តំណាងរាស្រ្តបក្សប្រឆាំង លី ស្រីវីណា ដែលលាលែងចេញពីបក្សអះអាងថា មិនក្បត់ឆន្ទៈរាស្រ្តទៅសុំតំណែងបក្សកាន់អំណាចដាច់ខាត

តំណាងរាស្រ្តរបស់គណបក្សសង្រ្គោះជាតិមួយរូបមកពីមណ្ឌលភ្នំពេញ លោកស្រី លី ស្រីវីណា ដែលបានដាក់លិខិតសុំលាលែងចេញពីគណបក្សសង្រ្គោះជាតិកាលពីកន្លងទៅនោះបានអះអាងថា បើទោះបីជាលោកស្រីលាលែងចេញពីបក្សក៏ពិតមែន ប៉ុន្តែលោកស្រីនឹងមិនក្បត់ឆន្ទៈរាស្រ្តនោះឡើយ ។ នៅក្នុងលិខិតសុំលាលែងចេញពីតំណាងរាស្រ្តមណ្ឌលភ្នំពេញរបស់លោកស្រី លី ស្រីវីណា ដែលធ្វើឡើងកាលពីថ្ងៃទី ១០ ខែវិច្ឆិកា កន្លងទៅថ្មីៗនេះ លោកស្រីបានបញ្ជាក់ថា ការលាលែងនេះ មិនមែនក្នុងគោលបំណងដើម្បីទៅសុំតំណែង ឬក៏ទៅសុំមុខងារត្រង់កន្លែងណាមួយ ដូចដែលក្រុមអ្នកសារព័ត៌មានគាំទ្ររដ្ឋាភិបាលធ្វើការចុះផ្សាយនោះឡើយ ។ លោកស្រីអោយដឹងបែបនេះ ៖ « នាងខ្ញុំសូមបញ្ជាក់ថា នាងខ្ញុំ មិនត្រូវការ ហើយក៏មិនបានសុំតំណែងអ្វីមួយពីគណបក្សកាន់អំណាច ដូចការចុះផ្សាយដោយគណនីបណ្ដាញសង្គមមួយចំនួននោះទេ » ។ បើតាមលិខិតរបស់លោកស្រី លី ស្រីវីណា បានអះអាងថា ការលាលែងនេះ មិនមែនទើបតែធ្វើឡើងនាពេលនេះនោះទេ ពោលគឺបានធ្វើឡើងតាំងពីយូយាណាស់មកហើយ ។ លោកស្រីក៏បានបញ្ជាក់ ប្រាប់ពលរដ្ឋ និងអ្នកគាំទ្ររបស់គណបក្សសង្រ្គោះជាតិថា លោកស្រីនឹងមិនក្បត់ឆន្ទៈពលរដ្ឋឡើយ។ ទោះជាយ៉ាងណា បើតាមលិខិតលាលែងចេញពីតំណែងនេះ លោកស្រីក៏មិនបានបញ្ជាក់ពីមូលហេតុអ្វីអោយប្រាកដនោះឡើយ ហើយក៏មិនបានបញ្ជាក់ពីទិសដៅបន្តរបស់លោកស្រីនោះដែរ ៕