លោក គុល បញ្ញា ៖ ឆន្ទៈរាស្ត្រមិនអាចផ្ទេរទៅឱ្យនរណាម្នាក់ដែលមិនបានរើសដោយម្ចាស់ឆ្នោតទេ

នាយកប្រតិបត្តិនៃអង្គការខុមហ្រ្វែល លោក គុល បញ្ញា បានថ្លែងលើកឡើងអោយដឹងថា នៅឯប្រទេសថៃ កាលពីឆ្នាំ ២០០៧ កន្លងទៅនោះ ក៏មានករណីរំលាយគណបក្សកាន់អំណាចរបស់លោកថាក់ស៊ិនឈ្មោះ ថៃរ៉ាក់ថៃ ( TRT) ដោយតុលាការធម្មនុញ្ញ ប៉ុន្ដែទោះបីជាមានការរំលាយមែន ចំពោះតំណាងរាស្ត្រ និងមន្ត្រីជាប់ឆ្នោតឬ អាសនៈនៃគណបក្សនេះមិនត្រូវបានរំលាយ ឬដកហូត។ លោកបានបញ្ជាក់ទៀតថា ក្រោយការមិនរំលាយអាសនៈ និងការមិនដកហូតហើយនោះ តំណាងរាស្ត្រនៃគណបក្សនេះក៏បានក្លាយជាតំណាងរាស្ត្ររបស់គណបក្សថ្មីឈ្មោះ ភឿថៃ(PTP)។ លោកបន្តថា តាមពិតការរំលាយក៏ទទួល ឥទ្ធិពលពីការធ្វើរដ្ឋប្រហារយោធា ។ លោក គុល បញ្ញា អោយដឹងបែបនេះ ធ្វើឡើងនៅលើគណនីហ្វេសប៊ុកផ្ទាល់ខ្លួនរបស់លោក កាលពី ថ្ងៃទី៨ វិច្ឆិកា កន្លងទៅថ្មីៗនេះ ។ បើតាមលោក គុល បញ្ញា បានអះអាងទៀតថា នៅប្រទេសខ្លះ តំណាងរាស្ត្រស្លាប់ឬលាលែងមួយចំនួននោះ គេរៀបចំការបោះឆ្នោតឡើងវិញ (by elections) ដើម្បីឲប្រាកដតំណាងរាស្ត្រនោះកើតចេញពីឆន្ទៈរាស្ត្រ។ ត្រង់ន័យនេះលោកបានពន្យល់ថា តំណាងរាស្ត្រកើតចេញពីឆន្ទៈរបស់ម្ចាស់ឆ្នោតដែលមិនត្រូវបានរំលាយដោយការរំលាយគណបក្សទេ ហើយឆន្ទៈរាស្ត្រក៏មិនអាចផ្ទេរទៅឲនរណាម្នាក់ដែលមិនបានរើសដោយម្ចាស់ឆ្នោតដែរ។ នាយកប្រតិបត្តិនៃអង្គការខុមហ្រ្វែលរូបនេះបានថ្លែងពន្យល់បន្តទៀតថា ចំពោះគោលការណ៍ជាមូលដ្ឋានគ្រឹះនៃប្រជាធិបតេយ្យសេរីគឺការគោរពឆន្ទៈម្ចាស់ឆ្នោត។ ការលើកឡើងដោយរំលឹកពីប្រវត្តិនៃប្រទេសថៃចំពោះការរំលាយគណបក្សនេះ ធ្វើឡើងនៅចំពេល ដែលរដ្ឋាភិបាលកម្ពុជាបានព្រមានចំពោះការរំលាយគណបក្សសង្រ្គោះជាតិដោយតុលាការកំពូលដែលអាចនឹងកើតឡើងនៅថ្ងៃទី១៦ វិច្ឆិកា ខាងមុខ នេះ ៕