អាជ្ញាធររាជធានីភ្នំពេញប្រកាសព្រមានអ្នកទទួលផ្ញើម៉ូតូយកថ្លៃហួសហេតុ ខណៈកន្លែងផ្ញើខ្លះឡើងដល់៨ពានរៀលម្ដង

រដ្ឋបាលសាលារាជធានីភ្នំពេញបានចេញសេចក្ដីអំពាវនាវមួយដល់ប្រជាពលរដ្ឋ ជាពិសេសគឺសម្ដៅដល់អ្នកដែលទទួលផ្ញើម៉ូតូ ។ តាមសេចក្ដីប្រកាសព័ត៌មានដែលធ្វើឡើងដោយរដ្ឋបាលរាជធានីភ្នំពេញតាមរយៈហ្វេសប៊ុកនៅរសៀ លថ្ងៃទី៣ ខែវិច្ឆិកា នេះ បានអំពាវនាវដល់អ្នកទទួលផ្ញើម៉ូតូទាំងនោះ កុំយកថ្លៃពីអ្នកផ្ញើហួសហេតុពេ កដែលធ្វើអោយមានការលំបាកដល់ប្រជាពលរដ្ឋអ្នកផ្ញើ និងធ្វើអោយពួកគាត់មានការថ្នាំងថ្នាក់ចិត្ត។ នេះជាសេចក្ដីអំពាវនាវទាំងស្រុងរបស់រដ្ឋបាលរាជធានីភ្នំពេញ ៖ រដ្ឋបាលរាជធានីភ្នំពេញសូមជម្រាបជូនបងប្អូនប្រជាពលរដ្ឋ ក៏ដូចជាអ្នកប្រកបអាជីវកម្មផ្ញើរកង់ម៉ូតូទាំងអស់នៅបរិវេណជុំវិញទីតាំងប្រារព្ធពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មេត្តាជ្រាបថា ក្នុងអំឡុងពេលថ្ងៃទី១ នៃព្រះរាជពិធីបុណ្យឆ្នាំ២០១៧នេះ រដ្ឋបាលរាជធានីភ្នំពេញសង្កេតឃើញថា មានករណីជនមួយចំនួនបានធ្វើអាជីវកម្មទទួលផ្ញើរកង់ម៉ូតូ ដោយឆ្លៀតឱកាសយកតំលៃឈ្នួលផ្ញើរថ្លៃហួសហេតុ នាំឱ្យមានការថ្នាំងថ្នាក់ពីសំណាក់បងប្អូនប្រជាពលរដ្ឋដែលបានមកចូលរួមកំសាន្តក្នុងព្រះរាជពិធី។ ដើម្បីសម្រួលដល់ការចំណាយលើសេវ៉ាផ្ញើរកង់ម៉ូតូ ពិសេសចូលរួមបង្កលក្ខណៈងាយស្រួលដល់ប្រជាពលរដ្ឋ រដ្ឋបាលរាជធានីភ្នំពេញសូមធ្វើការអំពាវនាវដល់អ្នកប្រកបអាជីវកម្មទទួលផ្ញើរកង់ម៉ូតូទាំងអស់ បញ្ឈប់ជាបន្ទាន់ការយកថ្លៃឈ្នួលផ្ញើរថ្លៃហួសហេតុ នាំឱ្យប៉ះពាល់ជីវភាព និងសតិអារម្មណ៍សាធារណជន។ ជាមួយគ្នានេះ គណៈបញ្ជាការឯកភាពរដ្ឋបាលខណ្ឌទាំង១២ ពិសេសខណ្ឌដូនពេញ ចំការមន ឫស្សីកែវ និងខណ្ឌជ្រោយចង្វារ ត្រូវចាត់មន្ត្រីចុះត្រួតពិនិត្យ និងណែនាំដល់ម្ចាស់ទីតាំងទទួលផ្ញើរកង់ម៉ូតូទាំងអស់ឱ្យអនុវត្តតាមការអំពាវនេះដោយឈរលើស្មារតីយោគយល់ និងសហការល្អ។ អាស្រ័យហេតុនេះ សូមបងប្អូនប្រជាពលរដ្ឋ ក៏ដូចជាអ្នកប្រកបអាជីវកម្មផ្ញើរកង់ម៉ូតូទាំងអស់មេត្តាជ្រាប និងចូលរួមសហការអនុវត្ត។