃអ៊ាង ៖ កឹម សុខា បោកទាំង សម រង្ស៊ី ហើយថែមទាំងហ៊ានបោកដល់ ហ៊ុន សែន ទៀត កឹម សុខា នឹងដឹកនាំប្រទេស ទៅរកសភាពធ្ងន់ធ្ងរជាង ហ៊ុន សែន ទៀតផង

អនុប្រធានគណបក្សសង្រ្គោះជាតិ លោក អេង ឆៃអ៊ាង បានបង្ហោះសារនៅលើហ្វេសប៊ុករបស់លោក ធ្វើការសុំទោសប្រជាពលរដ្ឋអ្នកគាំទ្រគណបក្សសង្រ្គោះជាតិ ជំនួសអោយកូនប្រុសបង្កើតរបស់លោក ។ ការសុំទោសជំនួសពីលោក អេង ឆៃអ៊ាង ទៅលើអ្នកគាំទ្រគណបក្សសង្រ្គោះជាតិនេះ ធ្វើឡើងបន្ទាប់ពីលោក អេង រតនៈ ដែលជាកូនប្រុសរបស់លោក បានបង្ហោះសារនៅលើគណនីបណ្ដាញសង្គមហ្វេ សប៊ុករបស់គេ រិះគន់ និងវាយប្រហារលោក កឹម សុខា ប្រធានគណបក្សសង្រ្គោះជាតិ ដែលកំពុងជាប់ឃុំយ៉ាងចាស់ដៃ ជាហេតុធ្វើអោយមានការខឹងសម្បារពីអ្នកគាំទ្រគណបក្សសង្រ្គោះជាតិមួយចំនួ នផងដែរ ។ លោក អេង ឆៃអ៊ាងអោយដឹងបែបនេះ ៖ « ខ្ញុំ អេង ឆៃអ៊ាង ជាឪពុកលោក អេង រតនៈ សូមអភ័យទោសចំពោះអ្នកគាំទ្រគណបក្សសង្គ្រោះជាតិទាំងក្នុង និងក្រៅប្រទេស ជំនួសកូនប្រុសរបស់ខ្ញុំ ដែលបានសរសេរ និងឆ្លើយឆ្លង ដោយចោទប្រកាន់មិនត្រឹមត្រូវ លើលោកប្រធាន កឹម សុខា នៅក្នុងគណនីហ៊្វេសប៊ុករបស់គាត់ » ។ សារចេញមុខរបស់លោក អេង ឆៃអ៊ាង ជាសាធារណៈបែបនេះ ធ្វើឡើងនៅលើគណនីហ្វេសប៊ុករបស់លោកដោយផ្ទាល់ កាលពីថ្ងៃទី២ វិច្ឆិកា កន្លងទៅថ្មីៗនេះ ខណៈដែលរូបលោកកំពុងមានវត្តមាននៅក្រៅប្រទេសនៅឡើយ ។ កាលពីប៉ុន្មានថ្ងៃមុននេះ យុវជន អេង រតនៈ បានសរសេរលើកឡើងថា លោក កឹម សុខា កុហកទី១ ពេលបង្កើតបក្ស ទី២ ពេលធ្វើប្រធានមតិភាគតិច ទី៣ ឃាត់នៅព្រលានយន្តហោះ បង្ហោះថា បានជួបអង្គទូតច្រើនសិប នៅថៃ ។ នៅមានពាក្យពេជន៍រាប់សិបទៀត ដែលយុវជន រតនៈ និយាយចេញខ្លាំងៗ ដូចជា «កឹម សុខា បោកទាំង សម រង្ស៊ី ហើយថែមទាំងហ៊ានបោកដល់ ហ៊ុន សែន ទៀត!» ឬឃ្លាដូច្នេះ «កឹម សុខា ជាមនុស្សគ្មានគុណធម៌ កលល្បិច ពិសពុល និងអមនុស្សធម៌សម្រាប់នរណា ដែលមិនបម្រើផលប្រយោជន៍គាត់ »។ លើសពីនេះទៀត លោក អេង រតនៈ ថែមទាំងលើកឡើងថា លោក កឹម សុខា នឹងដឹកនាំប្រទេស ទៅរកសភាពធ្ងន់ធ្ងរជាង ហ៊ុន សែន ទៀតផង ព្រោះ កឹម សុខា មិនមែនធ្វើ ដើម្បីជាតិពិតប្រាកដឡើយ កឹម សុខា ធ្វើដើម្បីខ្លួនឯងច្រើនជាង ៕