លោក ហ៊ុន សែន អះអាងថា អន្តរជាតិមិនទទួលស្គាល់ការបោះឆ្នោតក៏លោកមិនខ្វល់

ប្រមុខដឹកនាំរដ្ឋាភិបាលកម្ពុជា គឺលោកនាយករដ្ឋមន្រ្តី ហ៊ុន សែន បានថ្លែងអោយដឹងថា លោកមិនចាប់អារម្មណ៍ ហើយក៏មិនខ្វល់ជាមួយនឹងសេចក្ដីថ្លែងការណ៍របស់អន្តរជាតិទាំងនោះទេ ។ លោកនាយករដ្ឋមន្រ្តី ហ៊ុន សែន បានអះអាងប្រាប់ថា ក្រោយការបោះឆ្នោតថ្នាក់ជាតិសម្រាប់ឆ្នាំ ២០១៨ ខាងមុខនេះ បើទោះបីជាការបោះឆ្នោតនេះ គ្មានការទទួលស្គាល់ពីអន្តរជាតិក៏ដោយចុះ ក៏រូបលោក និងរដ្ឋាភិបាលរបស់លោកមិនខ្វល់នោះដែរ ព្រោះមិនសំខាន់។ លោកបានលើកឡើងថា សំខាន់នោះ អោយតែការបោះឆ្នោតនេះមានការទទួលស្គាល់ពីប្រជាពលរដ្ឋខ្មែរដែលជាម្ចាស់ឆ្នោត និងម្ចាស់ប្រទេសទៅបានហើយ ។ លោក ហ៊ុន សែន ថ្លែងបែបនេះ ៖ « គណៈកម្មាធិការជាតិរៀបចំការបោះឆ្នោតប្រកាស ក្រុមប្រឹក្សាធម្មនុញ្ញដោះស្រាយបញ្ហាចុងក្រោយ ក្រុមប្រឹក្សាគណៈកម្មាធិការជាតិរៀបចំការបោះឆ្នោតប្រកាសលទ្ធផលចុងក្រោយ ព្រះមហាក្សត្រកោះប្រជុំ គឺជារឿងរួចរាល់។ មិនចាំបាច់អ្នកណាចោទថាទទួលស្គាល់ ឬមិនទទួលស្គាល់ យើងអត់មានត្រូវការទេ »។ ការថ្លែងលើកឡើងរបស់លោកនាយរកដ្ឋមន្រ្តី ហ៊ុន សែន យ៉ាងដូច្នេះ ធ្វើឡើងនៅក្នុងពិធីជួបសំណេះសំណាលនៅក្នុងជំនួបជួបជាមួយនឹងក្រុមយុវជនអាស៊ាន-ជប៉ុនថា ដែលប្រព្រឹត្តធ្វើឡើងនៅថ្ងៃទី១០ ខែវិច្ឆិកា ឆ្នាំ ២០១៧ ម្សិលមិញ នេះ។ ប្រធានគណបក្សប្រជាជនកម្ពុជា និងជានាយករដ្ឋមន្រ្តីរូបនេះបានថ្លែងប្រាប់ទៅក្រុមយុវជននេះបន្តទៀតថា លោកនឹងបន្តកាន់តំណែងនៅកម្ពុជាជានាយករដ្ឋមន្រ្តី នេះយ៉ាងតិចក៏មានចំនួន២អាណត្តិទៀតដែរ ដែលមានរយៈពេលស្មើនឹងប្រមាណជា១០ឆ្នាំទៀត ។ លើសពីនេះទៀត លោកនាយក រដ្ឋមន្រ្តីកម្ពុជារូបនេះថែមទាំងបានអំពាវនាវដល់បរទេសថា កុំអោយចូលមកជ្រៀតជ្រែកលើកិច្ចការងារផ្ទៃក្នុងរបស់កម្ពុជា ។ ការថ្លែងអំពាវនាវរបស់លោក ហ៊ុន សែន បែបនេះ ធ្វើឡើង រំលងបាន១ថ្ងៃ ក្រោយការព្រមានរបស់ សមាជិកសភាសហរដ្ឋអាមេរិកដ៏មានឥទ្ធិពលមួយរូប គឺលោក Ted Crus ចំពោះលទ្ធផលបោះឆ្នោត ខាងមុខនេះ ។ លោក Ted Crus បានចេញសេចក្ដីថ្លែងការណ៍មួយដោយបានទាមទារអោយរដ្ឋាភិបាលលោក ហ៊ុន សែន ដោះលែងលោក កឹម សុខា ប្រធានគណបក្សសង្រ្គោះជាតិ បើកសិទ្ធិអោយអង្គការប្រជាធិបតេយ្យចូលដំណើរការបានជាធម្មតានៅកម្ពុជា និងបើកវិទ្យុនានាដែលរដ្ឋាភិបាលបិទកន្លងមកនោះ អោយដំណើរការវិញ ។ លោក Ted Crus បានគូសបញ្ជាក់នៅក្នុងសេចក្ដីថ្លែងការណ៍នេះថា ប្រសិនបើរដ្ឋាភិបាលកម្ពុជា នៅពុំព្រមធ្វើកិច្ចការងារនេះ អោយបានទាន់ពេលវេលាសម្រាប់ត្រៀមក្នុងការបោះឆ្នោតទេ នោះការបោះឆ្នោតថ្នាក់ជាតិដែលនឹងប្រព្រឹត្តទៅនៅឆ្នាំ ២០១៨ ក្រោយនេះ សហរដ្ឋអាមេរិកទាំងមូល និងសម្ព័ន្ធ មិត្តនៃប្រទេសនេះ នឹងគ្មានផ្លូវប្រកាសទទួលស្គាល់ការបោះឆ្នោតនេះឡើយ ។ ប៉ុន្តែការព្រមានរបស់សមាជិកព្រឹទ្ធសភាអាមេរិករូបនេះ គឺមិនទទួលបានការខ្លាចញញើតពីលោកនាយករដ្ឋមន្រ្តី ហ៊ុន សែន នោះឡើយ ។ លោក ហ៊ុន សែន ថែមទាំងអះអាងថា មិនខ្វល់ និងស្នើកុំអោយអន្តរជាតិចូលមកជ្រៀតជ្រែកការងាររបស់កម្ពុជា ៕