លោក ហ៊ុន សែន ថា អ្នកដែលមិនចុះចូលបក្សលោក សុទ្ធតែក្រុមទៅឋាននរគ

ប្រមុខដឹកនាំរដ្ឋាភិបាលកម្ពុជា គឺលោកនាយករដ្ឋមន្រ្តី ហ៊ុន សែន បានហៅក្រុមអ្នកដែលមិនព្រមចុះ ចូលជាមួយនឹងគណបក្សប្រជាជនរបស់លោកថា មិនយល់ពីបំណងល្អរបស់លោក ។ លោកនាយករដ្ឋមន្រ្តី ហ៊ុន សែន បានបញ្ជាក់ថា រដ្ឋាភិបាល និងពួកលោកដោយផ្ទាល់ បានព្យាយាម ដាក់ជណ្ដើរ ដើម្បីអោយក្រុមសមាជិករបស់គណបក្សសង្រ្គោះជាតិឡើងតោងមកគណក្សប្រជាជន ដែលកំពុងកាន់អំណាច ។ ប៉ុន្តែអ្នកទាំងនោះនៅពុំទាន់មកទៀតឡើយ លោកបានថ្លែងថា នេះគឺជារឿងរបស់ពួកគេ ដែលរឿងល្អមិនព្រមធ្វើ បែជាចង់ធ្វើរឿងអាក្រក់ ។ លើសពីនេះទៀត នាយករដ្ឋមន្រ្តីជាង៣ទស្សវត្តន៍រូបនេះ បានហៅក្រុមអ្នកដែលមិនព្រមឡើងតាម ជណ្ដើរដែលពួកលោកដាក់អោយតោងនេះថា ជាក្រុមដែលកំពុងចុះនរគ ។ លោកនា យករដ្ឋមន្រ្តី ហ៊ុន សែន ថែមទាំងថ្លែងទាំងបែបកំប្លែងទៀតថា មិនមកក៏អត់ទៅ ព្រោះមិនមែនជាម្ដាយរបស់លោកឯណា ។ លោក ហ៊ុន សែន ថ្លែងបែបនេះ ៖ « គេអោយខ្លួនមានឱកាសហើយ គេដាក់ជណ្ដើរអោយខ្លួនឡើងហើយ មិនមកទេ ចុះនរគក៏ចុះទៅ។ មិនមកទេ មុខដូចម៉ែអញ់ » ។ លោកនាយករដ្ឋមន្រ្តី ហ៊ុន សែន ថ្លែងអោយដឹងយ៉ាងដូច្នេះ ធ្វើឡើងនៅក្នុងពិធីជួបជាមួយកម្មករកម្មការនីនៅតំបន់ចំការដូងខណ្ឌដង្កោ រាជធានីភ្នំពេញ នៅព្រឹកថ្ងៃទី៨ ខែវិច្ឆិកា ឆ្នាំ ២០១៧ ។ ទោះជាយ៉ាងាណាក៏ដោយ លោកនាយករដ្ឋមន្រ្តី ហ៊ុន សែន នៅតែប្រកាសអំពាវនាវដល់សមាជិកនៃគណបក្សប្រឆាំងអោយចុះចូលជាមួយនឹងគណបក្សកាន់អំណាចរបស់លោក ប្រសិនណាបើអ្នក ទាំងនោះចង់រក្សាតំណែង និងចង់បម្រើប្រជាពលរដ្ឋតទៅទៀត ដោយបានសំអាងថា គណបក្ស សង្រ្គោះជាតិដែលជាគណបក្សប្រឆាំងប្រាកដជានឹងត្រូវបានរំលាយក្រោយថ្ងៃទី១៦ ខែវិច្ឆិកា ឆ្នាំ ២០១៧ ខាងមុខនេះ ដោយតុលាការកំពូល។ លោកនាយកដ្ឋមន្រ្តី ហ៊ុន សែន ថែមទាំងបានថ្លែងរកមនុស្សមកភ្នាល់ជាមួយនឹងរូបលោក ករណី១ ស៊ី ១០០ ចំពោះ ការរំលាយគណបក្សសង្រ្គោះជាតិ ។ លោកបានបញ្ជាក់អោយដឹងថា មានប្រជាពលរដ្ឋដែលជាអ្នកនៅតាមហាងកាហ្វេមួយចំនួន ពួកគាត់កំពុងតែធ្វើការភ្នាល់គ្នា ករណីរំលាយគណបក្សសង្គ្រោះជាតិ ដែលជាគម្រោងការររបស់រដ្ឋាភិបាលគណបក្សប្រជាជន ។ ហើយចំពោះលោកវិញអោយតែហ៊ានភ្នាល់ គឺលោកនឹងភ្នាល់ភ្លាម ។ លោកថា លោកហ៊ានភ្នាល់គ្នា ១សងវិញ១០០ បើសិនជាមិនរំលាយ ឲ្យទៅយកលុយពីលោក ៕