អឺរ៉ុបស៊ើបអង្កេតប្រឆាំងការគេចពន្ធលើមុខទំនិញចេញពីកម្ពុជា ចូលទៅសហភាពអឺរ៉ុប

សភាពអឺរ៉ុបបានប្រកាសពីបំណងនៃការធ្វើការស៊ើបអង្គេតរបស់ពួកគេដើម្បីធ្វើការប្រឆាំងការគេចពន្ធលើមុខទំនិញចេញពីកម្ពុជា ចូលទៅសហភាពអឺរ៉ុប ។ ជាមួយគ្នានេះដែរ មន្ត្រីជាន់ខ្ពស់នៃក្រសួងពាណិជ្ជកម្មរបស់កម្ពុជា បានប្រាប់ទៅក្រុមការងាររបស់ខ្លួន ឲ្យផ្តល់ទិន្នន័យត្រឹមត្រូវ ដល់ការិយាល័យប្រឆាំងការក្លែងបន្លំ របស់សហភាពអឺរ៉ុប ដើម្បីជាមូលដ្ឋាន ក្នុងការស៊ើបអង្កេតប្រឆាំង ការគេចពន្ធលើមុខទំនិញ Hand Pallet Trucks ។ ការប្រកាសពីការស៊ើបអង្កេត និងការព្រមព្រៀងគ្នាលើកនេះ ធ្វើឡើងនៅក្នុង ជំនួបជួបពិភាក្សាការងាររបស់លោក សំ សិរីរតន៍ ជាមួយក្រុមការងារបេសកកម្ម នៃការិយាល័យប្រឆាំងការក្លែងបន្លំរបស់សហភាពអ៊ឺរ៉ុប ដឹកនាំដោយលោកស្រី Ana Maria S. Solano ប្រធានប្រតិភូដឹកនាំក្រុមស៊ើបអង្កេតមកពីការិយាល័យប្រឆាំងការក្លែងបន្លំរបស់សហភាពអ៊ឺរ៉ុបនៅទីស្តីការក្រសួង។ នៅក្នុងឱកាសនោះ លោកស្រី Ana Maria S. Solano បានមានប្រសាសន៍ថា ដំណើរទស្សនកិច្ចរបស់ក្រុមការងារបេសកកម្មនៃការិយាល័យប្រឆាំងការក្លែងបន្លំរបស់សហភាពអ៊ឺរ៉ុប នៅប្រទេសកម្ពុជា មានរយៈពេល ០៩ថ្ងៃ ចាប់ពីថ្ងៃ០៧-១៥ ខែវិច្ឆិកា ឆ្នាំ២០១៧ និងមានបំណងចំនួន០៣ រួមមាន ៖ ទី១-រកឲ្យឃើញភាពត្រឹមត្រូវ ឬមិនត្រឹមត្រូវនៃប្រភពដើមផលិតផលឧបករណ៍លើកដាក់ទំនិញប្រើដោយដៃ (Hand Pallet Trucks) ផលិតនៅកម្ពុជាដែលទទួលបានភាពអនុគ្រោះ ត្រូវបាននាំចូលទៅកាន់ទីផ្សារសហគមន៍អឺរ៉ុប ដោយប្រើប្រាស់វិញ្ញាបនបត្របញ្ជាក់ប្រភពដើទំនិញទំរង់អេ (GSP Certificates of Preferential Origin FORM A) ចាប់ពីខែតុលា ឆ្នាំ ២០១៤ ដល់ខែកញ្ញា ឆ្នាំ២០១៧។ ទី២-បង្កើតឲ្យមានប្រភពដើមពិតប្រាកដពាក់ព័ន្ធទៅនឹងផលិតផល Hand Pallet Trucks និងទី៣-ប្រមូលរាល់ឯកសារយោងទាំងអស់ដែលបញ្ជាក់នូវប្រភពដើមជាក់ស្តែងនៃផលិតផល Hand Pallet Trucks ចេញពីទិន្នន័យរបស់គយ ឯកសារ ឬរបាយការណ៍ពីអាជ្ញាធរ និងក្រុមហ៊ុនពាក់ព័ន្ធ។ លោក សំ សិរីរតន៍ អនុរដ្ឋលេខាធិការ ក្រសួងពាណិជ្ជកម្ម បានលើកទឹកចិត្ត និងសំដែងការគាំទ្រចំពោះបេសកកម្មរបស់ក្រុមការងារក្នុងការស្រាវជ្រាវរកឲ្យឃើញនូវភាពមិនប្រក្រតី ដែលជាប់សង្ស័យលើប្រភពដើមទំនិញឧបករណ៍លើកដាក់ទំនិញដោយដៃ (Hand Pallet Trucks) ដែលនាំចេញពីកម្ពុជា និងសកម្មភាពគេចពន្ធនានា របស់បណ្តាប្រទេសដែលមិនមែនជាសមាជិករបស់សហភាពអ៊ឺរ៉ុប ក្នុងន័យធានាឲ្យបាននូវភាពត្រឹមត្រូវតាមផ្លូវច្បាប់ពាណិជ្ជកម្មអន្តរជាតិ។ ជាងនេះទៀត លោកបានអំពាវនាវដល់អាជ្ញាធរកម្ពុជាដែលពាក់ព័ន្ធទាំងអស់ចូលរួមយ៉ាងសកម្ម និងឥតលាក់លៀម ក្នុងការបំពេញកិច្ចសហប្រតិបត្តិការរដ្ឋបាលតាមការចាំបាច់ជាមួយក្រុមការងារបេសកកម្មនៃការិយាល័យប្រឆាំងការក្លែងបន្លំរបស់សហភាពអ៊ឺរ៉ុប ដើម្បីជាមូលដ្ឋានក្នុងការស៊ើបអង្កេតប្រឆាំងការគេចពន្ធលើមុខទំនិញ Hand Pallet Trucks សំដៅបង្ហាញឲ្យឃើញនូវភាពត្រឹមត្រូវ ឬមិនត្រឹមត្រូវលើប្រភពដើមនៃមុខទំនិញ ដែលមានលទ្ធភាពទទួលបានភាពអនុគ្រោះពន្ធ អាចនាំចេញដោយរួចពន្ធសូន្យភាគរយ និងមិនជាប់កម្រិតកំណត់ ដោយប្រើប្រាស់វិញ្ញាបនបត្របញ្ជាក់ប្រភពដើមទំនិញទំរង់ A ៕