កងកម្លំាងត្រៀមយ៉ាងស្អាត ដូចកំពុងរៀបចំទៅធ្វើសង្រ្គាមជាមួយចោរឈ្លានពានទឹកដី តាមពិតទុកបង្រ្កាបពលរដ្ឋសោះ

កងកម្លាំងប្រដាប់អាវុធទាំង៣ប្រភេទ (ប៉ូលិស ទាហាន និង កងរាជអាវុធហត្ថ) និងសមត្ថកិច្ចពាក់ព័ន្ឋទាំងអស់បានត្រៀមរួចរាល់ហើយ ដើម្បីទប់ទល់និងបង្ក្រាបសកម្មភាពតវ៉ាណាមួយប្រឆាំងទៅនឹងសាលដីកាសម្រេចរបស់តុលាការកំពូល ជាពិសេសប្រសិនបើតុលាការជាន់ខ្ពស់នេះ សម្រេចរំលាយគណបក្សង្គ្រោះជាតិនៅថ្ងៃស្អែក ។ កាលពីព្រឹកថ្ងៃម្សិលមិញ អគ្គស្នងការដ្ឋាននគរបាលជាតិ បានបើកកិច្ចប្រជុំផ្សព្វផ្សាយផែនការស្តីពីការបង្ការនិងបង្ក្រាប និងការទប់ស្កាត់ការធ្វើបាតុកម្មប្រឆាំងនឹងចំណាត់ការតុលាការកំពូល ដែលត្រូវបើកសវនាការកាត់ក្តីទាក់ទិននឹងបណ្តឹងរំលាយគណបក្សសង្គ្រោះជាតិនាថ្ងៃ១៦ ខែវិច្ឆិកា ខាងមុខនេះ។ កិច្ចប្រជុំនេះមានការដឹកនាំដោយលោកឧត្តមសេនីយ៍ឯក សុខ ខេមរិន ប្រធាននាយកដ្ឋាននគបាលព្រហ្មទណ្ឌ នៃអគ្គស្នងការដ្ឋាននគរបាលជាតិ និងមានការចូលរួមពីអនុប្រធាននាយកដ្ឋាន, នាយការិយាល័យ, នាយរងការិយាល័យ និងថ្នាក់ដឹកនាំនៃនាយកដ្ឋាននគរបាលព្រហ្មទណ្ឌ ដែលពាក់ព័ន្ធទាំងអស់ផងដែរ ។ បើយោងតាមការចេញផ្សាយរបស់គេហទំព័ររបស់នគរបាលជាតិ បានឲ្យដឹងថា ៖ «កិច្ចប្រជុំនេះត្រូវបានធ្វើឡើងដើម្បីរក្សាការពារសន្ដិសុខ សណ្ដាប់ធ្នាប់សាធារណៈ និងសុវត្ថិភាពសង្គមក្នុងបរិបទនយោបាយថ្មី ដែលគណបក្សសង្គ្រោះជាតិ នឹងត្រូវរំលាយដោយតុលាការកំពូល ដោយបង្ការ ទប់ស្កាត់មិនទុកឲ្យមានការញុះញង់ បំផុសកៀងគរប្រជាពលរដ្ឋប្រមូលផ្ដុំបង្កចលាចលសង្គមបាន» ។ លោកសុខ ខេមរិន បានណែនាំឲ្យមន្ត្រីនគរបាលទាំងអស់ ក្តាប់ឲ្យបានទាន់ពេល និងវិភាគឲ្យបានត្រូវ នូវសកម្មភាពខុសច្បាប់ដែលសមត្ថកិច្ចយល់ថា ធ្វើឲ្យ«ប៉ះពាល់ចំពោះដំណើរការសវនាការបស់តុលាការកំពូល នាថ្ងៃទី១៦ ខែវិច្ឆិកា ឆ្នាំ២០១៧ ដើម្បីដាក់ចេញនូវវិធានការបង្ការ ទប់ស្កាត់សមស្រប និងមានប្រសិទ្ធភាព» ។