អំពាវនាវអោយចុះចូលមិនព្រម គម្រាមម្ដងមើលខ្លាំងទៀតអត់?

មន្រ្តីរបស់គណបក្សសង្រ្គោះជាតិជាច្រើនបានប្រកាសពីជំហររបស់ពួកគេ ក្នុងការមិនចាកចេញពីគណបក្សសង្រ្គោះជាតិ បើទោះបីជាគណបក្សនេះកំពុងប្រឈមមុខខ្លាំងនៅថ្ងៃនេះថាតើនឹងត្រូវបាន តុលាការរំលាយចោលមែនឬយ៉ាងណា ? លោកនាយករដ្ឋមន្រ្តី ហ៊ុន សែន ម្ដងជាពីរដងហើយ ដែលបានប្រកាសអំពាវនាវដល់សមាជិករបស់ គណបក្សសង្រ្គោះជាតិអោយចុះចូលជាមួយនឹងគណបក្សកាន់អំណាច ។ លោកនាយករដ្ឋមន្រ្តីធ្លាប់ បានប្រកាសអំពាវនាវដោយផ្ទាល់ថា បើសិនជាសកម្មជនរបស់បក្សសង្រ្គោះជាតិទាំងនោះ ឬក៏សមា ជិកថ្នាក់មូលដ្ឋាន ពិសេសមេឃុំ និងសមាជិកឃុំចង់រក្សាតំណែង ដើម្បីអាចបន្តបម្រើប្រជាពលរដ្ឋបន្ត ទៀតបាននោះ ត្រូវតែចុះចូលជាមួយនឹងបក្សប្រជាជនអោយបានមុនថ្ងៃតុលាការរំលាយបក្សសង្រ្គោះជាតិ ។ ប៉ុន្តែយ៉ាងណា រហូតមកទល់នឹងពេលនេះ បើតាមមន្រ្តីរបស់គណបក្សសង្រ្គោះជាតិធ្លាប់បានអះអាងថា សមាជិកដែលចុះចូលជាមួយនឹងបក្សប្រជាជនមានប្រមាណជាត្រឹមតែ៥០រូបប៉ុណ្ណោះ ខណៈសារព័ត៌មានគាំទ្ររដ្ឋាភិបាលចុះផ្សាយថា មានចំនួនរហូតដល់ទៅជាង១០០នាក់ឯណោះ ។ ទោះជាយ៉ាងណាទន្ទឹមនឹងការប្រកាសចុះចូលនេះដែរ សមាជិករបស់គណបក្សសង្រ្គោះជាតិមួយចំនួនក៏អះអាងថា ការចុះចូលនេះមិនមែនសុទ្ធតែធ្វើឡើងដោយការពេញចិត្តទាំងអស់នោះទេ ពោលគឺដោយសារមានគំនាប និងការគម្រាមកំហែងមួយចំនួន ។ កាលពីថ្ងៃចន្ទ មេធាវីក្រសួងមហាផ្ទៃ បានដាក់បញ្ជីឈ្មោះមន្រ្តីជាន់ខ្ពស់ និងមន្រ្តីថ្នាក់ខេត្តចំនួន១១៧នាក់ របស់គណបក្សសង្រ្គោះជាតិ ដើម្បីសុំឲ្យតុលាការកំពូលកាត់សិទ្ធិនយោបាយពួកគេចំនួន៥ឆ្នាំ តាមបណ្តឹងរបស់ក្រសួងមហាផ្ទៃ សុំរំលាយគណបក្សប្រឆាំង ដោយតុលាការនឹងបើកសវនាការនៅថ្ងៃទី១៦ ខែវិច្ឆិកា។ តាមរយៈឈ្មោះរបស់សមាជិកបក្សប្រឆាំងដែលមាននៅក្នុងបញ្ជីដែលរៀបចំឡើងដោយរដ្ឋាភិបាល ដាក់បញ្ជូនទៅតុលាការនេះ ត្រូវបានបក្សប្រឆាំងចាត់ទុកថា ជាការគម្រាមកំហែងពួកគេ ខណៈដែល ពួកគេនៅតែរឹងទទឹងជាមួយនឹងការចុះចូលតាមការអំពាវនាវរបស់មេដឹកនាំបក្សកាន់អំណាច ។ សូមរងចាំអានព័ត៌មានពិស្ដារនាយប់នេះ !