រដ្ឋាភិបាលកម្ពុជាថា មិនដែលអោយតម្លៃទៅលើក្រុមសមាជិកសភាអាមេរិកនោះទេ ហើយក៏មិនខ្វល់នឹងការព្រមានដាក់ទណ្ឌកម្ម

មន្រ្តីរបស់រដ្ឋាភិបាលចេញមកមុខមកអះអាងថា ពួកគេមិនដែលចាប់អារម្មណ៍ជាមួយនឹងការព្រមានរបស់ក្រុមសមាជិកសភារបស់សហរដ្ឋអាមេរិកមកលើកម្ពុជានោះឡើយ ហើយក៏មិនដែលបានចាប់អារម្មណ៍ទៅនឹងការដាក់ឱសានវាទរបស់ពួកគេដែរ ។ រដ្ឋាភិបាលកម្ពុជាថា មិនដែលអោយតម្លៃទៅលើក្រុមសមាជិកសភាអាមេរិកនោះទេ ហើយក៏មិនខ្វល់នឹងការព្រមានដាក់ទណ្ឌកម្ម លោក ផៃ ស៊ីផាន អ្នកនាំពាក្យទីស្ដីការគណរដ្ឋមន្រ្តីបានថ្លែងបញ្ជាក់ថា ការណ៍ដែលកម្ពុជាមិនអាចធ្វើតាម និងមិនចាប់អារម្មណ៍ជាមួយនឹងការដាក់ឱសានវាទរបស់ក្រុមសមាជិកសភារបស់សហរដ្ឋអាមេរិក ដោយសំអាងលើហេតុផលថា អាមេរិកមិនអាចរំលោភបំពានទៅលើរដ្ឋអធិតេយ្យមួយបាននោះទេ ។ ការចេញមុខបដិសេធនេះ គឺធ្វើឡើង ដើម្បីជាការឆ្លើយតបទៅនឹងការទាមទាររបស់សមាជិកព្រឹទ្ធភាអាមេរិកអោយធ្វើការដោះលែង លោក កឹម សុខា ប្រធានគណបក្សសង្រ្គោះជាតិ អោយបានមុនថ្ងៃទី ៩ វិច្ឆិកា ខណៈមកទល់នឹងថ្ងៃនេះ គឺនៅសល់ពេលត្រឹមតែ២ថ្ងៃទៀតប៉ុណ្ណោះ ការកំណត់ដាក់ឱសានវាទនេះនឹងត្រូវបានមកដល់ហើយ ។ លោក ថេដ គ្រូស (Ted Cruz) សមាជិកព្រឹទ្ធសភាអាមេរិក ធ្លាប់បានចេញមុខមកធ្វើប្រតិកម្មចំនួនពីរដង ចាប់តាំងពីការចាប់ខ្លួនលោក កឹម សុខា និងទាមទារអោយកម្ពុជាដោះលែងលោក កឹម សុខា ។ លោកលើកឡើងថា ប្រសិនបើមិនព្រមដោះលែងនោះទេ លោកនឹងចាត់ការ ដោយផ្ទាល់ដៃ ក្នុងការដាក់មន្ត្រីរដ្ឋាភិបាល ដែលពាក់ព័ន្ធទាំងឡាយណា ចូលទៅក្នុងបញ្ជីខ្មៅអាមេរិក ។ លោកបានសម្ដែងក្ដីមិនពេញចិត្តថា ការសម្រេចរបស់តុលាការកំពូលកម្ពុជា ក្នុងការតម្កល់សាលដីកាសាលាឧទ្ធរណ៍ ដែលបញ្ជាក់ ពីការឃុំខ្លួនលោក កឹម សុខាប្រធានគណបក្សសង្គ្រោះជាតិ ថាត្រឹមត្រូវ ទុកជាបានការនោះ គឺជា«ដំណឹងដ៏អាក្រក់»មួយ សម្រាប់លោក ។ លោកផៃ ស៊ីផាន ហៅឱសាទវាទនេះគ្រាន់តែជាខ្លាក្រដាសៗ ដោយសារតែលោកយល់ថា អាមេរិកធ្លាប់ដាក់ឱសាទវាទដល់ប្រទេសមួយចំនួនកន្លងមកដែរ តួយ៉ាងប្រទេសកូរ៉េខាងជើង ប៉ុន្តែមិនដែលធ្វើស្អីគេកើតផង។ សម្រាប់លោកផៃ ស៊ីផាន