លោកស្រី មួរ សុខហួរ ចាត់ទុកថា ការរំលាយបក្សសង្រ្គោះជាតិដើម្បីរក្សាអំណាចលោក ហ៊ុន សែន

អនុប្រធានគណបក្សសង្រ្គោះជាតិ លោកស្រី មួរ សុខហួរ បានចាត់ទុកការរំលាយគណបក្សង្រ្គោះជាតិថា ដើម្បីជាការអាចរក្សាតំណែងរបស់លោកនាយករដ្ឋមន្រ្តី ហ៊ុន សែន និងរក្សាអំណាចនៃបក្ស ពួកបក្សកាន់អំណាចមួយនេះ ។ តុលាការកំពូលកាលពីល្ងាចថ្ងៃទី១៦ វិច្ឆិកា នេះ បានសម្រេចប្រកាសសាលដីកាឱ្យរំលាយគណបក្សសង្រ្គោះជាតិជាស្ថាពរ និងហាមសមាជិកជាន់ខ្ពស់គណបក្សនេះ១១៨នាក់ មិនឱ្យធ្វើនយោបាយរយៈពេល៥ឆ្នាំ ។ ការសម្រេចនេះ ធ្វើឡើងទៅតាមបណ្ដឹងដែលប្ដឹងដោយមេធាវីមកពីក្រសួងម ហាផ្ទៃចំនួន៥រូប និងអះអាងថា ក្រសួងមហាផ្ទៃមានភស្តុតាងគ្រប់គ្រាន់ ក្នុងការដាក់បន្ទុកទៅលើការ រំលាយគណបក្សសង្រ្គោះជាតិ ។ នៅក្នុងបទសម្ភាសន៍ជាមួយនឹងវិទ្យុបារាំងដែលប្រព្រឹត្តធ្វើឡើងនាយប់ថ្ងៃទី១៦ វិច្ឆិកា នេះ ក្រោយ ការរំលាយគណបក្សនោះ លោកស្រី មួរ សុខហួរ ចាត់ទុកថា នេះគឺជាការបំផ្លាញលទ្ធិប្រជាធិបតេយ្យនៅកម្ពុជាយ៉ាងពិតប្រាកដ ។ លើសពីនេះទៀតលោកស្រីបានអះអាងថា ទង្វើទាំងនេះ គឺគ្រាន់ តែធ្វើក្នុងបំណងដើម្បីអោយលោក ហ៊ុន សែន បានបន្តកាន់កាប់អំណាចបន្តទៀតប៉ុណ្ណោះ ៕