បើទោះបីអាមេរិកដាក់ទណ្ឌកម្មមិនឲ្យមន្រ្តីរដ្ឋាភិបាលកម្ពុជាចូលទឹកដីអាមេរិកយ៉ាងណាក៏ដោយ ក៏មិនប៉ះពាល់អ្វីដែរ។ លោក កឹម សុខា ប្រធានគណបក្សសង្រ្គោះជាតិ លោកត្រូវបាន ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួន ដាក់ពន្ធនា គារជាបណ្តោះអាសន្នក្រោមការចោទប្រកាន់ពីបទ សន្និដ្ឋិភាពជាមួយបរទេស ដែលជាបទល្មើសមួ យក្នុងអំពើក្បត់ជាតិ ក្នុងមាត្រា៤៤៣ នៃក្រមព្រហ្មទណ្ឌ កាលពីនៅថ្ងៃទី០៦ ខែកញ្ញា ឆ្នាំ២០១៧ ។ រហូតមកទល់នឹងពេលនេះ ការឃុំខ្លួនលោក កឹម សុខា បានធ្វើឡើងអស់រយៈពេលជាង២ខែកន្លង ទៅហើយ ជាមួយនឹងការថ្កោលទោសពីសហគមន៍អន្តរជាតិយ៉ាងខ្លាំងបំផុត ។ កាលពីម្សិលមិញនេះ សារព័ត៌មានបានធ្វើការផ្សព្វផ្សាយពីសេចក្ដីសម្រេចលេខ២៧៩ ផ្ដួចផ្ដើមដោយសមាជិកព្រឹទ្ធសភាអាមេរិកាំងបីរូប គឺលោក ចន ម៉ាខេន (John McCain) លោក ឌិក ឌើប៊ិន (Dick Durbin) និងលោក ម៉ារកូ រ៉ូប៊ីយ៉ូ (Marco Rubio) កាលពីថ្ងៃទី៣ ខែតុលា ឆ្នាំ២០១៧ ដើម្បីស្វែងរកដំណោះស្រាយជុំវិញវិបត្តិនយោបាយនៅកម្ពុជា ឥឡូវនេះ ត្រូវបានដាក់បញ្ជូលទៅក្នុងកាលវិភាគលេខ ២៥៧ សម្រាប់លើកយកមកជជែកដេញដោលក្នុងសម័យប្រជុំព្រឹទ្ធសភាអាមេរិកាំងនាពេលខាងមុខនេះហើយ។ សេចក្ដីសម្រេចដដែលនេះ ជំរុញឲ្យលោកនាយករដ្ឋមន្ត្រី ហ៊ុន សែន និងមន្ត្រីគណបក្សប្រជាជនកម្ពុជា បញ្ចប់នូវការធ្វើទុក្ខបុកម្នេញ និងការបំភិតបំភ័យនានាមកលើក្រុមអ្នកប្រឆាំងនៅកម្ពុជា និងជំរុញឲ្យមាននូវបរិយាកាសមួយ ដែលលទ្ធិប្រជាធិបតេយ្យ អាចរីកចម្រើន និងលូតលាស់ទៅមុខបានល្អ។ បន្ថែមពីលើនេះ សេចក្ដីសម្រេចដដែលនេះ តម្រូវឲ្យក្រសួងរតនាគារអាមេរិកាំង ពិចារណាដាក់បញ្ចូលរាល់ឈ្មោះមន្ត្រីជាន់ខ្ពស់ក្នុងរដ្ឋាភិបាលកម្ពុជាទាំងអស់ ដែលជាប់ពាក់ព័ន្ធនឹងករណីរំលោភបំពានសិទ្ធិមនុស្ស និងនយោបាយ ចូលទៅក្នុងបញ្ជីខ្មៅឈ្មោះជនបរទេសដែលត្រូវបង្កកទ្រព្យសម្បត្តិ និងហាមប្រាមមិនឲ្យធ្វើអាជីវកម្មជាមួយជនជាតិអាមេរិកាំង ដែលហៅកាត់ថា «SDN»។ ប៉ុន្តែរដ្ឋាភិបាលកម្ពុជានៅតែអះអាងថា មិនខ្វល់ជាមួយនឹងលិខិត ឬក៏ការដាក់ឱសានវាទអស់ទាំងនេះទេ ។ ពួកគេនៅតែសំអាងថា កម្ពុជា គឺជារដ្ឋអធិបតេយ្យមួយ ដែលមិនអាចទទួលការជ្រៀតជ្រែកផ្ទៃក្នុងពីបរទេសណាមួយឡើយ ៕